كانيلوني باللحمة.. جدّدي بوصفات المطبخ الإيطالي
عدد كبير من أصدقائنا واللي بيتابعونا دايما على "سفرة دايمة" طلبوا مننا إننا نقدّم طريقة عمل الكانيلوني
عدد كبير من أصدقائنا واللي بيتابعونا دايما على “سفرة دايمة” طلبوا مننا إننا نقدّم طريقة عمل الكانيلوني باللحمة، وتنفيذا لطلباتكم النهارده هنعرف الطريقة مع بعض، جرّبوها وابعتوا لنا رأيكم فيها.
كانيلوني باللحمة
مقادير العجينة:
- كوب دقيق
- كوب وربع لبن
- ½ ملعقة صغيرة ملح
- بيضة
مقادير الحشو:
- ½ كيلو لحمة مفرومة
- ثمرة بصل مقطّعة صغيرة
- ملعقة كبيرة ثوم مفروم
- كوب كريمة طبخ (من السوبر ماركت)
- كوب جبنة رومي أو موتزاريلا
- ¼ كوب زيت زيتون
- ملعقة صغيرة قرفة
- أوراق ريحان طازجة
- ملح وفلفل (للتزيين)
الطريقة:
1- لتحضير العجينة.. اضربي البيضة كويس، وضيفي الدقيق عليها تدريجيا، وبعد كده حطّي اللبن، وقلّبيهم كويس علشان القوام يبقى متجانس.
2- صفّي العجينة علشان تتأكدي إن ما فيهاش أي تكتّلات، وبعد كده دخّليها التلاجة لمدة نصف ساعة.
3- هاتي طاسة، وحطي فيها كمية صغيرة من الزيت على نار متوسطة، وابدئي حطّي ملعقة كبيرة من العجينة، واظبطيها بحيث تديكي شكل دائري، وسيبيها على النار لغاية ما العجينة تتماسك ولونها يحمر من تحت، وبعد كده اقلبيها على الناحية التانية، وسيبيها لغاية ما الوش ده كمان لونه يحمر، وبعد كده ارفعي الكانيلوني من الطاسة، وكرري نفس الخطوة لغاية ما كمية العجينة تخلص.
4- لتحضير الحشو.. شوّحي البصل والثوم والملح والفلفل في زيت الزيتون، وضيفي اللحمة المفرومة، وسيبيها لحد ما تستوي على نار متوسطة، وتبّليها في الآخر بالملح والفلفل والقرفة.
5- بعد ما اللحمة تستوي، ضيفي عليها نصف كمية الكريمة.
6- بعد كده هاتي كل شريحة كانيلوني، وحطّي عليها كمية معينة من اللحمة المفرومة، ولفّيها عليها بحيث تديكي شكل أسطواني، وكرري نفس الخطوة لغاية ما كمية الكانيلوني تخلص.
7- افردي نصف كمية الكريمة اللي باقية عندك في صينية، ورصّي عليها الكانيلوني، وعلى الوش حطّي باقي الكريمة، والجبنة المبشورة، ودخّلي الصينية في فرن ساخن، لغاية ما الجبنة تسيح، وبعد كده طلّعيها، وزيّنيها بأوراق الريحان أو النعناع، وقدّميها ساخنة.. وبالهنا والشفا.
خلصت وصفتنا النهارده..
استنونا كل يوم مع وصفات جديدة..
سلام،،،
