موضوعات سابقة
ارسل الموضوع لصديقنها كامل
يا ترى نفسك تخسي..!! ومش عارفة تبدأي ازاي؟...!! أو مترددة وقلقانة تروحي لدكتور يحرمك من "الشيكولاته" و"البيتزا" و"الشيبسي" و"البيبسي" وكل اللي نفسك فيه..!! وزنك زاد ومش عارفة تلبسي حاجة تناسب سنك..!! بتنهجي وانت ماشية أو لما تطلعي سلم..!! يا ترى جربتي أكتر من ريجيم والحكاية برضه مش نافعة..! يا ترى بعد عذاب الريجيم والحرمان رجعت "ريمة لعادتها القديمة" واللي خسيتيه في شهور رجعتيه وأكتر في أسبوعين..!!
أسئلة كتيرة ومشاكل أكتر بتواجهنا
لما بنقرر نعمل "ريجيم"..!
وعشان نبدأ "صح" و"بجد"
كان من المهم إننا نستضيف
الدكتور "محمد أبو الغيط"
الأستاذ بكلية الطب جامعة القاهرة
وسكرتير عام الجمعية المصرية
الطبية لدراسة السمنة..
والمنضم حديثا إلى فريق "بص وطل"
ليرد على أسئلة قرائنا الأعزاء
وهانرفع معاه شعار
"اخسر وزنك تكسب صحتك"..
مشكلتي أن الريجيم متربط عندي بالصداع والدوخة وقلة التركيز وبمجرد التفكير في الريجيم تظهر هذه الأعراض فوراً... الإحساس بالجوع في حد ذاته يزعجني جدّاً... عشان كده مش عارفة أبدأ خالص وكل مرة تنهار إرادتي من أول أسبوع؛ لأن الحياة بتتوقف عندي تماماً.. إيه الحل؟ على فكرة وزني بيزيد أكتر كل ما أفكر في الريجيم.. إيه الحل؟؟
ومن الحاجات اللي بتخليني أبطل ريجيم إن وجهي "بيصفر" قوي وجسمي بيفضل زي ما هو.. بجد أنا في مشكلة!!!
د.م
عزيزتي بجد مفيش مشكلة، وتعالي نتكلم جد في الموضوع واحدة.. واحدة..
الإحساس ده طبيعي جدّاً.. الصداع، عدم التركيز، الدوخة، وخاصة مع الأسبوع الأول في الريجيم؛ لأن الجسم بيكون متعود على عدد معين من السعرات الحرارية، وهو في الغالب لا يستمر مع المريض طويلاً وبيختفي بنسبة 70% مع الأسبوع الثاني زي أول أيام الصيام شوية شوية الجسم بياخد على النظام الجديد ويتكييف معاه...
لكن لو الموضوع استمر بعد الأسبوع الأول ممكن في هذه الحالة الكشف عن نسبة الأنسولين في الجسم؛ لأن اختلال النسبة عن الحد الطبيعي يسبب هذه الأعراض ولازم متابعة مع متخصص في علاج الغدد الصماء.
ولكن القاعدة الأساسية من المفترض أن يكون الريجيم متوازناً يحتوي على كل العناصر الغذائية التي لا تسبب الشعور بأعراض الإعياء.. أحياناً المريض بيمشي على نظام قاسٍ يفوق الحد المسموح به عشان يخسّ بسرعة، فيحصل له أعراض مشابهة أكتر زي فقدان التركيز أو الدوخة أثناء القيادة أو السباحة.
"اصفرار الوجه"، و"سوء حالة الجلد أو الشعر" مع الريجيم مرتبط بنقص الفيتامينات والماء والمعادن والأملاح في الجسم بشكل عام، عشان كده الريجيم الصح لازم يكون فيه سلطة وخضار وفاكهة كتير مع شرب المياه بكميات، مع الاستعانة بفيتامينات خارجية تساعد المريض على الحفاظ على نضارة الوجه والجلد والشعر. من الحاجات المهمة مع الريجيم الراحة والنوم وقتاً كافياً.
