الرئيسية > صحة وجمال > قمر 14 > مع رانيا.. صبّار وموالح للقشرة العنيدة والشعر الهايش

مع رانيا.. صبّار وموالح للقشرة العنيدة والشعر الهايش

جمالك من الطبيعة مع رانيا

أعده للنشر: رحاب سليمان

أهلا بكل بنات “قمر 14” وحلقة جديدة لجمالك..

والنهارده هتكون حلقتنا متنوّعة فيها ماسكات كتيرة للشعر وقشرة الشعر..

وهنتكلّم كمان عن الصبار واستخداماته للشعر والزيوت اللي بنستخدمها معاه..

وكمان هنعرف مع بعض إزاي نجفف الفاكهة علشان نستخدمها في ماسكاتنا، تابعونا…


ماسكات بالصبار للشعر
جيل الصبار بالزيوت لسن الأربعين
الماسك ده مفيد جدا للناس اللي شعرها خفيف، خصوصا بعد سن الأربعين لما تكون بصيلات الشعر ابتديت تضعف؛ لأن زيت الجوجوبا بيحفز البصيلات وفروة الرأس، وبيخلّي الشعر عنده القدرة إنه يتقل ويطول، وكمان الروز ماري مفيد جدا للشعر.

المقادير:

  • قطعة صبار
  • ملعقة زيت جوجوبا
  • ملعقة زيت روز ماري

الطريقة:
هناخد قطعة صبار وتكون كبيرة شوية، وبعدين نقشّر الشوك ونقسّمها من النصف ونكحتها بالسكينة علشان ناخد منها الجيل، وهناخد الجيل اللي طلع، ونبدأ نضيف عليه الزيوت، ونقلّبهم كويس لحد ما يمتزجوا زي الجيل.

هنحط الماسك ده على الشعر بعد غسيله، ونسيبه لمدة 3/ 4 ساعة، وبعدين نغسله، وتكون نسبة الشامبو غزيرة شوية؛ لأن زيت الروز ماري تقيل، ونكرر الماسك ده مرة أسبوعيا خاصة لبعد سن الأربعين.

بالنسبة للبنات الصغيرين ممكن يستخدموا الصبار ده، بس مع إضافة زيوت تانية غير الجوجوبا والروز ماري، زي زيت جوز الهند أو الزيتون، أو يكتفوا بمية الصبار.

 


مية الصبار للشعر الهايش والمقصّف

هناخد قطعتين من الصبار من الجذور، ونمسحهم علشان لو فيه أي أتربة، وبعدين نقطع الصبار لقطع صغيرة، ونحطّهم في مية دافية، ونسيبها على النار تغلي بالصبار.

هناخد الصبار والمية ونصفّيها كويس أوي، وناخد اللوسيون ده ونحطّه في زجاجة، وممكن نحتفظ بيه في الثلاجة لمدة أربعة أيام كحد أقصى؛ لأن الصبار من الحاجات اللي بتبوظ بسرعة.

عند الاستخدام هناخد من اللوسيون ده شوية صغيرين على أد المرة، وندفّيها على نار هادية، ونعمل بيها تدليك لفروة الرأس يوم بعد يوم، وده للشعر الهايش والمقصّف المتطاير والمجهد، هيقوّي الشعر ويغذّيه.

 


ماسك الموالح للقشرة العنيدة

المقادير:

  • 1/ 2 ثمرة برتقالة
  • ليمونة متوسّطة
  • قطعة خميرة بيرة
  • ملعقة عسل نحل
  • ملعقة خل تفاح

الطريقة:
هناخد الخميرة وندوّبها بعسل النحل كويس، وبعدين نحط خل التفاح، ونعصر عليه الليمون والبرتقال.

هناخد من اللوسيون ده، ونحط منه على فروة الراس فقط، طبعا بعد غسل الشعر، والماسك ده مفيد جدا للقشرة العنيدة، ونسيبه على الشعر 3/ 4 ساعة وبعدين نغسله.

ممكن أصحاب البشرة الدهنية الشديدة جدا يستخدموا الماسك ده ولكن بدون إضافة خل، ومانسيبهوش على البشرة فترة طويلة ونشطفه بالماء فقط، ولو حسينا بعد استخدامه إن البشرة جفت ممكن نمسح وشنا بزيت لوز بسيط.

تجفيف البرتقال للتزيين والماسكات
هنجيب حبل ونحط فيه ترنشات برتقال، ويكون الشرايح على مسافات متباعدة علشان يجف أسرع، وتاخدي الحبل ده وتعلّقيه في مطبخك على حسب ديكور المطبخ، بس أهم حاجة يكون بعيد عن النار أو أي حاجة ممكن تعمل حرارة.

هتسيبي البرتقال لمدة شهرين لحد ما يجف أوي، وبعد كده تبدئي تستخدميه في الماسكات، وهنقول إزاي نستخدمه في الحلقات اللي جاية… تابعونا.

 

 

 

ولغاية هنا خلص عددنا النهارده

استنونا في الحلقات الجاية

مع ماسكات ومعلومات عن العناية بالبشرة والشعر

سلام

*********************
للرجوع للحلقات السابقة
اضغط هنا
“جمالك من الطبيعة مع رانيا”

*********************  


كبسولة لصحتك

يومين رجيم لوزن مثالي