مع رانيا.. المجموعة الطبيعية للعناية بالشعر

النهارده هنعمل حمام كريمي طبيعي لترطيب وتنعيم الشعر، بالإضافة لماسكات تانية للعناية بالبشرة والشعر

أهلا بكم بنات “قمر 14” وحلقة جديدة من حلقات “جمالك من الطبيعة مع رانيا” في شهر رمضان، والنهارده هنعمل حمام كريمي طبيعي لترطيب وتنعيم الشعر، بالإضافة لماسكات تانية للعناية بالبشرة والشعر..

حمام كريم باللانولين
المقادير:
كوب ميه
¼ كوب ماء بلسم
¼ كوب شمع بلسم
¼ ملعقة صغيرة لانولين

الطريقة:
حطّي الميه على النار لغاية ما تغلي، وبعد كده ضيفي عليها شمع البلسم مع التقليب لحد ما يدوب تماما، وبعد كده ضيفي عليهم اللانولين، وقلّبي لحد ما يدوب، وبعدين ضيفي ماء البلسم مع التقليب المستمر، وبعد كده شيلي حمام الكريم من على النار مع التقليب المستمر.

لوسيون الشاي لإزالة قشرة الشعر
المقادير:
كوب شاي دافئ
ملعقة صغيرة عسل نحل
ملعقة صغيرة حبوب لقاح مطحونة

الطريقة:
ضيفي عسل النحل على كوباية الشاي، وضيفي عليهم ملعقة حبوب اللقاح، وقلبي كويس جدا لحد ما العسل يدوب، وبعد كده حطّي الماسك ده على فروة رأسك، وسيبيه لمدة نصف ساعة، وبعدين اغسلي شعرك بالشامبو كويس.

كريم لنعومة واحمرار كعب القدم
المقادير:
ملعقة صغيرة لانولين
ملعقة صغيرة فازلين أبيض
3 ملعقة صغيرة زيت زيتون
ملعقة صغيرة دم غزال

الطريقة:
سيّحي اللانولين مع الفازلين على النار، وبعد كده ارفعيهم وضيفي عليهم زيت الزيتون ودم الغزال مع التقليب المستمر، وبعد كده استخدمي الخليط ده على كعب رجلك.

ماسك للشعر شديد الجفاف بحبوب اللقاح
المقادير:
3 ملعقة صغيرة مايونيز
ملعقة صغيرة حبوب لقاح
ملعقة صغيرة زيت جوز هند أو زيت لوز أو زيت سمسم

الطريقة:
اخلطي المايونيز مع حبوب اللقاح كويس جدا، وبعد كده ضيفي عليهم زيت جوز الهند، ووزّعي الخليط ده على فروة الرأس والشعر كله، وسيبيه من 30 : 45 دقيقة، وبعدها اغسلي شعرك بالشامبو.

ماسك لتقوية ونعومة الشعر
المقادير:
ملعقة صغيرة حبوب لقاح
ملعقة صغيرة زيت بذر كتان
¼ كوب ميه

الطريقة:
ضيفي حبوب اللقاح على زيت بذر الكتان والميه مع التقليب، وحطّي الماسك على الشعر لمدة 30 دقيقة وبعدها اغسلي شعرك بالشامبو.

ماسك للبقع البنية وتجديد خلايا البشرة
المقادير:
ملعقة صغيرة حبوب لقاح
ملعقة صغيرة لوز مطحون
ملعقة صغيرة زيت لوز مر
ملعقة صغيرة عسل نحل
¼ ملعقة صغيرة غذاء ملكات النحل

الطريقة:
اخلطي حبوب اللقاح مع اللوز المطحون وغذاء الملكات، وقلّبيهم مع بعض كويس جدا وضيفي عليهم العسل وزيت اللوز المر، واعملي بالماسك ده سنفرة لبشرتك من 20 : 30 دقيقة.

الماسك ده ممكن تحتفظي بيه في التلاجة لمدة 3 أيام، ويُفضّل تعمليه من مرتين إلى ثلاثة مرات أسبوعيا.

ماسك العسل لنضارة العين
اخلطي العسل مع غذاء الملكات، ووزّعي الخليط على منطقة العين لمدة ربع ساعة، وداومي عليه يوم ويوم لمدة شهر، والماسك ده بيقوّي وينشّط منطقة العين، وبيأخّر ظهور التجاعيد ويزيل الخطوط البيضاء.

مجموعة كوكتيلات ببذر الكتان
الكوكتيل الأول: اخلطي كوب لبن صويا مع 3 ملاعق من بذور الكتان المطحونة واضربيهم مع بعض في الخلاط.

الكوكتيل الثاني: كوب لبن حليب وعليه ملعقة فانيليا وملعقة بذور الكتان.

الكوكتيل الثالث: جبنة قريش وعليه بذر الكتان الصحيح أو المطحون، ونقطّع عليها طماطم ووزيت بذر الكتان (وهو الزيت الحار).

الكوكتيل الرابع: كوب لبن رايب وعليه فاكهة موسم، زي الخوخ أو المشمش، وعليهم 3 ملاعق بذور كتان مطحونة.

ولغاية هنا تكون خلصت حلقتنا النهارده..
يا ريت تجرّبوا تعملوا الوصفات اللي عملناها النهارده..
وتبعتوا تقولوا لنا رأيكم واقتراحاتكم..
وكل سنة وإنتم طيبين،،،