الرئيسية > صحة وجمال > اخسر وزنك > عايز أخس بس مشكلتي ظروف شغلي.. أعمل إيه؟

عايز أخس بس مشكلتي ظروف شغلي.. أعمل إيه؟

تناول طبق السلطة مع الأكل أساسي علشان تشعر بالامتلاء

أهلا “بص وطل”.. أنا عايز أعرف من د. محمد إزاي أضبط وزني، أنا وزني 100 وطولي 159، ومشكلتي إن نظام ومواعيد شغلي بتخليني آخد وجبتي الأساسية بالليل، وأنا عايز أعرف أعمل إيه، وهل ممكن أخس تاني؟

mohammed

صديقنا العزيز..

فيه أوقات بنكون محتاجين نفصّل الريجيم على كل شخص حسب ظروفه، يعني في حالتك زي ما بتقول أنت بتاخد وجبتك الأساسية بالليل علشان ظروف شغلك على الرغم من إن ده أسلوب حياة غير سليم، لكن إذا كانت الظروف لا تسمح إلا بكده، فلازم تعرف إزاي تنظّم أكلك، ودي بعض النصائح:

- الوجبة اللي هتاخدها بالليل، لازم تكون كمية السعرات اللي فيها قليلة؛ حتى إن كانت كمية الأكل كبيرة، وطبعا طبق السلطة أساسي؛ لأنك ممكن تاكل منه كمية كبيرة علشان تشعر بالامتلاء.

- تناول بعض ثمرات الفاكهة، ويفضّل إنها تكون فاكهة ناشفة؛ زي التفاح أو الكمثرى، قبل ميعاد وجبتك الأساسية بساعتين؛ يعني لو هتاخدها الساعة 10 يبقى تاكل الفاكهة الساعة 8؛ ودي حيلة بنعملها علشان وقت الأكل نشعر بالامتلاء، وما يبقاش عندنا  نقص في نسبة السكر في الدم، وبالتالي بتاكل بالليل وجبتك الأساسية بس بكمية أقل.

- شرب المية قبل وأثناء الوجبة من الحاجات المهمة اللي بتخلينا نشعر بالشبع بسرعة، مش زي ما ناس كتير بتفتكر إن شرب الميه أثناء الأكل بيعمل كرش؛ لكن بالعكس ده بيساعد على التخسيس.

وبالخطوات البسيطة دي هتقدر تاخد وجبتك من غير قلق؛ لكن طبعا يفضّل إننا ما ناكلش وننام على طول، لكن نحاول نبذل بعض المجهود أو نمارس رياضة خفيفة أو نمشي شوية.

السلام عليكم.. أحب أسأل دكتور محمد..

أنا طولي 163 ووزني 85، ومش عارفة أخسّ خالص، أنا كان وزني 60 لفترة طويلة؛ لكن فجأة تخنت، وحصل لي مشكلات في الغُدّة الدرقية، ومن ساعتها مش عارفة أخس تاني.

أنا باخد التروكسين 50 لمدة 5 أيام في الأسبوع، هل فيه طريقة أقدر أخس بيها أو أي ريجيم أقدر أمشي عليه ويجيب معايا نتيجة؟ وشكرا جدا ليكم.

R.O

صديقتنا العزيزة.. فيه ناس بيكون سبب السمنة عندها مجرد أكل أو نظام غذائي خاطئ، أو استعداد وراثي للتعرض للسمنة، وفيه ناس بيبقى عندها مرض قد يؤدي إلى السمنة.

وبالنسبة لحالتك، فسبب السمنة عندك هو ضعف أداء الغدة الدرقية، والدواء اللي بتاخديه بيعمل على ضبط مستوى الهرمون اللي بتفرزه الغدة الدرقية في الدم.

ومع العلاج ولما نسبة الهرمون ترجع لمستواها الطبيعي في الدم؛ هتلاقي وزنك بيرجع مرة تانية لطبيعته.

وده معناه إنك محتاجة ترجعي لدكتور الغدد، وتعملي بعض التحاليل؛ علشان تتأكدي إن مستوى الهرمون أتضبط في جسمك، وبعد كده تمشي على نظام غذائي مناسب.

 

< >