ماسكات طبيعية لعلاج البقع والنمش

15 يناير'13, 10:11 صباحًا

أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"، والنهارده هنعمل ماسكات للبشرة الجافة

أهلا بكل بنات “قمر 14” في حلقة جديدة من حلقات “جمالك من الطبيعة مع رانيا”، والنهارده هنعمل ماسكات للبشرة الجافة وماسكات للتخلّص من البقع والنمش والكلف..

كريم زيت الكافور لآلام الظهر والمفاصل
المقادير:
30 مللي زيت كافور
ملعقة صغيرة زيت زيتون
ملعقة صغيرة زيت حبة البركة
ملعقة صغيرة فازلين أو لانولين

الطريقة:
سيّحي الفازلين أو اللانولين على نار هادية وضيفي عليه باقي الزيوت، وقلّبيهم مع بعض على نار هادية، وبعد كده احتفظي بالخليط ده في برطمان زجاجي.

وممكن تدهني الكريم ده على جسمك كل يوم بعد ما تاخدي حمامك بالليل.

ماسكات الشاي الأخضر لبشرة أكثر نضارة

الشاي الأخضر من الحاجات المفيدة جدا لصحة الجسم، بالإضافة إلى إنه بيدخل في ماسكات كتيرة جدا لنضارة البشرة، والنهارده إحنا هنعمل ماسكات بالشاي الأخضر تناسب كل أنواع البشرة..

الشاى الأخضر للبشرة الجافة

المقادير:

ملعقة صغيرة شاي أخضر مطحون

½ ملعقة صغيرة لبن بودرة

ملعقة صغيرة مية

الطريقة:

اخلطي الشاي مع اللبن وقلّبيهم كويس، وبعد كده اعجنيهم بالمية، وافردي العجينة دي على بشرتك وعلى منطقة العيون، واسترخي لمدة ربع ساعة، وبعد كده اغسلي وشك.

الشاي الأخضر للبشرة الدهنية والمركّبة

المقادير:

ملعقة شاي أخضر مطحون

عصير نصف ليمونة

ملعقة مية صغيرة

4 : 5 نقط زيت بندق

الطريقة:

ضيفي على الشاي عصير الليمون والمية، وممكن تستبدلي عصير الليمون بعصير البرتقال.

افردي الماسك ده على وشك وسيبيه من ساعة إلى ساعتين، وبعد كده اغسلي وشك بالمية العادية، وفي النهاية ادهني بشرتك بزيت البندق.

ماسك الكوسة لنعومة البشرة

المقادير:

ثمرة كوسة مبشورة

الطريقة:

اغسلي وشك كويس أوي بالمية العادية، وبعد كده حطّي الكوسة المبشورة على بشرتك مع عمل مساج خفيف بأطراف أصابعك، وسيبيه لمدة من 15 : 60 دقيقة، وبعد كده اشطفي وشك.

ماسك الجلسرين والعسل للبقع والبثور

المقادير:

ملعقة صغيرة عسل نحل

¼ ملعقة صغيرة جلسرين

¼ ملعقة صغيرة زيت العنبر

ملعقة صغيرة سبرتو أبيض

الطريقة:

دوّبي العسل والجلسرين وزيت العنبر على نار هادية، وبعد كده ارفعي الخليط من على النار، وضيفي عليه السبرتو، وقلبيهم كويس أوي، وبعدين صبّي الخليط في زجاجة وحطّيه في التلاجة، واستخدمي الماسك ده على بشرتك بشكل يومي بعد ما ترجي الزجاجة كويس، وممكن تستمري عليه لمدة شهر علشان تلاحظي النتيجة.

ماسك الفجل للنمش والبقع والكلف
المقادير:
ثمرة فجل أحمر
زيت لوز مر

الطريقة:
ابشري الفجل، وبعد كده افركيه على مكان النمش أو البقع، وسيبيه على بشرتك لمدة ربع ساعة، وبعد كده اغسلي وشك بالمية العادية، وبعدين ادهني وشك بكمية صغيرة من زيت اللوز المر، وبتستخدمي الماسك ده على بشرتك يوم ويوم.

ولو كانت البقع قوية بتستخدمي الفجل الأبيض بدل الفجل الأحمر، وبتعملي الماسك ده بشكل يومي لمدة شهر على الأقل.