الرئيسية > صحة وجمال > قمر 14 > مع رانيا.. تألقي في الربيع ببشرة صافية كلها نضارة

مع رانيا.. تألقي في الربيع ببشرة صافية كلها نضارة

استقبلي شم النسيم ببشرة صافية وناعمة

أهلا بكل بنات “قمر14″ حلقتنا النهارده من “جمالك من الطبيعة مع رانيا” هتكون مميزة جدا بمناسبة شم النسيم، هنعرف فيها أفكار بسيطة لتلوين بيض شم النسيم بطريقة جميلة ومختلفة، وكمان مش هننسى نقدّم لك وصفات طبيعية علشان تستقبلي عيد الربيع ببشرة جذابة وناعمة ولها رونق خاص..

 

أفكار من الطبيعة لتلوين بيض شم النسيم
هنلوّن بيض شم النسيم بطريقة بسيطة وحاجات طبيعية.

المكونات:
بيض مسلوق
عسل نحل
شاي أخضر – شيكولاتة فارماسيل – جنين قمح أو شوفان – بدرة عروسة – كركديه مطحون

الطريقة:
هنجيب البيضة وندهنها عسل ونحطّها في الشاي الأخضر ونغلفها كويس بيه، ونكمل بعد كده باقي البيض بنفس الطريقة مع باقي المكونات.

 

ماسك الخوخ والقشطة للبشرة الجافة
المقادير:
ثمرة خوخ (تكون طرية)
ملعقة كبيرة قشطة

الطريقة:
قشّري الخوخ وشيلي منه النوى واهرسيه بالشوكة كويس، مع كمية قليلة من الميه اللي نزلت منه.

اخفقي القشطة كويس، وحطّيها بعد كده على الخوخ وقلّبيهم مع بعض كويس.

حطّي الماسك ده على بشرة نضيفة لمدة ساعة وبعد كده اشطفيه بميه فاترة، وتقدري تحطّيه فوق وتحت العين، وبعدين امسحي وشك بمية ورد وممكن تحطّي بعد كده مسحة خفيفة من زيت اللوز الحلو أو المر على حسب نوع بشرتك، فالبشرة الغامقة يناسبها أكتر زيت اللوز المر أو كمية بسيطة من أي كريم مرطب.

 

ماسك لترطيب وامتلاء الشفايف
المقادير:
¼ ملعقة صغيرة خميرة طازة (أو خميرة جافة)
¼ ملعقة صغيرة بيكنج بودر
¼ ملعقة صغيرة نشا
ملعقة صغيرة زبادي بلدي

الطريقة:
اخلطي كل المقادير السابقة مع بعض كويس، وحطّيه على الشفايف لمدة 15 : 20 دقيقة، واغسليه بعد كده بميه فاترة، وبعد كده حطّي زبدة الكاكاو، وتقدري تستخدمي الماسك ده يوم بعد يوم.

ملحوظة:
الماسك ده لازم يتعمل قبل الاستخدام على طول.

 

صابون بالجلسرين لترطيب كل أنواع البشرة
المقادير:
صابونة جلسرين مبشورة
1½ ملعقة صغيرة عسل
1½ ملعقة صغيرة زيت ورد
5 ملعقة صغيرة ميه
قوالب للصابون

الطريقة:
حطّي الميه مع زيت الورد في حلة على النار وسيبيهم لغاية ما يبدأوا يغلوا، وبعدين ضيفي عليهم الصابون وقلّبيهم على نار هادية لغاية ما الصابون يسيح، وبعد كده حطّي عليهم العسل وقلّبيهم تقليبة بسيطة وارفعيه من على النار وصبّيه في القوالب وسيبيه لمدة يومين، وبعد كده تقدري تستخدميه علشان ترطبي بشرتك وتخليها رايقة وناعمة.

ملحوظة:
ماتستخدميش الصابون ولا تطلّعيه من القوالب قبل يومين، لأن قوامه هيكون زي الجل فهيكون محتاج الفترة دي علشان يتماسك.

 

ماسك لسنفرة الجلد وإعطاؤه بريق لامع
المقادير:
كيس ونص خميرة جافة
ملعقة صغيرة زيت ورد

الطريقة:
اخلطي الخميرة مع زيت الورد كويس، وحطّيها بعد كده على جسمك بعد ما تاخدي شاور، وادعكيه بالخميرة من أسفل لأعلى باتجاه القلب وسيبيه لمدة 20 : 30 دقيقة، واشطفيه بعد كده بميه فاترة، وتقدري تستخدمي الماسك ده على كل مناطق الجسم ماعدا الوش.

 

وبكده تكون خلصت حلقتنا النهارده..
استنونا في الحلقة اللي جاية..
وكل سنة وإنتم طيبين،،،

 

 

 

< >