كمان الحكاية لها علاقة بنوع الريجيم ولا ننسى إن الدهون الموجودة في الوجه هي أسرع دهون بتنزل في الجسم وأول دهون بتتكون بعد ترك الريجيم...
ومع بداية الريجيم أول تعليق من الناس "هو إنت عيان؟" عشان فيه اعتقاد راسخ عند الناس إن المرض هو اللي يؤدي إلى فقدان الوزن مع إن الطب أثبت العكس.
بدأت أشعر بتعب في معدتي بعدما بطلت ريجيم ولما باطلع السلم بانهج وباشعر بغثيان ورغبة في التقيؤ.. هل ده بسبب الريجيم؟ وهل محتاجة أعرض حالتي على طبيب باطنة؟.. أعمل إيه؟
"زينة"
اطمني يا "زينة" إن شاء الله مفيش مشكلة؛ لأن ده طبيعي ووارد يحصل مع الناس اللي بتعمل ريجيم لمدة طويلة وده مؤشر إيجابي وفي صالح المريض، ومعناه إن المعدة خلاص غير قادرة على التعود على طبيعة الأكل السابقة يعني الأكل المحمّر التقيل، وتعودت على الأكل الصحي الخفيف قليل السعرات الحرارية ورافضة للنظام القديم الدسم.
لكن لو المعدة استمر فيها الألم بالرغم من الاستمرار في الأكل الصحي هنا أكيد فيه مشكلة في الجهاز الهضمي، ولازم استشارة طبيب باطنة متخصص في الجهاز الهضمي والتعب في المعدة في هذه الحالة ليس له علاقة بالريجيم.
ومشكلة النهجان عند طلوع السلم لها علاقة بالوزن الزائد كأنه شايل على ظهره شنطة طول الوقت مليانة حديد وبيطلع السلم بيها تخيل المجهود اللي بيبذله القلب والألم بالركبة سببه السمنة.. الريجيم هنا مهم وحتمي.
كل كيلو المريض بيفقده من وزنه يوازي تخفيف أربعة كيلو من على حمل الركبة والمفاصل.
ماما معترضة على الريجيم وبتقول إنه ممكن يأثّر على قدرتي على الإنجاب في المستقبل إن شاء الله يا ترى ده صح أفيدوني..!!
"نونا"
"نونا" ماما بتخاف عليك زي كل الأمهات.. وده قلق طبيعي لكن مهم نعرف معلومة مهمة قبل ما نعمل أي حاجة: الريجيم المتوازن لا يؤثر على الإنجاب.. لكن ممكن يؤثر لو كان قاسي جداً بمعنى إن فقدان الوزن مرة واحدة وبشكل مفاجئ -البنت تخس بدرجة كبيرة تفوق الحد المسموح به- ممكن التبويض يتأثر وتضطرب الدورة الشهرية مما يؤثر على الإنجاب.. التطرف في الريجيم مرفوض، ويؤثر بالسلب على الإنجاب. يعني لو كان معامل كتلة الجسم عند البنت أقل من 18.5 معناه إنها قد تكون عرضة لمشكلة في المستقبل.. كمان الزيادة في الوزن تؤثر على المبيض، ولها آثارها السلبية على القدرة على الإنجاب في المستقبل، لذا الاعتدال مطلوب في كل شيء.. الحل الريجيم المتوازن عشان تخسري وزنك وتكسبي صحتك..
موضوعات سابقة
:: ازاي أثبت وزني... ليه بارجع اتخن من الأول؟!!
:: جراحات السمنة:: أدوية الريجيم.. أرجوك لا تأخذ هذا الدواء.....!!!!
:: احسب وزنك بطريقة سهلة وقرر... "بس بسرعة"..!!
