الرئيسية > صحة وجمال > سفرة دايمة > بسطيلة بالكريمة.. شكل جديد للجلاش

بسطيلة بالكريمة.. شكل جديد للجلاش

زيّني البسطيلة بالمكسرات وسكر البودرة وقدّميها

وصفتنا النهارده هتغيّر في شكل تقديم الجلاش الحلو؛ وهي عبارة عن جلاش بالكريمة والمكسرات، جرّبوها وابعتوا لنا رأيكم فيها.

بسطيلة بالكريمة
المقادير:
10 أوراق جلاش
كوب صغير زبدة
مقدار قرفة ممزوجة مع سكر

لعمل الكريمة:
¼ كوب لبن مغلي
ملعقة كبيرة نشا
صفار 4 بيضات
¾ كوب سكر
رشة فانيليا

الطريقة:
1- أوّل حاجة جهزي الكريمة؛ وده بإنك تضربي صفار البيض مع السكر والفانيليا لحد ما يتجانسوا، وبعدين ضيفي النشا واللبن، واستمري في ضرب الخليط.

2- حطي الخليط ده على نار هادية مع التقليب باستمرار لحد ما الكريمة تبقى سميكة وناعمة، وبعدين سيبيها تبرد.

3- في الوقت ده حمّصي أوراق الجلاش، وده بإنك تدهني ورقة جلاش بالزبدة ورشي عليها خليط القرفة والسكر، وبعدين ادهني ورقة تانية بالزبدة والزقيها عليها ورشي عليها سكر وقرفة.

4- كرّري العملية بحيث تحصلي على خمس ورقات مزدوجة، وبعدين حطيهم في صينية، ودخليهم الفرن لحد ما تتحمر.

5- عند التقديم حطي ورقة مزدوجة وادهنيها بالكريمة، وبعدين حطي عليها ورقة تانية وعليها الكريمة، وكرري العملية لحد ما تخلصي أوراق الجلاش، وزيّنيها بالمكسرات وسكر البودرة، وقدّميها.. بالهنا والشفا.

 

خلصت وصفاتنا النهارده..

استنونا كل يوم مع وصفة جديدة..

سلام،،،


< >