هدى كامل

أنا كنت بحب بنت لكنها تركتني، وأنا ألح عليها حتى ترجع لي لكنها ترفض، وكل ما أشوف بنت أقول بس هي دي اللي هحبها عشان أنسى الأولى، وبرضه أرجع تاني أتصل بها وهي تكلمني وحش.. حتى يوم عيد ميلادي برضه هي مش هاين عليها تتصل تقول كل سنة وأنت طيب.

والمشكلة الأكبر إن أنا عرفت بنت عن طريق التليفون وهي بتحبني، وأنا حاسس إن أنا هحبها وخايف في يوم من الأيام أرجع للبنت اللي أنا كنت بحبها وأنسى التانية وأجرحها.. مش عارف أعمل إيه ولا دي عاوزة ترجع لي ولا أنا عاوز أظلم البنت التانية معايا.. أنا خلاص احترت.

K.

صديقي العزيز:

من الطبيعي والمعروف إن الإنسان يقابل واحدة ويحس إن قلبه اتحرك ناحيتها وإنه حاسس ناحيتها بمشاعر الحب، لكن اللي مش طبيعي إن الإنسان يقابل واحدة فيقرر إن هي دي اللي يحبها.

الحب يا عزيزي مالوش زرار ندوس عليه فنبتدي نحب، فالحب شعور غير إرادي بيحس بيه الإنسان غصب عنه مش بإرادته، أما الحكاية اللي بتحكيها من حبك للبنت الأولانية وبعدين بعدها عنك وبعدها البنت اللي حبيتها عن طريق التليفون، وبعدين نيتك لحب أي بنت تقابلها عشان تنسى اللي سابتك، فللأسف يا صديقي كل ده مالوش أي علاقة بمشاعر الحب الحقيقية، فاللي بيحب حقيقي ما ينفعش يغير مشاعره بين واحدة والتانية، أما بالنسبة لأملك في رجوع البنت الأولانية لك، فده مش ممكن يحصل لأنها خلاص صارحتك بأنها نسيتك.

وكان من المفروض إنك ما تضغطش عليها وتتحايل عليها وتنزل من كرامتك، فهي خلاص الموضوع انتهى بالنسبة لها، ولو ما كانش انتهى ما كانتش كلمتك بالصراحة دي وطلبت منك إنك تبعد عنها، فنصيحتي لك يا عزيزي إنك تنسى إنها ترجع لك، وإنك تفكر من جديد في طريقة حياتك وعلاقاتك، وتأكد إن كل اللي بتمر بيه ده مش مشاعر حقيقية، وإنك لسه ما قابلتش الحب اللي بجد، وربنا يهديك.