الرئيسية > صحة وجمال > قمر 14 > تمتّعي ببشرة فاتحة وشعر طويل مع رانيا

تمتّعي ببشرة فاتحة وشعر طويل مع رانيا

لوّني البيض بالعسل والجليتر

أهلا بكل أصدقاء “قمر 14″ في حلقة جديدة من حلقات “جمالك من الطبيعة مع رانيا”، والنهارده حلقتنا هتكون مميزة جدا؛ لأننا بنحتفل الأيام دي بأعياد الربيع، علشان كده في بداية حلقتنا النهارده هنلوّن بيض شم النسيم بطريقة طبيعية وسهلة جدا، ده غير إننا هنعمل ماسكات طبيعية بالبرتقال والثوم علشان نهتم ببشرتنا وإحنا بنحتفل بالربيع..

لوّني بيض شم النسيم بالعسل
النهارده جبت لكم فكرة سهلة وسريعة لتلوين بيض شم النسيم بالعسل والجليتر الملوّن، وعلى فكرة إنتي ممكن تستخدمي الطريقة دي لتلوين البيض المسلوق أو حتى الكور البلاستيكية البيضاء، علشان تحطّيها في فازة أو طبق، وتحطّيها على السفرة علشان تدّيكي شكل وديكور مميّز للبيت.

وكل اللي عليكي إنك تجيبي البيض المسلوق أو الكور البلاستيكية وتدهنيها بالعسل الأبيض أو الأسود، وبعد كده تدحرجيها في طبق فيه جليتر بالألوان اللي تحبّيها، وأنا النهارده استخدمت ألوان زي الفضي والبيستاج واللبني والأصفر.

 

لوسيون البرتقال والليمون
لوسيون البرتقال اللي هنعمله النهارده مفيد جدا لتنعيم بشرة الجسم والوش وتفتيحها وشدّها وتنقيتها، والنهارده هنعمله بطريقتين؛ واحدة ممكن نستخدمها لبشرة الجسم، والتانية لبشرة الوش، وأنا بانصح أي عروسة مقبلة على الزواج إنها تعمل اللوسيون ده وتبدأ فيه من دلوقتي، تعالوا نشوف الطرق اللي هنعمل به لوسيون البرتقال والليمون لبشرة الوش والجسم.

 

لوسيون البرتقال والليمون لتنعيم وتفتيح الجسم
المقادير:

  • عصير 2 ثمرة برتقال صغيرة
  • عصير 6 ليمونات صغيرة
  • 3 ملعقة صغيرة خل تفاح
  • 3 ملعقة صغيرة سبرتو أبيض
  • 3 ملعقة صغيرة جلسرين
  • 3 ملعقة صغيرة زيت لوز مر
  • ½ ملعقة صغيرة زيت ورد

الطريقة:
اخلطي عصير البرتقال مع عصير الليمون، وقلّبيهم مع بعض كويس، وبعد كده شيلي 3 ملاعق كبيرة من الخليط ده علشان تعملي به لوسيون البرتقال لبشرة الوش، وخدي الخليط الباقي واخلطيه مع باقي المكونات التانية، وقلّبيهم مع بعض كويس جدا، واحتفظي بالخليط ده في برطمان زجاجي، وتجنّبي تماما إنك تحتفظي بهم في برطمان بلاستيك أو معدن، وأنا بافضل إنك تعملي منه زجاجتين، واحدة تحطّيها في الحمام والتانية تحطّيها في متناول إيدك، علشان تقدري تستخدمي اللوسيون ده باستمرار.

ممكن تحطّي طبقة من اللوسيون ده على بشرتك، وتسيبيها لمدة 10 دقايق، وبعد كده تحطّي طبقة تانية وتسيبيها، وبعد كده تبدئي تفركي بشرتك بإيدك وهتلاقي إن فيه طبقة من الجلد الميت والشوائب بتطلع معاكي، ودي هتبقى مفيدة جدا لبشرة الإيدين وخصوصا وإنتي بتستخدمي صابون المواعين؛ لأنه بجد هيخلّصك من آثارهم السيئة على البشرة وهينعّم إيديكي جدا، وبجد هتحصلي على بشرة فاتحة وناعمة ومفرودة من غير تجاعيد.

وممكن تستخدميه على الجسم بالكامل وحتى المناطق الحساسة كل يوم بالليل، والصبح بتاخدي شاور، ومع المواظبة هتحصلي على جسم ناعم وبشرة مشدودة ورايقة فاتحة، وكمان هيبقى مفيد جدا للسيدات اللي سنهم فوق الـ45 سنة، بجد يا ريت تجرّبوه وتبعتوا تقولوا لي على النتيجة.

 

لوسيون الليمون لتفتيح بشرة الوجه
المقادير:

  • 3 ملعقة كبيرة من خليط الليمون والبرتقال (اللي أخدتيهم من اللوسيون اللي فات)
  • ملعقة صغيرة زيت لوز مر
  • نقطة من زيت الورد

الطريقة:
اخلطي المكونات دي مع بعضها، واحفظيها في برطمان زجاجي، وممكن تشيليه في الثلاجة أو في الحمام، واللوسيون ده مناسب لكل أنواع البشرة وبيفتّحها جدا، ولكن ما عدا البشرة الحسّاسة.

 

الثوم لشعر صحي وطويل
النهارده هنعمل ماسك للشعر بالثوم بمناسبة إنه موجود ومتوفّر حاليا بالأسواق، وماسك الثوم ده مفيد جدا لتغذية وتقوية وتطويل الشعر، ويفضّل إننا نعمله في الوقت الحالي؛ لأن الثوم اللي موجود دلوقتي طازة وطري وفيه كل العناصر المفيدة للشعر.

المقادير:

  • فصوص رأس ثوم كاملة غير مقشّرة
  • 75 مللي من زيت الزيتون


الطريق
ة:
دقّي الثوم في الهون كويس أو افرميه بالمفرومة، وبعد كده اخلطيه مع زيت الزيتون، واحتفظي به في برطمان زجاجي مقفول في مكان مظلم لمدة من شهر إلى 3 شهور، وبعد كده صفّي الخليط ده على قطعة شاش نظيفة، واعصري الثوم كويس بإيدك علشان ينزّل كل الفوايد اللي فيه في زيت الزيتون، واعملي به حمام زيت لشعرك، بس راعي إنك توزّعيه على فروة رأس نظيفة، وسيبيه لمدة 3 : 4 ساعات، وبعد كده اغسلي شعرك كويس بالشامبو، ومع المواظبة على حمام الزيت ده، هتحصلي على شعر تقيل وصحي وناعم وطويل.

 

وبكده تكون خلصت حلقتنا النهارده..
نتمنّى إنكم تجرّبوا كل الماسكات اللي عملناها..
وتلوّنوا البيض بالطريقة اللي قلنا عليها..
وكل سنة وكلكم بخير وطيبين،،،

 

< >