الرئيسية > صحة وجمال > قمر 14 > حنة بالكاكاو لتساقط الشعر.. وماسك الخميرة لعلاج الحبوب الصعبة بالبشرة

حنة بالكاكاو لتساقط الشعر.. وماسك الخميرة لعلاج الحبوب الصعبة بالبشرة

جمالك من الطبيعة مع رانيا

أهلاً بكل بنات “قمر 14” وحلقة جديدة من حلقات جمالك من الطبيعة مع رانيا..

هيكون معانا النهارده حنة بالشيكولاتة وماسكات للروتين اليومي للبشرة..


وكمان ماسكات للجسم علشان يفضل دايماً ناعم ولامع، تابعونا.

حنة بالكاكاو
من المعروف إن الكاكاو والبن أو القهوة من الحاجات المفيدة جداً للشعر وبتمنع تساقطه، ومعظم الدول العربية اتجهت من فترة كبيرة لإنها تدَخّل الشيكولاتة والبن في ماسكات وحمامات كريم للشعر؛ علشان تمنع تساقطه، وكمان أصبح اتجاه عالمي.

المقادير:

  • 3 ملاعق كبيرة حنة حمرا
  • 3 ملاعق كبيرة كاكاو خام
  • ملعقة ونصف كبيرة خل تفاح أو ليمون
  • مقدار مية تكفي للعجن

الطريقة:
هنخلط الحنة والكاكاو ونقلبهم مع بعض كويس، وبعدين هنحط الخل ومية تكفّي لعجن الحنة؛ بحيث يكون قوامها لزج؛ يعني مش سميك أوي ولا سائل أوي، ونقلبهم مع بعض على البارد، وبعدين نحطهم على النار.. وبعدين نحط الحنة على النار ونقلبها باستمرار لحد لما نوصل للسُمك اللي إحنا عايزينه لمدة حوالي 4 – 5 دقائق، وبعدين نرفعها.

هنغسل شعرنا طبعاً كويس أوي، وبعدين نبدأ نحط الحنة بداية من الجذور وبعدين على الشعر بالكامل، ونسيبها على الشعر لمدة 3 ساعات على الأقل، وهتدي لون حلو أوي أحمر مائل للون الشيكولاتة.

عايزة أقول لكم: إن الحنة من الحاجات المغذية جداً للشعر، وبتمنع تساقطه وبتعالج القشرة وبتساعد على تطويل الشعر جداً وتنعيمه، وأنا بانصحكم لو عايزين تعالجوا شعركم من أي مشكلة إنكم تعملوا الحنة على شعركم كل أسبوع، وتستمروا عليها لمدة شهرين، وبجد هتلاقوا نتيجة هايلة جداً.

 

من المعروف طبعاً عن الرز إنه مفيد جداً للبشرة؛ لأنه بيساعد على ترويق البشرة وترطيبها وتفتيحها، وكمان بيدي للبشرة لمعة حلوة جداً وطلّة فيها رونق ونضارة.

ماسك الرز

المقادير:

  • كوب مية متوسطة
  • 3 ملاعق صغيرة رز مصري

الطريقة:
هنحط الرز في المية ونحطهم على النار، ونسيبه يغلي لمدة ربع ساعة وبعدين نصفّيه.

 

بعد ما نصفّي الرز هناخد اللوسيون اللي طلع ونحتفظ بيه في التلاجة في برطمان زجاج لمدة 5 أيام، وهنستعمله في الروتين اليومي.

هناخد كمية منه بإيدينا ونحطها على وشنا، وحول العين، ونبدأ ندلّك البشرة بالتكنيك المعروف، وفي المرة الواحدة هنحط منه مرتين أو ثلاثة ونسيبه لمدة 10 دقائق لحدّ أما الوش يتشربه بالكامل، وبعدين نشطفه.

هنعمل الروتين ده يومياً لمدة شهر أو 15 يوم زي ما إحنا عايزين، وهو مفيد لكل أنواع البشرة، ونقدر كلنا نحطّ منه الصبح، وبعدين نشطفه وننزل في الشمس عادي مافيش أي مشكلة.

 


لوسيون الردة للبشرة والشعر

المقادير:

  • كوب مية
  • 8 ملاعق كبيرة ردة

الطريقة:
هنحط الردة والمية على النار ونسيبهم لحدّ لما المقدار يقلّ النصف، وبعدين ممكن نصفّيه أو لأ.

اللوسيون ده مفيد جداً ونقدر نستخدمه للبشرة ونعمل بيه الروتين اليومي؛ يعني هناخد منه على وشنا ونسيبه لمدة 10 دقائق لحدّ ما ينشف، وبعدين نشطفه، واللوسيون ده هيكون من الحاجات السهلة اللي ممكن نستخدمها للروتين اليومي.

كمان نقدر نستخدمه للشعر، وهو من الحاجات المفيدة جداً اللي بتساعد على تغذية الشعر جداً وكمان على تطويله.

ممكن نحتفظ بالردة دي في برطمان زجاجي بالتلاجة لمدة 3 – 4 أيام فقط، ونقدر نستخدمها من غير ما نصفّيها كغسول يومي للبشرة، وهيكون مقشر ناعم للبشرة، ونقدر نستخدمه بدل الصابون كل يوم، ونسيبه على الوش لمدة 10 دقائق، وبعدين نشطفه بالمية.

 


ماسك الخميرة للحبوب

الماسك ده بيكون مفيد جداً للحبوب اللي بتكون زي الدمامل؛ وده لأنه بيحتوي على حبوب اللقاح.
المقادير:

  • قطعة خميرة بيرة
  • ملعقة كبيرة عسل
  • ملعقة صغيرة حبوب اللقاح

الطريقة:
هنقلب الخميرة والعسل مع بعض كويس أوي لحدّ لما يدوبوا تماماً، وبعدين نحط عليه حبوب اللقاح بعد ما نطحنها ونقلبهم، ونسيبهم لمدة 10 دقائق، وبعدين نرجع نقلبهم تاني.

زي ما قلنا إن الماسك ده بينفع للحبوب اللي بتكون زي الدمامل؛ وده لأن النوع ده من الحبوب بيكون سريع الانتشار في الوش، علشان كده بنحط حبوب اللقاح علشان نتجنب أي عدوى تحصل تاني في الوش.

هنعمل الماسك ده يومياً أو يوم بعد يوم، وده على حسب كمية وحجم الحبوب في الوش، وبعدين نبدأ نقلل عدد المرات في الأسبوع تدريجياً؛ يعني هنستخدمها الأول يومياً، وبعد فترة تبقى يوم بعد يوم، وبعدين مرتين في الأسبوع، وبعدين مرة كل أسبوع.

من فوائد الخميرة إنها بتحتوي على فيتامين ب1 وب3، وكمان غنية بالبوتاسيوم والماغنسيوم والكروم، وكمان مفيدة للشعر ومفيدة لو إحنا شربناها؛ لأنها بتطهر المعدة من جوه.

 

 

خلصت حلقتنا النهارده

استنونا في حلقة جديدة على قمر 14

ولسه معانا ماسكات ووصفات للبشرة والشعر

سلام،،،

*********************
للرجوع للحلقات السابقة
اضغط هنا
جمالك من الطبيعة مع رانيا

*********************