الرئيسية > صحة وجمال > قمر 14 > مع رانيا.. روتين إزالة وتقليل نمو الشعر

مع رانيا.. روتين إزالة وتقليل نمو الشعر

جمالك من الطبيعة مع رانيا

أهلا بكل بنات “قمر 14” في حلقة جديدة،

النهارده في حلقتنا هنعرف كل حاجة عن إزالة الشعر، وإزاي نبطّأ نموّه.. 


وكمان إزاي نعمل حنة للشعر بلون الشيكولاتة..


وإزاي ننعّم الشعر وندّي له لون جميل..


تابعونا…

سويت باللافندر

الطريقة دي هتنفع جدا للبشرات اللي بيطلع لها حبوب بعد الإزالة؛ لأنها بتحتوي على مغلي عشبة اللافندر، وده المعروف عنه إنه بيزيل الحبوب لما بنستخدمه مع ماسكات.

المقادير:

  • ملعقة كبيرة عشبة اللافندر
  • كوب ماء
  • كوب سكر
  • نصف ليمونة

الطريقة:
هناخد ملعقة من عشبة اللافندر ونشطفها، ونحطّها في كوب ماء ساخن، ونسيبها تتنقع ساعة، وبعدين نغليها على النار شوية، وبعدين نسيبها نصف ساعة كمان منقوعة، لحد ما تنزل لونها وفايدتها وبعدين نصفّيها.

هناخد مغلي اللافندر، ونحطّه على السكر في حلة، ونقلّبهم مع بعض لحد ما السكر يدوب ويبدأ يغلي.

بعد ما يغلي هنحط عليه عصير الليمون، ونسيبه شوية، وبعدين نختبرها على أي رخامة أو طبق أو أي مسطح لحد ما نوصل لدرجة السُمك اللي إحنا عايزينه، بس أهم حاجة ناخد بالنا إننا مانغمّقهاس أوي علشان ماتبقاش جامدة.

 


ماسك بذر الكتان للشعر

المقادير:

  • 1/ 2 كوب ماء مغلي
  • ملعقة كبيرة زيت بذر الكتان
  • ملعقة صغيرة حبوب لقاح مطحونة

الطريقة:
هنقلّب زيت بذر الكتان مع المية المغلية، ونقلّبهم كويس، وبعدين نحط حبوب اللقاح ونقلّبهم تاني.

هنغسل شعرنا، وبعدين ناخد الماسك ده، ونصبّه على فروة شعرنا أو باستخدام فرشة الصبغة نحطّه بين الجذور، ونسيبه لمدة نصف ساعة، وبعدين نغسله بالشامبو.

الماسك ده علشان يقوّي الشعر ويغذّيه ويدّي له لمعة.

 


نبات السُعد لتعجيز نمو الشعر

النبات ده من الأعشاب اللي بتعجز نمو الشعر، وبنستخدمه بعد إزالة الشعر على طول في نفس اليوم أو تاني يوم بالكتير؛ علشان الجسم يستفاد منه، والمسام لسه مفتوحة؛ سواء بمغلي نبات السعد أو بالكريم، هنحطّه على الجسم في الأماكن اللي عملنا لها إزالة شعر، ومش مهم إننا نشطف جسمنا بعده؛ لأنه زي الميه، وممكن ناخد شاور تاني يوم، وهنستمر عليه من 4 : 5 أيام بعد السويت.

 


كريم نبات السُعد واللانولين بعد إزالة الشعر

المقادير:

  • ملعقة كبيرة لانولين أو فازلين
  • 2 ملعقة صغيرة مطحون نبات السُعد

الطريقة:
هنحط اللانولين على النار لحد ما يسيح، وبعدين نضيف عليه نبات السُعد، ونرفعها من النار ونقلّبها بسرعة، وبعدين نصبّها في أي علبة.

هنحط من الكريم ده بعد ما نعمل السويت ونسيبه لمدة ساعة أو ساعتين، وبعدين نشطف جسمنا قبل النوم، ونستمر عليه لمدة من 4 : 5 أيام.

 


كريم نبات السُعد والأرز

المقادير:

  • نصف كوب ماء
  • 3 ملاعق كبيرة أرز مطحون
  • 3 ملاعق كبيرة مطحون نبات السعد

الطريقة:
هنحط الميه على النار لحد ما تغلي، وبعدين نحط عليه نبات السعد والأرز المطحون بمقادير متساوية، ونقلّبهم مع بعض لحد ما يعمل زي المهلبية، يعني مايكونش سايل أوي ولا يكون يابس أوي.

بعد ما الخليط يتماسك هنرفعه من النار، ونبدأ نستخدمه على الجسم.

أهم حاجة إن الكريم ده لازم نعمله قبل الاستخدام على طول؛ يعني ما ينفعش نعمله ونسيبه في التلاجة؛ لأن فايدته هتكون راحت.

هنحط الكريم وهو ساخن أو دافي على جسمنا بعد ما ناخد شاور ونفرده على الجسم، ونسيبه لمدة ساعة وبعدين نشطفه.

 

 

وبكده تكون خلصت حلقتنا النهارده..

مستنية تعليقاتكم وآرائكم عن وصفاتنا..

وأشوفكم على خير في حلقة جديدة..

ووصفات كتيرة..

سلام,,،

*********************
للرجوع للحلقات السابقة
اضغط هنا
“جمالك من الطبيعة مع رانيا”

*********************  


كبسولة لصحتك

يومين رجيم لوزن مثالي