الرئيسية > صحة وجمال > قمر 14 > ماسكات للعناية بالبشرة وشدّ الترهلات

ماسكات للعناية بالبشرة وشدّ الترهلات

تخلصي من الهالات السوداء بماسكات طبيعية

أهلا بكل بنات “قمر 14″ في حلقة جديدة من “جمالك من الطبيعة مع رانيا”.. والنهارده هنقدّم لكم ماسكات كتيرة للعناية بالبشرة، وخاصة مع مشكلات زي الهالات السوداء..

 

زيت الجزر لسنفرة البشرة والجسم
المقادير:

  • 2 : 3 ملعقة صغيرة زيت جزر
  • 2 ملعقة صغيرة لبن بودرة
  • 2 ملعقة زيت لوز مر

الطريقة:
اخلطي اللبن البودرة مع زيت الجزر وزيت اللوز، وحطّي الخليط ده على بشرة نضيفة لمدة ساعة كاملة.. وبعد كده اغسلي وشك كويس، وعلى فكرة الماسك ده مناسب لجميع أنواع البشرة.

 

ماسك لتفتيح الهالات السوداء
المقادير:

  • ثمرة خيار مبشورة
  • ثمرة بطاطس مبشورة بقشرها
  • 1/2 ملعقة زيت ورد


الطريقة:
اخلطي بشر البطاطس والخيار مع بعض في الخلاط، وضيفي معاهم زيت الورد وشوية ميه، واخلطيهم كويس جدا، وبعد كده اعملي من الخليط ده كمادات على عينيكي.

 

وممكن تخلطي الماسك ده كمان مع ماسك الزبادي اللي هاقول عليه دلوقتي، وتعملي ماسك لترطيب وتفتيح البشرة، وماسك الزبادي عبارة عن:

  • ملعقة زبادي
  • ملعقة نشا
  • 1/2 ملعقة عسل نحل


المقادير:
اخلطي الزبادي مع النشا والعسل كويس أوي، وبعد كده ضيفي خليط البطاطس والخيار عليهم، وقلّبيهم مع بعض، وحطّيهم على بشرة نظيفة، وسيبي الماسك على بشرتك لمدة من 30 : 45 دقيقة.

 

ماسك لشد البطن
المقادير:

  • 3 ملعقة طمي مغربي مطحون
  • 3 ملعقة لسان البحر مطحون
  • خل تفاح

الطريقة:
اخلطي الطمي مع لسان البحر، وضيفي معاهم خل التفاح لغاية ما يكوّنوا عجينة متماسكة، واستخدميها على البطن وأي منطقة فيها ترهلات، وسيبيه لمدة ساعة.

 

الخميرة لتفتيح المناطق الحساسة
المقادير:

  • قطعة من الخميرة البيرة
  • 1/2 ملعقة صغيرة عسل نحل
  • كمية صغيرة من خل التفاح
  • ملعقة كبيرة ملح

الطريقة:
ضيفي العسل والخميرة والملح مع بعض واخلطيهم بخل التفاح كويس جدا، وبعد كده حطّي الماسك على المناطق اللي عايزة تفتّحيها في جسمك، وسيبيه لمدة ساعة، ومع المواظبة عليه لمدة 3 شهور هتلاقي نتيجة هايلة إن شاء الله.

 

ولغاية هنا تكون خلصت حلقتنا النهارده..
يا ريت تجرّبوا الوصفات اللي عملناها النهارده..
وتبعتوا تقولوا لنا رأيكم واقتراحاتكم..
واستنونا الحلقة الجاية مع وصفات تانية كتير..
سلااااام،،،