جمالك بالألوان مع "جيلان".. الرمادي موضة صيف وشتاء
النهارده هنكمّل مع بعض سلسلة الحلقات الخاصة بالاستايل والملابس، وموضة صيف 2010 وخصوصاً بالنسبة للبنات المحجبات، والنهارده معانا استايل شيك ورقيق ومناسب جداً مع الصيف والحر...
أهلاً بكل أصدقائي في “قمر 14”..
أنا “جيلان عاطف”.. النهارده هنكمّل مع بعض سلسلة الحلقات الخاصة بالاستايل والملابس، وموضة صيف 2010 وخصوصاً بالنسبة للبنات المحجبات..
والنهارده معانا استايل شيك ورقيق ومناسب جداً مع الصيف والحر…
تعالوا نشوفه مع بعض بالتفصيل…
الرمادي موضة صيف وشتاء
زي ما هنشوف في الفيديو إن الموديل لابسة لون بينك مع رمادي فاتح، والرمادي على فكرة السنة دي موضة جداً بكل درجاته من الفاتح للغامق، على الرغم من إن ناس كتير بتعتبره لون شتوي، لكن فيه منه درجات فاتحة كتير، ودي بتتناسب مع الألوان الصيفي، وكمان بيليق مع ألوان كتيرة زي الأسود والأبيض والبينك، والموديل معانا لابسة فستان قصيّر وعليه بوليرو، ومن تحت بنطلون قماش باللون الرمادي الفاتح تصميمه بسيط جداً وواسع..
شكل الفراشة موضة في الإكسسوارات
اختارنا عُقد بسيط جداً، والعُقد عبارة عن أشكال بالفراشات، وعلى فكرة شكل الفراشات موضة جداً في تصميمات الإكسسوارات السنة دي، ودخّلنا معاه عقد تاني عبارة عن أحجار رمادي ومُطعّم ببعض الكريستالات.
أما بقى الحزام، هنلاقي إن فيه كريستالات شبه اللي في العقد وألوانها ذهبي في فضي، يعني مش معنى إننا لابسين بينك في رمادي إننا لازم نلتزم بالألوان دي وبس، لكن ممكن ندخّل ألوان تانية تكون مناسبة مع ملابسنا وفي نفس الوقت تعمل إضافة وشياكة.
شنطة رمادي غامق مع الألوان الفاتحة
اخترنا صندل من الموديل الروماني بكعب صغير، والاستايل الروماني في الأحذية على فكرة موضة جداً، كمان مريح جداً في اللبس.
وبالنسبة للشنطة اخترتها رمادي غامق بحيث تكسر الألوان الفاتحة اللي الموديل لبساها، والشنطة دي كمان ممكن تليق مع الجينز.
استايل مناسب للبنت الرفيّعة من منطقة الصدر
الاستايل اللي معانا ده مناسب جداً للبنت اللي عندها منطقة الصدر صغيرة؛ لأن فيه درابيه من فوق وبيدي امتلاء وبيظبط المنطقة دي، أما الدرابيه الموجود من تحت عند الأجناب بيعمل تمويه ومش بيبيّن المنطقة دي، وبكده يكون مناسب لو بنت عندها منطقة الأجناب مليانة شوية..
والطقم ده مناسب لو إحنا خارجين الصبح أو بعد الظهر، وخاصة إن الخامات اللي موجودة فيه أقطان ناعمة وخفيفة..
وموضة الأقطان الموجودة السنة دي حلوة جداً؛ لأنها عملية وخفيفة وخصوصاً مع الحر، وكمان الكتان خفيف جداً، لكن مشكلته إنه بيتكرمش بسرعة.
وفي النهاية احب اشكر كل الناس اللي ساعدوني علشان اقدر اقدم لكم كل الجديد في موضة صيف 2010:
ملابس: “منال فلاورز” – تليفون 0108255551
إيشاربات: محل “scarfobia” – تليفون 0105246632
إكسسوار: مدام مها – تليفون 0125671899 – 0126767583
وبكده تكون خلصت حلقتنا النهارده..
لكن كلامنا عن الموضة والجمال لسه ما خلصش..
واوعي تنسي تبعتِ لنا رأيك في حلقة النهارده..
إلى اللقاء،،،
