ماكياج للبشرة الخمرية.. بالخطوات

هيكون معانا الماكييرة الجميلة "سحر شلبي" اللي هتعرّفنا على خطوات وضع ماكياج بسيط وطبيعي مناسب للبنت صاحبة البشرة الخمرية، وتقريباً معظم البنات في مصر بشرتها خمرية...

أنا سعيدة جدًّا  إني معاكم النهارده، وهيكون معانا الماكييرة الجميلة “سحر شلبي” اللي هتعرّفنا على خطوات وضع ماكياج بسيط وطبيعي مناسب للبنت صاحبة البشرة الخمرية، وتقريباً معظم البنات في مصر بشرتها خمرية، وكمان هنعرف مع بعض خطوات بسيطة لعمل “الأسموكي آيز” ماكياج العيون الدخاني بطريقة بسيطة وناعمة ومش سواريه أوي…

قبل ما نحط الماكياج نحدد

1- ملامح الوجه والعيوب:
أول حاجة المفروض إننا نعملها قبل ما نبتدي نحط الماكياج، هي إننا نلم شعرنا لوراء علشان نبعده عن الماكياج، ونقدر إننا نحدد معالم وجهنا بالضبط، ونشوف إيه هي العيوب اللي عايزين نخفيها؟ وإيه الحاجات الحلوة الموجودة في وجهنا علشان نظهرها بالماكياج؟ وده عن طريق إننا نلعب على نظرية الظل والنور.. يعني الغامق علشان نخبي ونصغر، والفاتح علشان نظهر الحاجات الحلوة في بشرتنا.

2– لون العين والملابس:
كمان نحدد لون العين؛ لأن لون العين بيساعد الماكيير إنه يلعب في درجات الألوان المستخدمة في ماكياج الوجه بصفة عامة وماكياج العيون بصفة خاصة، وطبعاً لون الملابس بتلعب دور كبير في اختيار ألوان الماكياج؛ فمثلاً الموديل اللي معانا النهارده لابسة موف وده هيخلينا نعتمد على اللون الموف بدرجاته المختلفة في الماكياج.

بعد كده نجهز الكونسيلر والبلاشر والفرش والروج وأدوات الماكياج اللي هنستخدمها، إلى جانب طبعاً فرش الحواجب وفرش تمشيط الرموش.

غلطة بتقع فيها بنات كتير
إوعي تقعي في الخطأ اللي بتقع فيها بنات كتيرة أوي في إنها تستخدم الماكياج الكتير لتفتيح البشرة زيادة على اللزوم والحصول على اللون الأبيض زي نجمات السينما؛ لأننا يا جماعة عندنا إضاءة والإضاءة دي هي اللي بتفتح البشرة طبيعي من غير ماكياج كتير، وعلى فكرة اللي بيحط على بشرته لون أفتح كثير من درجة بشرته بيلاقي في النهاية إن لون البشرة بقى باهت أو كالح.

وبالنسبة لاختيار لون الماكياج المناسب فكل المصريين تقريباً بيناسب بشرتهم ألوان البيجات، وغير مناسب لهم اللون الوردي الفاتح أو الألوان اللي نقدر نقول إنها مناسبة للبشرة الفاتحة أوي أو البشرة الأوروبية؛ لأن كل ما بعدنا عن اللون الفاتح كل ما ظهرت البشرة في شكل أجمل.

نصائح للبشرة المرهقة قبل الميك أب
لو حسينا إن بشرتنا مرهقة أو تعبانة، يبقى نعمل ماسك أو إسكراب لبشرتنا، ونحط كريم مرطب قبل الميك أب، ولازم نتأكد تماماً إن البشرة امتصت كل الكريم؛ لأن الكريم لو البشرة ما امتصتهوش كويس هيسيّح الميك أب ومش هيكون ليه ثبات على البشرة، ونقدر إننا نعرف إن البشرة امتصت كريم الترطيب بإننا نأخذ منديل ونحطه على وجهنا بطريقة التربيت الخفيف، ونشوف إذا كان لسه فيه آثار للمواد الدهنية ولا لأ؟!

