الرئيسية > صحة وجمال > اخسر وزنك > عن المشي بعد الأكل وحليب الصويا.. يحدّثنا د. أبو الغيط

عن المشي بعد الأكل وحليب الصويا.. يحدّثنا د. أبو الغيط

المشي لمدة ساعة بيحرق من 200 : 300 سعر حراري

السلام عليكم ورحمة الله وبركاته.. أنا على طول متابعاكم وفعلا إنتم أجمد موقع، وأنا كان عندي استفسار.. أنا دلوقتي عاملة ريجيم والغدا بتاعي بيبقى الساعة 5، وبعد الغدا بالظبط بانزل أمشي ساعة، وأنا سمعت إن المشي بعد الأكل مباشرة غلط.

هل الكلام ده حقيقي؟ ويا ترى أنا باحرق كام سعر حراري في الساعة؛ لأن واحدة قالت لي إنتي بتحرقي في الساعة مقدار ملعقة زيت؟!! فهل معقول أنا بامشي ساعة وباخسر مقدار ملعقة بس؟ وشكرا للإفادة.

بسكوتة مدورة

صديقتنا العزيزة.. معلقة الزيت بتحتوي على 15 أو 20 سعرا، لكن المشي ساعة بيحرق من 200 : 300 سعر حراري، وده بيختلف من شخص للتاني طبعا، وبيفرق كمان حسب نوعية المشي.

أما بقى بخصوص سؤالك إن كان المشي بعد الأكل مضر ولا لأ؛ فالمشي بعد الأكل غير مضرّ، وإن كان بعد أكلة دسمة ممكن يبقى مضر، وعموما أنا بافضل إن المشي يكون بعد الأكل بساعة أو ساعتين.

 

************

 

السلام عليكم.. أنا سؤالي عن حليب الصويا وتأثيره على الوزن.. سمعت إنه بيزوّد الوزن، وكنت بافكر أستخدمه؟

رانيا

 

 

منتجات الصويا مفيدة جدا ومش مضرة ولا بتزوّد الوزن ما دام إنك مش بتاخدي منها كمية كبيرة.

 

************

 

إزي حضرتك يا دكتور.. أنا كان وزني 78 كيلو وطولي 159 سم.. عملت ريجيم وخسيت 4 كيلو في أول أسبوع، وبعدين ماخسّتش تاني عملت يوم مفتوح ورجعت للدايت برضه ماخسّتش دلوقتي بقالي شهر، وبرضه مش عارفة أخس، وزفاف أختي بعد شهر، والمفروض أخس 14 كيلو.. أعمل إيه لأني قصيّرة وعايزة ألبس فستان؟ أنا عندي 24 سنة يا ريت تساعدني أنا باكل حاجات بسيطة وماباخسّش وباشتغل كاشير فبابقى قاعدة طول اليوم، ولما باروّح ما باقدرش أعمل أي رياضة.. شكرا،،،

مروة

صديقتنا العزيزة.. إنك تخسّي 4 كيلو في أول أسبوع؛ فده معناه إنك كنتي ماشية على نظام قاسي شوية، وده طبعا غلط؛ لأنك مش هتعرفي تخسّي بعد كده، والأفضل إنك تبدئي من جديد مع ريجيم صحي ومتوازن يكون مناسب معاكي ومع طبيعة جسمك.

في انتظار تعليقاتكم وأسئلتكم..
سلام،،،