بلكونة منزل في حي شعبي بالقاهرة

تستند الست "محسنة" على سور البلكونة، وهي تتحدث مع جارتها الست "ليلى" التي تحادثها من البلكونة المقابلة:

- ياختي سمعتي عن الراجل النمساوي ده اللي حبس بنته كام وعشرين سنة في البدروم وقعد –أستغفر الله العظيم أستغفر الله العظيم- يعمل معاها حاجات وحشة طوال المدة دي لغاية ما خلف منها -المفتري ربنا ينتقم منه- 7 عيال.. آه وربنا 7 عيال مرة واحدة.

- أيوه.. شفت صورته في التليفزيون عامل زي الشيطان.. مش عارفة والله الناس دي بتجيب كل الشر ده منين.. ربنا ماخلقناش كده أبداً.. الحمدلله أن الكلام ده حصل في بلاد بره بس ومش عندنا..

- على قولك.. الحمد لله فعلاً.. بلدنا زي الفل برضه ومافيهاش الحاجات دي.. ولو أني كنت سمعت مرة أن فيه راجل في السيدة عائشة عمل كده برضه مع بنته الصغيرة وعاملها زي مراته بس البوليس قبض عليه بدري..

- لأ ياشيخة ما تقوليش كده.. بلدنا مافيهاش القرف ده.. دي تلاقيها إشاعات بس أو أي كلام بيتقال كده في الهوا..

- أنا قلت كده برضه.. الحاجات دي لاممكن تحصل عندنا أبداً.. بس قولي لي صحيح هم عملوا إيه مع جاركم "سيد" لما قبضوا عليه بعد ما اعتدى على بنته الصغيرة اللي لسه مادخلتش مدارس؟ في السجن هو صح؟!

***

ترابيزة شيك حول حمام السباحة في نادٍ اجتماعي ورياضي راقٍ

"إلهام" هانم تتصفح مواقع الإنترنت عبر (اللاب توب)، قبل أن تشهق في شدة، وتظهر عليها ملامح الاستياء والضيق، تلمح هذا صديقتها التي تجاورها في الجلسة "منى" هانم، فيبدأ الحوار التالي:
- مالك.. إيه شفتي حاجة مقرفة قوي للدرجة دي؟
- مش هتصدقي الخبر ده.. أب سوري يغتصب ابنته الصغيرة ويبيعها بعد ذلك لبيت دعارة بـ1500 دولار

- ياساتر استر يارب.. الكلام ده فين؟ في سوريا طب إزاي؟
- مش فاهمة خالص.. مش عارفة إيه اللي بيحصل ده.. طب أوربا وقلنا الانحلال فيها على آخره لكن عندنا إحنا إزاي بس؟

- ماتقوليش إحنا.. إحنا هنا في مصر زي الفل.. مابتحصلش الحاجات الفظيعة دي أبداً عندنا
- طبعاً طبعاً.. ولو أني كنت قرأت من كام شهر كده أن فيه أب انتحر في القليوبية بعد ما مراته بلغت عنه أنه اغتصب بنتينه الاتنين اللي ياحرام عمرهم كان 4 و6 سنين بس

- لا ياشيخة ده كلام جرايد ماتصدقيش.. مصر مافيهاش الحاجات دي خلاص.. دي بلدنا زي الفل..
- أنا برضه بأقول لك.. بس قولي لي صحيح هو الكابتن "ميدو" مدرب السباحة ما عادش بيظهر ليه

- أوو نو! أنت ما تعرفيش؟ مش كانوا -أستغفر الله العظيم- ظبطوه مع بنت أخوه اللي بيدربها على السباحة.. وطبعاً طردوه من يوميها والنيابة بتحقق معاه دلوقت.. مش قلت لك بلدنا مافيهاش الحاجات دي خالص!

***

الدكتور "أحمد المجدوب" أستاذ علم الاجتماع بالمركز القومي للبحوث الاجتماعية والجنائية في تصريحات عام 2007

***

يعني زي ما أنت شايف مصر مش بيحصل فيها الحاجات دي خالص!
لاحظ أن د."أحمد المجدوب" –وهو واحد من أهم علماء الاجتماع المصريين في السنوات الأخيرة ورحل في ديسمبر عام 2007"- توصل إلى هذه النتائج والإحصائيات من خلال مقابلات مع 200 حالة تعرضت لعمليات اعتداء جنسي من الأقارب، بل إنه أصدر كتاباً عام 2003 يحمل اسم (زنا المحارم- الشيطان يسكن في بيتنا) عام 2003 عن مكتبة مدبولي فرد فيه المساحات والصفحات لرصد هذه الظاهرة المرعبة..
زنا المحارم..

أكبر مشكلة واجهته وقتها هي صعوبة التوصل إلى الحالات التي تعرضت لاعتداء جنسي من الأقارب..
لأنك عارف إن الحاجات دي حساسة جداً قد إيه في مصر..

وإذا كانت هناك حالات اغتصاب كثيرة بتقع ولا يتم الإبلاغ عنها خشية الفضيحة.. فما بالك بنفس حالات الاغتصاب دي اللي بتحصل على يد الأقارب..

بس كل اللي فات ده معناه أن اللي بيحصل في النمسا وسوريا..
للأسف بيحصل برضه في مصر!!

د."المجدوب" شايف إن الأسباب الرئيسية اقتصادية وتكدس الناس فوق بعضيهم في البيوت..

انت شايف بقى الأسباب التانية إيه؟
وشايف إيه اللي ممكن نعمله عشان نواجه الظاهرة المرعبة دي
وهل ياتري التحرك لازم يكون حكومي برضه ولا إحنا في إيدينا حاجة؟

استنى! لسه فيه سؤال مش إجباري بس مهم جداً
لو تعرف حد اتعرض لاعتداء جنسي من الأقارب.. اكتب لنا عنه..
احكي لنا إيه اللي حصل.. وإزاي بيتعايش مع الحياة بعد الواقعة دي.. وياترى بلغ الجهات المختصة ولا لأ؟..

الموضوع كبير وخطير ويستحق الكلام
بقدر كبير من الصراحة والجرأة

يمكن لو ده حصل مصر ساعتها تبقى زي الفل.. بجد!

وماتنساش تكتب رأيك