توزيع كريم الأساس
أول حاجة بنعملها هي إننا بنخفي الهالات اللي تحت العين بإننا بنحط كريم الأساس، وعلى فكرة أكتر حاجة ممكن نستخدمها بنفسنا وتثبت معانا لمدة طويلة خصوصاً لو كنا رايحين سهرة هي “كريم الأساس المائي” أو “السوبرا”؛ لأنها سهلة ونقدر نستخدمها بسهولة في البيت بنفسنا وممكن نحطها بإسفنجة خفيفة.

بعد كده نبدأ نسيّح كريم الأساس باستخدام أسفنجة رطبة أو مبللة ومعصورة كويس جداً، ونبتدي نعمل مزج تدريجي للألوان وهنسيح اللون بطريقة متناسقة تقدر إنها تعكس الظل والنور، اللعب على الظل والنور ده أهم حاجة زي ما اتفقنا وما حدش يفرح يا جماعة ويقول أنا عايز أحط اللون ده من غير ما يشوف الأول إذا كان اللون ده مناسب للون بشرته ولّا لأ؟!

وفي خطأ شائع جداً بتقع فيه كل البنات إنهم بيجربوا الفاونديشن لما ييجوا يشتروه على كف الإيد، ودي حاجة مش مضبوطة؛ لأن المفروض تجربي الفاندويشن على منطقة الفكين، وتشوفي إذا كان مناسب للون بشرتك ولّا لأ؟ وتجربي أكتر من درجة لغاية ما توصلي لأقرب لون لبشرتك.

البودرة السايبة أساسية في الميك أب
بنوزع اللوس باودر على الوجه بكمية كبيرة ومتساوية في المنطقة اللي تحت العين، علشان يكوّن زي واقي يحمي المنطقة أثناء وضع ماكياج العين.

بعد كده هنعمل رتوش باللوس باودر عند عضمة الخد وبنبتدي نعملها بطريقة دائرية لغاية ما نوصل لعظمة الأذن، والرتوش دي بنعملها علشان نخفي أي عيوب في الوجه ونبرز الحاجات اللي نحب إننا نظهرها.

كمان بنعمل تشحيم لمنطقة الفكين لغاية ما نوصل لعضمة الأذن، وبكده بنصحح العيوب الموجودة في بشرتنا؛ لأننا بنلعب برضه زي ما قلنا على الظل والنور الظل الغامق بيخفي العيوب والأبيض الفاتح بيبن الحاجات الجميلة اللي عايزين نظهرها في وجهنا.

الفرش مهمة لميك أب ناجح
طبعاً الفرش مهمة جداً للميك أب الناجح، وممكن نستخدم فرشاة متوسطة أو كبيرة لتوزع اللوس باودر في المنطقة اللي تحت العين، عندنا برضه فرشاة تانية لأحمر الخدود وده بنوزعه بطريقة الدواير علشان ناخد عضمة زاوية الفكين، وماننساش طبعاً كلنا وإحنا بنحط الروجاجو ابتسامة جميلة؛ لأن الابتسامة دي هي اللي بتحدد لي شكل الروجاجو هيكون إزاي.

وعلي فكرة يا جماعة الماكياج مش مجرد إننا نقعد نحط في مستحضرات تجميل وبس.. لأ إحنا لازم نحط مستحضرات التجميل اللي تناسب بشرتنا، وطبعا كل نوع بشرة وليه ماكياج محدد فماكياج البشرة الدهنية غير البشرة الجافة غير البشرة العادية.

خطوات عمل الإسموكي آيز smoky eyes
• أول حاجة هنعملها هي أننا هنحط على العظمة اللي تحت الحاجب آي شادو لونه لؤلؤي لامع أو ممكن يكون فضي أو أبيض أو أي درجة من الدرجات الفاتحة علشان تدي تفتيح للمنطقة دي.

• هنجهز الـفرشاة باللون الغامق ونبتدي نوزع على الجفن العلوي فوق الرموش بالظبط، وأساس الأسموكي إن الـbase الأساسي بتاعه يكون باللون الأسود، حتى لو كنا هنعمله بأي لون.

