الرئيسية > صحة وجمال > قمر 14 > مع رانيا.. ماسكات بالحنة لعلاج كل مشكلات الشعر

مع رانيا.. ماسكات بالحنة لعلاج كل مشكلات الشعر

جمالك من الطبيعة مع رانيا

أعده للنشر: رحاب سليمان

أهلا وسهلا بكل بنات “قمر 14

حلقتنا النهارده هنقدّم لكم فيها وصفات من الحنة..

وكمان ماسكات تانية من البيض والزبادي للعناية بالشعر التالف والمجهد والمصبوغ..

الحنة والثوم للعناية بفروة الرأس
أوّل ماسك معانا النهارده هنستخدم فيه الحنة، وطبعا معروف إن الحنة مفيدة جدا للشعر لعلاج القشرة، وكمان بتغذّي الشعر وتقوّيه، وتدّي له لمعة حلوة، وكمان بتخلّي لونه حلو، وخصوصا الحنة الحمراء.

بالإضافة إلى أن الحنة والثوم فيهم مطهرات طبيعية، بتطهّر فروة الرأس من الفطريات والطفيليات، وكمان الثوم مغذّي جدا للشعر، وبيساعد على إطالته ولمعانه، وكمان الماسك بيحتوي على خل التفاح اللي بيضيف لمعة طبيعية في لمعان الشعر..

المكونات:

  • معيار من الحنة على حسب طول الشعر
  • 3 ملاعق خل تفاح أو خل أبيض
  • 3 فصوص ثوم بلدي مفرومين ويُفضّل الثوم البلدي مش الصيني

 

طريقة التحضير:
من الأفضل في عجن الحنة إننا نستخدم الميه السخنة؛ لأنها بتساعد إن اللون اللي في الحنة ينزل بسرعة، لما نخلط الحنة لازم تكون لزجة شوية، يعني ما تبقاش ناشفة أوي، وتكون ليّنة شوية.

وممكن تسيبي الحنة شوية بعد ما تخلطيها بس مش أكتر من 3 ساعات، وبعد كده تبدئي تستعمليها.

الخلطة اللي عملناها دي هتستخدمي منها معيار صغير؛ لأنها هتتحط على فروة الرأس فقط، يعني مش هنوزّعها على الشعر من تحت؛ وده لأنها بتحتوي على الثوم اللي ممكن ينشف الشعر.

أما بقى بالنسبة لباقي الشعر؛ فممكن نعمل له نفس المكونات دي بس من غير الثوم؛ يعني تكون عبارة عن حنة وخل تفاح وميه فقط، ونحطّها على الشعر من تحت.

 


ماسك الحنة والبيض

الماسك ده من الماسكات اللي بتقوّي وتغذّي وترطّب الشعر جدا.

المكونات:

  • 2 ملعقة حنة أو على حسب طول الشعر
  • 1/ 2 كوب زبادي
  • قطعة خميرة بيرة
  • ملعقة عسل نحل
  • فص ثوم مفروم
  • ملعقة خل تفاح
  • قطعة زبدة
  • بيضة

الطريقة:
كل اللي عليكي إنك تخلطي كل المكونات دي مع بعضها، وتحطّي الخليط على شعر نظيف، وتسيبيه لمدة 3 ساعات، وبعدين تغسلي شعرك مرة واحدة بالشامبو.

 


الموز والكاموميل.. لعلاج تقصّف الشعر

الماسك ده بيطرّي الشعر جدا، وبيدّي له نضارة ولمعة قوية، والموز من الحاجات اللي بتعالج التقصيف بشكل ملحوظ؛ يعني لو عملتي الماسك ده مرتين في الأسبوع لمدة شهر هتحسّي بنتيجة هايلة إن شاء الله.

المكونات:

  • موزة
  • ملعقة متوسّطة زيت لوز
  • ملعقة متوسطة زيت زيتون
  • ملعقة متوسطة زيت سمسم
  • ملعقة لبن بودرة أو فنجان لبن
  • 2 ملعقة صغيرة عسل
  • ملعقة زهرة كاموميل أو كركم (اختياري)
  • قليل من الميه للذوبان

الطريقة:
اضربي المكوّنات دي في الخلاط لحد ما تبقى سميكة أو لزجة، والماسك ده هنتعامل معاه زي الصبغة أو حمام الكريم؛ يعني هتقسّمي الشعر خصلات، وتوزّعي الماسك على الجذور، وبعدين على الشعر كله من تحت، وتسيبيه على الشعر من 30 : 60 دقيقة بالكتير، وبعدين تغسلي الشعر مرة واحدة بالشامبو.

 


ماسك الحلبة والزبادي.. لعلاج الشعر المجهد

الماسك ده بينعّم الشعر جدا، وبيطرّيه، وهيساعد جدا في علاج الشعر المجهد والمقصف والتالف من الصبغة والسيشوار.

المكونات:

  • 1/ 4 كيلو حلبة مطحونة (على حسب كثافة الشعر)
  • كوب زبادي

الطريقة:

اعجني الحلبة مع الزبادي كويس أوي، ولو حسّيتي إنها لسه جامدة ممكن تحطّي عليها قليل من خل التفاح أو مغلي الكاموميل أو ميه سخنة، علشان تطّري العجينة وتبقى ليّنة.

بعد كده بتوزّعي الماسك على جذور الشعر، بس لازم الشعر يكون نظيف ومغسول، وبعد كده بتوزّعي باقي الماسك على الشعر كله، وتسيبيه لمدة ساعتين وبعدين تشطفيه.

 


ماسك البيض وزيت الزيتون

  • صفار بيضة
  • ملعقة زيت زيتون
  • ملعقة خل تفاح

الماسك ده بيكون زي لوسيون للشعر، وطبعا كالعادة هتحطّيه على شعر مغسول، وهتوزّعيه في الجذور والأطراف، وبتسيبيه لمدة نصف ساعة، وبعدين اغسلي شعرك بالشامبو مرة واحدة، وبجد مع المواظبة عليه هتحسّي إنه بيتقّل الشعر، وبيغذّيه وبيلمّعه.

 

 

بكده تكون خلصت ماسكاتنا النهارده، وأحب في النهاية إني أنصح كل بنت إنها تعمل برنامج للعناية بشعرها، يعني تثبتي يومين في الأسبوع علشان تغسلي شعرك، وتعملي فيه الماسكات اللي هتختاريها، ويُفضّل طبعا إنك تحددي المشكلة اللي شعرك بيعانيها، وتختاري الماسك اللي هيعالجها، وتداومي عليه فترة؛ يعني مش كل مرة تعملي ماسك مختلف، طبعا التنويع مهم ومفيد بس لازم تداومي على الماسك أو الماسكين اللي هتختاريهم مدة شهر مثلا علشان تحسّي بالنتيجة على شعرك، وبعدين تغيّريه بحاجة تانية لو عايزة، ولو الشعر فيه أكتر من مشكلة يبقى هتعملي 3 ماسكات في خلال 10 أيام ببرنامج معين، وإن شاء الله في الفترة الجاية هنعمل معاكم برامج للعناية بالشعر.

وكمان من الحاجات اللي بنأكّد عليها هي أكل البنجر كتير، واستعمال زيت الزيتون، وأكل الخضراوات والفاكهة والزبادي واللبن؛ لأن الحاجات دي مفيدة جدا للبشرة والشعر.


*********************
للرجوع للحلقات السابقة
اضغط هنا
“جمالك من الطبيعة مع رانيا”
*********************