الرئيسية > صحة وجمال > سفرة دايمة > فطير مشلتت على “سفرة دايمة”

فطير مشلتت على "سفرة دايمة"

قدّمي الفطير مع العسل الأسود والجبنة القديمة

بناء على طلب كتير منكم؛ هنقدّم لكم النهارده على “سفرة دايمة” طريقة عمل الفطير المشلتت بطريقة سهلة جدا، جرّبوها وابعتوا لنا رأيكم فيها.

فطير مشلتت
المقادير:
1/ 2 كيلو دقيق
رشة ملح
1 كوب ماء
1/ 4 كيلو سمنة طرية
50 جم قشطة

الطريقة:
1- حُطّي الدقيق والملح، واخفقيهم بالعجانة أو بالمضرب الكهربائي على سرعة منخفضة، وضيفي عليهم الميه تدريجيا.

2- بعد كده علّي السرعة، واستمرّي في الخفق لحد ما العجينة تتعجن كويس، بس ماتكونش طرية أوي، ولونها يبقى أبيض.

3- بعد ما العجينة تتعجن حُطّيها في طبق فيه دقيق، وغطّيها بكيس بلاستيك، وسيبيها لمدة نصف ساعة؛ علشان العجينة تريّح، وبعدين ابدئي شكّليها.

4- بعد كده رشّي الرخامة بدقيق، وافردي عليه العجينة، وتكون رفيعة أوي بسُمك 1 سم، وبعدين وزّعي عليها السمنة في كل أجزائها؛ بحيث تبقى متغطية بالسمنة كويس.

5- لفّي العجينة رول بس بحرص، وبعدين لفي الرول على شكل حلزوني، ولما توصلي للطرف التاني حطّيه تحت العجينة، وبعدين خديها وحطّيها في صينية، وسيبيها لمدة نصف ساعة.

6- بعد كده اضغطي على الفطير بهدوء لحد ما يتفرد في الصينية، وبعدين ادهنيه من فوق بالقشطة، ودخليه الفرن على درجة حرارة 220 لمدة 25 دقيقة؛ لحد ما يبقى لونه دهبي، وقدّميه مع العسل الأسود والأبيض والجبنة القديمة.

ملحوظة: لو الفرن عندك مافيهوش مروحة توزيع الحرارة؛ من الأفضل إنك تسوي الفطير على النار من فوق نصف تسوية، وبعدين دخليها تحت الشواية؛ علشان تاخد اللون الدهبي.

 

خلصت وصفاتنا النهارده..

استنونا كل يوم مع وصفات جديدة..

سلام،،،


< >