الرئيسية > صحة وجمال > قمر 14 > اعملي بنفسك شاور جل بالورد والعسل

اعملي بنفسك شاور جل بالورد والعسل

إغلي الورد في الميه لغاية ما ينزّل لونه

أعده للنشر: مها مصطفى
أهلا بيكم في حلقة جديدة من حلقات “جمالك من الطبيعة مع رانيا”، وفي حلقتنا النهارده زي ما وعدتكم هنعمل شاور جل بمكونات طبيعية، وكمان هنتكلّم عن ماسكات للعناية بالشعر باستخدام اللبن الرايب، وهنعمل ماسكات لعلاج تشقق الشفايف..

 

شاور جل بالورد والعسل
المقادير:

  • ملعقة كبيرة صابون مغربي
  • ½ ملعقة صغيرة زيت ورد
  • ملعقة صغيرة عسل أبيض
  • ¾ كوب ميه
  • ورد مجفف

الطريقة:
1- اخلطي الميه مع الورد المجفف، وحطّيه على النار، وسيبيهم لحد ما الميه تغلي كويس؛ علشان الورد ينزّل لونه، وناخد كل الفايدة اللي فيه.

2- بعد كده اخلطي العسل مع الصابون المغربي كويس، وبعدين ضيفي معاهم زيت الورد، وقلّبيهم كويس لغاية ما يتجانسوا مع بعض.

3- صفّي الميه اللي غليتي فيها الورد، وخدّي الميه دي وضيفيها على خليط العسل والصابون تدريجيا مع الاستمرار في التقليب، واستمري في إضافة مية الورد لغاية ما توصلي للكثافة اللي إنتي عايزاها للشاور.

4- حطّي الشاور في زجاجة ورجّيها كويس، واحتفظي به في الثلاجة، والشاور ده صالح للاستخدام لمدة من 10 : 15 يوم.

الشاور ده ممكن تستخدميه بشكل يومي الصبح وبالليل، وهو مش بيعمل رغوة كتيرة؛ لكنه بينعّم البشرة جدا وبيعطّرها.

 

ماسك الخروع لتشقق الشفايف
المقادير:

  • ملعقة كبيرة زيت خروع
  • قطرات من عصير الليمون

الطريقة:
اخلطي عصير الليمون مع زيت الخروع، ورجّيهم كويس.

ممكن تستخدمي الماسك ده يوميا وفي أي وقت، لكن المهم إنك ما تتعرّضيش به للشمس، وممكن تعملي منه كمية كبيرة، وتحتفظي به في الثلاجة لمدة أقصاها شهر.

 

حنة باللبن الرايب
المقادير:

  • ½ كوب لبن رايب (لو الشعر طويل هنستخدم كوب كامل)
  • 3 ملعقة صغيرة حنة (لو الشعر طويل هنستخدم ربع كيلو حنة)
  • 3 ملعقة كبيرة خل تفاح

الطريقة:
1- حطّي اللبن في حلة على النار، وضيفي عليه الحنة تدريجيا مع التقليب الجيد علشان الخليط يبقى ناعم ومتجانس.

2- بعد كده ضيفي الخل؛ سواء خل تفاح أو خل أبيض؛ وده علشان الحنة تدينا لون وحيوية ولمعة، وتشيل كمان قشرة الشعر.

3- حطّي الحنة على فروة الرأس والشعر، وسيبيها من 3 : 7 ساعات، بس خلّي بالك بلاش تنامي بيها، وبعد ما تعدّي الفترة دي اغسلي شعرك كويس.

 

 

وبكده خلصت حلقتنا النهارده..
استنونا الحلقة الجاية مع ماسكات طبيعية كتيرة..

 

< >