الرئيسية > صحة وجمال > سفرة دايمة > فطائر اللحمة على “سفرة دايمة”

فطائر اللحمة على "سفرة دايمة"

ممكن تقدّمي معاها سلطة طحينة أو سلطة زبادي

كتير بعتّوا لنا تسألونا على وصفات خفيفة وسريعة للأطفال وكمان مناسبة لجو الصيف، النهارده علىسفرة دايمة” هنقدم لكم وصفة جديدة وهي فطائر اللحمة، تابعونا وابعتوا قولوا لنا رأيكم فيها..

 

فطائر اللحم
مقادير
العجين:
كوب زبدة
3 كوب دقيق
2 صفار بيض
ملعقة صغيرة كركم
¾ كوب ماء مثلج
½ ملعقة صغيرة ملح

 

مقادير الحشو:
½ كيلو لحمة مفرومة
بصلة متوسطة مفرومة
3 ملعقة كبيرة زيت
2 ملعقة كبيرة ماء
¼ كوب بقسماط
ملح وفلفل
½ ملعقة صغيرة زعتر

الطريقة:
1- اخلطي الدقيق والملح والكركم واعجنيهم مع الزبدة في العجانة.

2- اخفقي الصفار مع الماء وحطيهم على العجين تدريجيا، واستمري في العجن لحد ما تبقى العجينة ناعمة.

3- لفي العجين في بلاستيك وحطيه في التلاجة لمدة نصف ساعة علشان يتماسك.

4- في الوقت ده حضّري الحشو؛ بإنك تشوحي البصل في الزيت لمدة 5 دقائق لحد ما لونه يبقى دهبي، وبعدين حطي اللحمة المفرومة، وقلّبيها مع البصل لحد ما يبقى لونها بني وبعدين حطي الزعتر وقلبيها وسيبيها لمدة 10 دقائق لحد ما اللحمة تستوي، وبعد كده تبّليها بالملح والفلفل، ولو اللحمة لسه فيها سائل ممكن تحطي البقسماط وقلّبيها وسيبيها تبرد.

5- لعمل الفطائر؛ طلعي العجين من التلاجة وسيبيها تبرد لمدة 10 دقائق، وبعد كده افردي العجين على سطح مرشوش دقيق وقطّعيه بالشكل اللي انتي تحبيه.

6- اخفقي البيض والماء وادهني به أطراف الفطيرة وحطي كمية من الحشو على أحد الطرفين، واقفلي الطرف التاني واضغطي عليه بطرف شوكة.

7- رصي الفطائر على صاج مدهون بقليل من الزيت، واخبزيه في الفرن لمدة من 30 : 35 دقيقة، وممكن تقدّمي معاها سلطة طحينة أو سلطة زبادي، وكمان ممكن تعملي مكرونة بالصوص الأبيض، وبالهنا والشفا.

 

ملحوظة:
ممكن تغيري في الحشو، مثلا سبانخ بالجبنة أو فراخ أو خضروات.

خلصت وصفتنا النهارده..
استنونا كل يوم مع وصفة جديدة..
سلام،،،

 

< >