الرئيسية > صحة وجمال > قمر 14 > كريمات بالفازلين لتفتيح المناطق الحساسة وترطيب البشرة

كريمات بالفازلين لتفتيح المناطق الحساسة وترطيب البشرة

جمالك من الطبيعة مع رانيا

أعده للنشر: مها مصطفى
أهلا بكل بنات “قمر 14″ في حلقة جديدة من حلقات “جمالك من الطبيعة مع رانيا”، ولسه مواصلين حلقاتنا عن الروتين الأسبوعي للبشرة والشعر والجسم..

والنهارده هنعمل كريمات بالفازلين علشان نتمتّع بجسم ناعم زي الحرير ورائحة عطرة، وكمان نحصل على تفتيح آمن للمناطق الحساسة..

كريم الفازلين المعطّر
الفازلين الطبيعي ممكن نجيبه من عند العطار، وهو بيكون أفضل وأرخص من الفازلين الطبي.

المقادير:

  • 3 ملعقة كبيرة فازلين طبيعي
  • ½ ملعقة صغيرة زيت عطر الألف زهرة
  • ½ ملعقة صغيرة زيت الزهر الفرنسي
  • ½ ملعقة صغيرة زيت بندق


الطريقة:
هنسيّح الفازلين على نار هادية أو على حمام ميه، وبعد ما يسيح بنقسّمه على 3 برطمانات زجاجية، وهنضيف على كل برطمان منهم زيت عطري زي زيت الزهر أو زيت البندق أو زيت عطر الألف زهرة، علشان نحصل على كريم له رائحة جميلة، بس بنراعي وإحنا بنضيف الزيوت إننا نوزّعها على كل جوانب البرطمان؛ يعني مش بنصبّه كله في مكان واحد، والزيوت دي بتخلّي الجلد غير مترهل وصافي وبتغذّيه جدا.

 

والكريم ده بنستخدمه على جسم مندّي بالميه؛ لأن كل ما كان الجسم مبلّل وحطيت كريم أو زيت كل ما كانت سرعة امتصاصه للجسم أكتر، وده بيخلّي الجسم يحتفظ برطوبته ونداوته.

نقدر كمان نستخدم الكريم ده على المناطق الحساسة، وممكن نستخدمه 3 مرات في اليوم.

 

فازلين بالكركم
المقادير:

  • 13 ملعقة كبيرة فازلين
  • 2 ملعقة صغيرة كركم

الطريقة:
بنضيف الكركم على الفازلين السايح ونقلّبهم كويس مع بعض، والماسك ده ممكن نستخدمه على الجسم كله، وخصوصا الكوع والركب والأماكن الخشنة والحساسة.

ومع المواظبة على استخدام الكريم ده مرة واحدة يوميا بالليل لمدة 3 شهور، هنحصل على بشرة فاتحة وناعمة ورايقة وخصوصا في الأماكن الحساسة.

 

وبكده تكون خلصت حلقتنا النهارده..
واستنونا الحلقة الجاية مع ماسكات طبيعية كتيرة..

 

< >