هدى كامل

أنا كنت مرتبطة بشخص وكنت عارفة عنه حاجات كتير هو كان بيعملها وكنت راضية. واتحديت ناس كتير من أصحابه عشانه بس فيه واحد صديقه جدا قال لي إني لازم أبعد عنه لأنه بتاع كلام وبس وقال لي إنه اتكلم معاه واكتشف إنه مش جد خالص وبيتسلى بي.

بس أنا متأكدة من عكس الكلام ده المهم إنه تغير خالص دلوقتي، بس المشكلة إن فيه فترة احنا بعدنا عن بعض جدا أثناء الفترة دي أنا ارتبطت بشخص محترم جدا وسألت عنه ناس كتير كلهم أجمعوا على إنه شخص كويس ومحترم وجد. وهو حاليا بيحبني جدا جدا..

أنا مش عارفة أعمل إيه أختار اللي بحبه واتغير عشاني ولا اللي بيحبني ومحترمني جدا في غيابي وعلى عكس الآخر لا يتذكرني في غيابي؟؟

g.

صديقتي العزيزة:

في بداية رسالتك بدأتِ حكايتك مع الشخص الأول بكلمة "كنت"، وزي ما كلنا عارفين إنها بتدل على الماضي، يعني فعل حصل وانتهى، ده في البداية، وبعد كده ذكرت إنك كنتِ بتحبي الشخص ده برغم معرفتك التامة بإنه إنسان مش مظبوط وبيعمل حاجات كتير مش كويسة، وبرغم معرفتك دي إلا إنك حبتيه وفضلتِ معاه، وده من الجايز يحصل لأن الحب مش بإيدينا ومراية الحب عامية –زي ما بيقولوا-.

لكن الغريب فعلا إنك بعد ما تختلفوا وتقدري تبعدي وتفترقوا إن إنتِ اللي تحاولي تربطي نفسك تاني بشخص إنتِ عارفة عيوبه، وبرغم كده ما صدقتيش صاحبه لما حاول ينصحك وقلتِ إنك متأكدة من إنه ما يعملش كده، مع إنك عارفة ومتأكدة إنه ممكن يعمل حاجات كتير، وحتى بعد ما ربنا عوضك وقابلتِ إنسان تاني عكس الأول تماما، محترم ومؤدب وبيحبك جدا، وإنتِ كمان بادلتيه المشاعر دي، بعد ده كله إيه اللي يخليكِ تفكري في الماضي، ولو إنتِ بتحبيه فعلا –زي ما إنتِ فاكرة- ما كنتيش قدرتِ تبعدي عنه، وما كنتيش قدرتِ تحبي غيره، وده لأننا لنا قلب واحد بس.

ونصيحتي لك يا عزيزتي إنك تنسي الماضي طالما قدرتِ قبل كده، وما تحاوليش تعذبي نفسك بإيديكِ، وارضي بقسمتك ونصيبك، وخلي تفكيرك كله في الإنسان اللي بيحبك بجد وشاريكي... وربنا يوفقك.