الرئيسية > صحة وجمال > سفرة دايمة > عجة الكوسة.. طريقة جديدة ومفيدة

عجة الكوسة.. طريقة جديدة ومفيدة

ممكن تقدّمي العجة مع سلطة زبادي بالخيار

لكل أصدقائنا اللي طلبوا مننا وصفات جديدة مغذية للأطفال، بنقدّم لكم النهارده عجة الكوسة؛ يلّا بينا على المطبخ نشوف مقادير وطريقة تحضير الطبق بتاعنا النهارده…

عجة الكوسة
المقادير:

  • 2 ثمرة كوسة مبشورة
  • 3 بيضات مخفوقة بالملح والفلفل
  • 2 ثمرة بصل أخضر مفرومة
  • ½ حزمة بقدونس مفرومة
  • ثمرة فلفل أخضر مفرومة
  • 2 فص ثوم مفرومين
  • ملح وفلفل أسود
  • ½ كوب دقيق

الطريقة:
1- تبّلي الكوسة بشوية ملح وفلفل أسود، وسيبيها في مصفى لمدة ربع ساعة علشان تصفّي أي ميه موجودة فيها.

2- بعد كده اخلطي باقي المقادير مع الكوسة.

3- سخّني الزيت علي نار هادية، وحمّري الخليط السابق على شكل أقراص صغيرة؛ وسيبيها في الزيت لمدة 5 دقائق أو لغاية ما لونها ما يبقى دهبي، وبعد كده ارفعيها على مناديل ورقية علشان تتشرّب الزيت اللي فيها.

4- وتقدري كمان تعملي العجة دي بطريقة تانية بإنك تصبّي الخليط في صينية مدهونة بالزيت، وتدخّليها في فرن ساخن وتسيبيها لغاية ما العجة تتماسك وبعد كده طلّعيها وقدّميها.. وبألف هنا وشفا.

وبكده تكون خلصت وصفتنا النهارده..
يا ريت تجرّبوها وتبعتوا تقولوا لنا على النتيجة..
واستنونا بكره مع وصفة جديدة..
سلاااااااام،،،

 

< >