بص وطل>>> تفانين>>> جاليري

الفنان
مجدي الكفراوي

- فاكر يا "عمر" لما اتكلمنا عن الفنان "صلاح جاهين"؟...
- أيوه فاكر يا صديقي.. صحيح إنت كنت عايز تقول لي حاجة وأنا قاطعتك؟...
- بالظبط يا "عمر" كنت عايز أقول لك إن الفنان ممكن يمارس فنون كتير يعني مثلاً كل المصورين (الرسامين يعني) ممكن جدّاً يعملوا أعمال نحتية أو خزف أو جرافيك أو أي نوع من الفنون لكن الأهم من ده إن الفنون كلها بتلاقيها متكاملة، والفنون هنا بمعنى الفن البصري والحركي.. والأدب كمان زي الشعر والقصة القصيرة والرواية... يعني تعرف إن في أوربا لما كان بيبقى فيه مدرسة جديدة أو اتجاه في الرسم بيظهر كان دايماً الكُتّاب والأدباء بينظّروا لهذه المدرسة في الوقت اللي الرسامين بيبحثوا فيها بتجاربهم اللونية في اللوحات.. يعني أول ما ظهرت نظريات الضوء وإمكانية تفتيته في العلم ظهر معاه المدرسة التأثيرية أو الانطباعية في فرنسا، وفي المدرسة دي كان كبار الفنانين في فرنسا زي "كلود مونييه" و"سيورات" مهتمين في أعمالهم الفنية بتأثير نور الشمس على الأشياء...

"كلود مونييه" ده مثلاً وقف قدام كنيسة وفضل يرسم فيها طول النهار... كل ما الشمس تتغير عليها يسجل أثر الضوء على الكنيسة... علشان كده دايماً بتلاقي كل الفنون موصلة على بعضها مع العلم والأدب... كمان كتير جدّاً من الأعمال الأدبية أوحت لفناين كتير مواضيع لوحاتهم والعكس كمان حصل إن لوحات لفنانين كتير أوحت لأدباء وشعراء بالكتابة..

وبعدين لازم يكون المبدع -سيان كان أديب أو رسام- لازم يكون مطّلع ومثقف، على قدر ثقافته واطلاعه بيكون عمق العمل الفني، وبعدين الثقافة والاطلاع دول هما اللي بيعملوا المخزون البصري اللي بيغذي خيال وفكر الفنان...
علشان كده باشوفك بتقرا كتير...

ضروري جدّاً القراءة يا "عمر"؛ لأن القراءة لها متعة تانية.. بالمناسبة خد الكتاب ده إقراه وقول لي رأيك...
إيه ده؟ رواية (ساحر الصحراء) لـ"باولو كويلهو".. أنا سمعت عنها كتير... حلوة دي يا فنان؟...
راااااائعة إقراها وقول لي رأيك...