الرئيسية > صحة وجمال > سفرة دايمة > شيش طاووق.. أكلة سريعة ومغذية

شيش طاووق.. أكلة سريعة ومغذية

ممكن تقدمي مع الشيش طاووق سلطة زبادي

لو عايزة تعملي أكلة سريعة وفي نفس الوقت مغذية وشهية، وكمان تقدري تقدّميها لأطفالك وتعجبهم، جرّبي معانا النهارده على “سفرة دايمة” الشيش طاووق، وماتنسيش تبعتي لنا رأيك فيها.

 

شيش طاووق
المقادير:

  • كيلو صدور فراخ مقطّعة مكعبات
  • 6 فصوص ثوم مفروم
  • ملعقة كزبرة مطحونة
  • ملعقة زعتر ناشف
  • عصير 4 ليمونات
  • 1/ 4 كوب زيت
  • ملح وفلفل

 

لتحضير أسياخ الشيش طاووق:

  • طماطم مقطّعة مكعبات
  • فلفل أخضر مقطّع مكعبات
  • بصل مقطّع مكعبات
  • أسياخ خشب

 

الطريقة:
1- تبّلي صدور الفراخ بالثوم والزعتر والملح والفلفل والزيت والكزبرة وعصير الليمون، وسيبي الفراخ في التتبيلة لمدة ساعتين، وممكن تحضّري الفراخ من بالليل وتعمليها تاني يوم.

2- حضّري الأسياخ بإنك ترصّي قطعة الفراخ في السيخ وبعدها الطماطم والبصل والفلفل الأخضر، وهكذا لغاية ما الكمية تخلص.

3- بعد ما تجهزي أسياخ الشيش طاووق، دخّليها الفرن، وشغّلي الشواية وسيبيها لغاية ما الفراخ تستوي.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،

 

< >