نادية نور

أنا عندي 20 سنة ويشاء القدر أن أحب ويحدث بيننا لقاء ونتعرف على بعض. حبينا بعض واتخطبنا وحصلت مشكلة مع الأهل وللأسف انفصلنا بس هو محاولش يصلح أي حاجة.. كرامته فوق أي شيء حتى لو كان هايموت على الحاجة.

والمشكلة إني مش قادرة أنساه حتى بحاول مفكرش فيه بحس إني بدور عليه في كل مكان وبشوفه في المكان اللي كان بيجلس فيه في بيتنا، وهو عندنا بفتكره بيه، ومش عارفة أوافق على أي حد بيتقدم لي.. زهقت واتخنقت ومش عارفة أعمل إيه بكتب كل يوم شعر بس ليه بمسك صورته وأتأمل فيها كتير؟

أنا تعبت ومش عارفة أرتاح.. نفسي نرجع لبعض وعارفة إن ده مستحيل بس الأمل عايش جوايا. حد يقول لي أعمل إيه؟ أنساه ازاي؟ أطلع من اللي أنا فيه ازاي بجد؟ حتى دراستي أهملت فيها وحاسة إن كل حاجة راحت وأغلى حاجة عندي راحت خلاص مش فارق معايا أي حاجة.. نفسي أبطل التفكير فيه لأني فعلا مش مستحملة

M

المدهش جدا أنك تعرفين أن الرجل كرامته فوق كل اعتبار وأن ما حدث بينه وبينكم قطع كل الخيوط التي كانت تربط بينكم فلماذا الجري وراء السراب ولا تعذيب النفس أصبح هواية؟! لماذا لا تكونين مثله كرامتك فوق كل اعتبار ومادام مشكلة بسيطة أو كبيسة أنسته الحب والود اللي كان ليه احنا كما ما ننساش واللي يبيعك بيعه؟! لماذا التمرغ في الأرض والبكاء على اللبن المسكوب حيث لا يمكن جمعه من على الأرض ولن يصلح للاستعمال؟!

الحقي نفسك وحاولي أن تستردي عقلك وإرادتك وحبك لواحد لا يستأهل هذا الحب. واحد ما صدق تحصل مشكلة ويجري وكأن شيئا لم يكن.

أفيقي قبل ما تخسري نفسك وعقلك وأيامك وتتحولي لمريضة نفسية أو عقلية والعياذ بالله. قولي لنفسك إنه حرم روحه من قلب كان يحبه ومستعد يسعده وإنه لو كان يستحق قلبك وكل هذا الحب لاحتمل المواقف من أجل هذا الحب. حرام تقتلي نفسك عشان واحد لا يستحق، قدر يدوس على قلبه في سبيل كرامته.

فين أنت كرامتك وعقلك ونظرتك للمستقبل؟؟ عسى أن يرزقك الله بزوج أحسن منه.