• بنبتدي نوزع الأول من الداخل للخارج وبعدين ندخل على زاوية العين ونبتدي نظبط المقاسات اللي علي أساسها هنظبط بيها دوران الإسموكي وبالتدريج بنسيح اللون، وعلي فكرى الإسموكي بيناسب كل العيون وخصوصاً العيون اللي زي الموديل اللي معانا اللي منطقة الجفن فيها واسعة وكبيرة لأنها بتكون حلوة في الرسم، وحتى العيون الضيقة بتكون مناسبة معاها.

• هنجيب قلم الكحل ولأن الموديل اللي معانا عيونها واسعة فهنستخدم قلم كحل أسود علشان يقوي النظرة، أما بالنسبة للعيون الضيقة فأنا بانصحكم إننا مانستخدمش القلم الأسود نهائياً جوه العين ونحط أي لون فاتح جوه العين.

في رسم الحواجب نبعد عن الأسود
بعد ما ننظف الحواجب بمشط الرموش أو بفرشاة الرموش ونبدأ نتقل على الحواجب.. وفي المرحلة دي بنبعد نهائي عن اللون الأسود الصريح، ونستخدم البني وبنحطه على شكل نقط بسيطة جداً وده علشان اللون ما يكترش معانا ويغير شكلنا تماماً وبنبتدي نوزعه ونسيحه بعيدان القطن الصغيرة.. ويا ريت نحاول دايماً ما نبعدش عن شكلنا الأساسي.

الآي لاينر
جينا دلوقتي لمرحلة وضع الآي لاينر وبلاش نشد الجفن وإحنا بنعمل الآي لاينر نهائياً، لأن شد الجفن هيخلي الرسمة نفسها مش مظبوطة ومش دقيقة وهتخلي خط الآي لاينر يطلع متعرج.

الرموش الصناعية
أما في المرحلة الأخيرة في ماكياج العيون فممكن فيها أننا نلزق رموش صناعية، بس بشرط أننا نجيب الرموش المتناسبة مع عينينا ولون بشرتنا وما تكونش طويلة قوي.

أما لو كانت رموشنا حلوة فيفضل إننا نستخدم ماسكرا كويسة وممكن كمان نستخدم الماسكرا اللي بتطول وتكثف في نفس الوقت كبديل عن الرموش الصناعية، وعلى فكرة لو كنا خارجين الصبح يبقى نستخدم الماسكرا اللي هتطول فقط لأنها بتدي مظهر طبيعي أكثر.

طريقة توزيع أحمر الخدود
هنوزع البلاشر “أحمر الخدود” ولازم ناخده بزاوية طولية لغاية الودن وما بناخدوش زي ما البنات بتعمل وتحطه على خدودها ومناخيرها ودقنها ومنطقة الجبهة، لأ إحنا بناخده بزاوية لغاية الودن علشان يدي سحبة للوش ويرفعه.

ماكياج الشفايف
هندخل بعد كده على مرحلة الروج بس لازم نستخدم قلم التحديد لتحديد الشفايف ويا ريت القلم يكون طري مش ناشف علشان ما يتسببش في تشقق للشفايف، وبعد كده بنحط الروج وفي آخر مرحلة بنحط الجلوس أو ملمع الشفايف.

وعلى فكرة يا جماعة أهم حاجة في الماكياج هي استخدام خامات كويسة ومعروفة؛ لأن الميك أب إما بيظبط وشك أو بيضره ويهد كل حاجة عملتيها، وبأؤكد إن مافيش قواعد ثابتة للميك أب لأن المفروض إنك تشوفي بشرتك وشكل وشك محتاج لإيه؟!

ودي كانت آخر حاجة معانا النهارده، ونتمنى إن إحنا نكون عملنا حاجة كويسة وجميلة، فهمتوا بيها طريقة الميك أب مع الماكييرة الجميلة “سحر شلبي”.

                                                 كنا سعداء معاكم النهارده…
                 اتمنى إنكم تتفرجوا على الفيديوهات وتتعلموا الخطوات بسهولة وبساطة…
                                                      ميرسي “إيمان أيوب”…