الرئيسية > صحة وجمال > قمر 14 > مع رانيا.. وصفات طبيعية للتخلّص من رائحة العرق

مع رانيا.. وصفات طبيعية للتخلّص من رائحة العرق

جمالك من الطبيعة مع رانيا

أهلا بكل بنات “قمر 14″ في حلقة جديدة من “جمالك من الطبيعة مع رانيا”، والنهارده هنقدّم ماسكات للبشرة ووصفات بالأعشاب البحرية للتخلّص من رائحة العرق..


ماسك لتفتيح البشرة والجسم بالأعشاب البحرية والبرية
الماسك اللي هنعمله عبارة عن خليط من 3 خلطات مختلفة؛ أول خلطة فيهم هي مزيج من 17 عشب بري وبحري مطحون؛ وهمّ: اللؤلؤ البحري + صدف + أعشاب بحرية مجففة + زبد البحر + أوراق لسان الثور + القطونة الهندية + حب الرشاد + بذر الكتان + ثمار البقلي + زهرة الكاموميل + أوراق الراوند + حمض اللومي + الكافور + الصنوبر + قنطريون + الشوفان + مسحوق الكينيا.

أما الخلطة التانية اللي هنستخدمها هي خليط جاف عبارة عن: 1 و½ ملعقة كبيرة رز مطحون + 1 و½ ملعقة كبيرة دقيق.

والخليط الأخير معانا من مكونات الماسك ده، هيكون خليط سايل؛ وهو عبارة عن خليط من: 3 ملعقة كبيرة لبن بودرة مذوّبة في الماء + ملعقة كبيرة أكسجين سائل + ملعقة زيت ورد أو 4 ملعقة كبيرة مية ورد.

 

طريقة الخلط:
اخلطي 3 ملاعق كبيرة من خليط الأعشاب مع الخليط الجاف، وقلّبيهم كويس جدا مع بعض بحيث يمتزجوا تماما، وبعد كده خدي ملعقة كبيرة من الخليط ده وضيفيها مع الخليط السائل مع التقليب لغاية ما تحصلي على عجينة متماسكة علشان تقدري تفرديها على جسمك بسهولة.

طريقة الاستخدام:
الماسك ده بتعمليه 3 مرات أسبوعيا وبتسيبيه على بشرة وشك لمدة 15 دقيقة، وبتسيبيه على بشرة جسمك لمدة 30 دقيقة.

 

ماسك المسك لإزالة رائحة العرق
المقادير:
ملعقة كبيرة مطحون حجر المسك
ملعقة كبيرة مطحون مستكة
كمية صغيرة جدا من الشبه
ملعقة ممسوحة رز بلدي
ملعقة ممسوحة نشا

الطريقة:
اخلطي المكونات دي مع بعضها كويس، واحتفظي بالخليط في برطمان زجاجي، وممكن تضيفي له أي زيوت عطرية عندك زي زيت الصندل أو زيت الصنوبر.

 

ولغاية هنا تكون خلصت حلقتنا النهارده..
يا ريت تجرّبوا الوصفات اللي عملناها النهارده..
وتبعتوا تقولوا لنا آرائكم واقتراحاتكم..
واستنونا الحلقة الجاية مع وصفات تانية كتير..
سلااااام،،،