ماسكات طبيعية لنعومة الشعر وتعطير الجسم

النهارده هنقدّم لك ماسكات طبيعية لتفتيح وتعطير الجسم، وماسكات لنعومة الشعر وعلاج القشرة

أعدّتها للنشر: آية خالد
أهلا بكل بنات “قمر 14” في حلقة جديدة من “جمالك من الطبيعة مع رانيا”، والنهارده هنقدّم لك ماسكات طبيعية لتفتيح وتعطير الجسم، وماسكات لنعومة الشعر وعلاج القشرة..

ماسك الأرز لتفتيح البشرة والتخلص من التجاعيد
المقادير:
ملعقة كبيرة أرز مطحون
¼ ملعقة صغيرة زيت ورد
ملعقة صغيرة لوز مطحون
ملعقة كبيرة عسل
ملعقة كبيرة دقيق
¼ كوب لبن
¼ كوب ماء

الطريقة:
– اخلطي الدقيق والأرز المطحون مع بعض، وضيفي عليهم العسل، وقلبي الخليط مع بعضه كويس، وضيفي اللوز المطحون وزيت الورد واللبن، وقلبيهم مع بعض لحد ما يبقى مزيج متجانس.

– حطي الماسك ده على وشك ما عدا منطقة العينين، وعلى رقبتك، لمدة ساعة واشطفي وشك، وكرريه مرتين أو تلاتة في الأسبوع.

زيت بالفواكه لترطيب وتعطير الجسم
المقادير:
ملعقة كبيرة زيت مشمش
ملعقة كبيرة زيت العنب
ملعقة كبيرة زيت ليمون
ملعقة صغيرة فازلين

الطريقة:
– اخلطي الزيوت مع بعضها، وممكن تستخدميها بالصورة دي بأنك تحطيها على ليفة الاستحمام مع الصابون أو الشاور جيل، وهتلاحظي إنها بتسيب ريحة جميلة بتفضل في جسمك لوقت طويل.

– دوبي الفازلين على نار هادية جدا، وضيفي عليه خليط الزيوت، ولما يبرد ممكن تستخدميه كلوشن للجسم يوميا، بعد الاستحمام أو قبل النوم.

ماسك حبة البركة للتخلص من القشرة
المقادير:
ملعقة كبيرة مطحون حبة البركة
ملعقة صغيرة زيت حبة البركة
ملعقة صغيرة زيت بذر الكتان
ملعقة صغيرة عسل

الطريقة:
– اخلطي زيت حبة البركة وزيت بذر الكتان ومطحون حبة البركة والعسل مع بعض كويس أوي، وبعد كده حطيها على جذور شعرك، واعملي بيها مساج لفروة راسك، وسيبيه على شعرك لمدة نص ساعة أو ساعة إلا ربع، وبعدها اغسلي شعرك بمية دافية، وكرريه مرتين في الأسبوع.

ماسك الزبادي لشعر ناعم وطري
المقادير:
3 ملعقة كبيرة زبادي
3 ملعقة كبيرة زيت سمسم

الطريقة:
– اخلطي الزبادي وزيت السمسم مع بعض وقلبيهم لمدة دقيقة لحد ما يمتزجوا ومايبقاش الزيت طافي على الوشّ.

– اشطفي شعرك بالشامبو، وبعدها حطي عليه الماسك، لمدة ساعتين أو 3 ساعات، وكرريه على الأقل مرة في الأسبوع، والماسك ده بيغمق لون الشعر، وبيطرّيه جدا وينعّمه.

وبكده تكون خلصت حلقتنا النهارده..
استنونا في الحلقة اللي جاية..
سلام..