الرئيسية > صحة وجمال > قمر 14 > مع رانيا.. الكيوي والبرتقال للمعان الشعر وعلاج القشرة

مع رانيا.. الكيوي والبرتقال للمعان الشعر وعلاج القشرة

جمالك من الطبيعة مع رانيا

أعده للنشر: رحاب سليمان

أهلا وسهلا بكل بنات “قمر 14″..

في حلقتنا النهارده لسه مكمّلين مع ماسكات الفواكه للبشرة والشعر..

وقبل ما نبدأ حلقتنا عايزة أوجه شكر لكل أصدقائنا اللي شاركوا معانا في حلقة الافكار وبعتوا لنا أفكارهم وآراءهم..

ودلوقتى نبدأ حلقتنا، واللي هنعرف فيها إزاي نحافظ على صحة الشعر وإزاي نطوّله ونعالج مشكلة القشرة..


لعلاج القشرة.. ماسك البرتقال والعسل
أول ماسك معانا النهارده بيتكون من برتقال وليمون وعسل، وممكن نضيف عليه زيت لوز أو قطعة حمام كريم، وزي ما قلنا إن أي فواكه أو خضراوات بتليق على أي بشرة أو شعر، ولكن مع اختلاف الإضافات اللي بنحطها معاها؛ يعني الشعر الجاف بيبقى ليه إضافات والشعر الدهني بيبقى ليه إضافات تانية علشان تنفع معاه.

وماسك البرتقال ده بيعالج القشرة والفطريات الخفيفة اللي بتكون موجودة على فروة الرأس، وكمان بيدي صحة للشعر الباهت وبيخلّي ريحته حلوة وفيه لمعة وبريق ونضارة، والماسك ده بيساعد في تغذية الشعر، وبالتالي هيساعد على تطويل الشعر.

ومكونات الماسك هي:

  •  عصير برتقالة
  •  عصير ليمونة
  •  ملعقة عسل نحل

والماسك أو اللوسيون ده بيناسب الشعر الدهني والمركّب والعادي، ولو الشعر جاف ممكن نضيف عليه نصف ملعقة زيت لوز أو قطعة حمام كريم.

وكل اللي عليكي إنك تخلطي المكونات مع بعضها، وتحطيها على شعرك بعد ما تغسليه وتسيبيه لمدة من 45 : 60 دقيقة لا أكثر ولا أقل، وبعد كده بتشطفيه بميه بس؛ لكن لو كان شعرك جاف وضيفتي على الماسك زيت لوز؛ فإنتي ممكن تغسليه مرة بالشامبو بعد مرور الساعة أو تغسليه تاني يوم، ولو ضيفتي حمام كريم فإنتي هتشطفيه بميه بس.

وزي ما  قلت قبل كده إن حمام الزيت بيتحط على شعر نظيف، وتسيبيه من 3 : 4 ساعات وأقصى فترة ليه هي 24 ساعة، وما ينفعش نزوّد أكتر من كده؛ لأنها ممكن تيجي بنتيجة عكسية على الشعر.

واللوسيون ده هتحطّيه على فروة الرأس، وممكن تحطّيه على الشعر بس الأهم إنه يتحطّ على فروة الرأس وجذور الشعر؛ وده لأن البرتقال والليمون وكل الفاكهة اللي بتحتوي على فيتامين سي بتساعد على إزالة القشرة والفطريات من الشعر وبتغذّي فروة الرأس.

 


ماسك الكيوي.. لشعر لامع

الكيوي من الفواكه المفيدة جدا للبشرة والشعر، والماسك اللي هنعمله النهارده بالكيوي هيكون للشعر، وطبعا إحنا عارفين إن فيه شامبوهات كتيرة للشعر بالكيوي، وإن شاء الله الفترة اللي جاية هنعمل لكم شامبوهات للشعر بالفواكه والزيوت.

أهم حاجة لمّا نكون بنستخدم أي فاكهة في الماسكات إننا نستخدم ثمرة طريّة علشان يبقى سهل استخدامها.

وبالنسبة للفاكهة اللي بيكون فيها بذور زي الكيوي أو الفراولة ممكن البذور دي تتعلق بالشعر؛ وعلشان كده لما تيجي تستعمليها يا إما تصفّي العصير على قطعة شاش قبل ما تستخدميه وتاخدي بس خلاصة الفاكهة بدون البذور، أو تحطي العصير زي ما هو وبعد ما الشعر ينشف انفضي منه البذور، والكيوى هنعمل منه ماسكين..

ماسك للشعر الجاف

  • ثمرة كيوي
  • ملعقة زيت لوز
  • 1/ 2 ملعقة عسل نحل

ماسك للشعر الدهنى

  • ثمرة كيوى
  • ملعقة عسل
  • 1/ 2 ملعقة عصير ليمون

أول حاجة بتوزّعي الماسك اللي عليه الإضافات على فروة الرأس، وبعدين تحطّي من الفاكهة المهروسة لوحدها على باقي الشعر نفسه وبتسيبيه من 45 : 60 دقيقة وبعدين تشطفيه بالميه العادية.

 

 

 

 

ودى كانت حلقتنا النهارده..
يا رب تكونو استفدتم..
تابعونا علشان تعرفوا مزيد من الماسكات والوصفات الطبيعية..
سلام،،،

 

*********************
للرجوع للحلقات السابقة
اضغط هنا
“جمالك من الطبيعة مع رانيا”
********************* 


< >