مع رانيا.. ماسكات طبيعية لتنعيم الشعر.. والملح والليمون لعلاج حبوب البشرة

موضوع حلقتنا النهارده هيكون عن وصفات طبيعية لتنعيم الشعر؛ لأن أي بنت بتحلم إن شعرها يبقى ناعم وفيه لمعة وشكله صحي..

أهلا وسهلا في حلقة جديدة من حلقات “جمالك من الطبيعة مع رانيا”..

تابعونا علشان تعرفوا إزاي تحصلوا على شعر صحي وناعم بطرق طبيعية..

الحلبة والبن.. لشعر ناعم
الماسك اللي هنعمله دلوقتي، يعتبر من أفضل الماسكات الطبيعية لتنعيم الشعر، وبجد لو جربتيه هتحسّي بنتيجته مع أوّل استخدام؛ لأنه بيحتوي على البن اللي فيه مادة الكافيين ودي بتمنع تساقط الشعر، أما الحلبة فهي من الحاجات المفيدة جدا لنعومة الشعر.

المكونات:

• 3 ملاعق زيت جوز هند
• 3 ملاعق حلبة مطحونة
• 3 ملاعق بن

الطريقة:
اخلطي كل المكوّنات دي مع بعضها على نار هادية، وقلّبيهم مع بعض كويس على النار، ولو حسيتي إن الخليط جامد أوي، ممكن تزوّديه بشوية من زيت جوز الهند، علشان قوامه في النهاية يبقى زي عجينة الحنة الطريّة.

بعد كده بتاخدي الخليط ده، وتحطّيه على فروة راسك بس لازم تكون نظيفة تماما، وبعد كده بتوزّعيه على باقي الشعر، وتسيبيه لمدة ساعة، وبعد كده اغسلي شعرك بالشامبو مرّة تانية، وإن شاء الله تلاقي نتيجة هايلة ومن أوّل مرّة.

المايونيز.. لتنعيم الشعر وعلاج التقصيف
المايونيز من الحاجات المفيدة أوي لتنعيم الشعر وعلاج التقصيف، وطريقة استخدامه هي إنك توزّعيه على فروة رأسك باستخدام فرشة الصبغة، وبعد كده بتوزّعي كميات صغيرة منه على باقي شعرك، بس لازم تكوني غاسلة شعرك كويس، وبتركّزي أكتر على أطراف الشعر المقصفة، وبتسيبي المايونيز على شعرك لمدة ساعة واحدة، وبعد كده تغسلي شعرك مرة تانية بالشامبو.

لوسيون الماء المملح.. لعلاج حبوب البشرة
من الحاجات اللي بتبعتوا تسألوا عليها كتير، هي علاج حبوب البشرة، وكنا عملنا في حلقة قبل كده ماسك بزيت كبد الحوت والعسل، والحمد لله ناس كتير بعتت تشكر في الوصفة، وبتقول إنها ابتدت تجيب نتيجة معاهم، بس المشكلة إن علاج الحبوب بيحتاج لوقت طويل شوية، دلوقتي هاقول لكم على لوسيون تاني ممكن نعمله في البيت، واللوسيون ده بيستخدم لتطهير البشرة وعلاج الحبوب اللي بتكون ظاهرة أوي على البشرة..

كل اللي عليكي علشان تحضّري اللوسيون ده إنك تجيبي كيس ملح طعام عادي وتضيفيه على لتر ميه، وتحطّيهم على النار وتسيبيهم يغلوا لمدة من 15 : 20 دقيقة، وبعد كده بتاخدي الميه دي وتحطّيها في برطمان وتشيليه في الثلاجة، وتاخدي من اللوسيون ده كل يوم بقطنة نظيفة، وتوزّعيه على بشرتك وتسيبيه لمدة 15 دقيقة، وبعد كده تشطفي البشرة بميه عادية، وممكن على آخر اليوم تدهني بشرتك بمسحة خفيفة من زيت اللوز علشان يهدي البشرة، وبتستمري على الماسك ده يوميا لمدة من 7 : 15 يوما.. وإن شاء الله هتلاقي نتيجة ممتازة.

سنفرة للبشرة بالملح والليمون لتنعيم وتفتيح الجسم وإزالة الحبوب
المكوّنات:

• بشر 2 ليمونة
• ملعقة كبيرة ملح
• عصير نصف ليمونة

الطريقة:
اخلطي المكوّنات مع بعضها كويس، ولو حسيتي إن العجينة مرملة يبقى كده المكوّنات مظبوطة، أما لو حسيتي إنها جامدة أوي ممكن نضيف عصير ليمون تاني.

بتاخدي الخليط ده وتفركي به جسمك كله بعد ما تدعكي جسمك بالليفة، وبتوزّعيه بشكل دائري، وبتضغطي بشكل أكبر على المناطق اللي فيها حبوب صغيرة في الجسم وخاصة جوانب الرجْل والأرداف، أما منطقة الرقبة فمش بنظغط عليها جامد، وممكن تحطيه على بشرة وشك بس بتسيبيه لمدة دقيقة واحدة بس، أما على الجسم فبتسيبيه لمدة من 5 : 10 دقائق، مش أكتر من كده لأنه بيعمل سنفرة قوية جدا للجسم، وبنستخدم الماسك ده مرة واحدة أسبوعيا، والماسك ده بيدي نتيجة هايلة، وكمان بيعمل نصف درجة تفتيح للبشرة.

ونصيحتي ليكي إنك في كل مرّة تاخدي فيها حمام، وتغسلي شعرك، لازم تعملي أي ماسك سنفرة للجسم من الماسكات اللي قلنا عليها.

طريقة تجفيف الليمون والبرتقال

طريقة تحضير سنفرة للجسم بالملح والليمون

وبكده تكون خلصت حلقتنا النهارده..
أتمنّى إني أكون قدّمت فيها بعض المعلومات اللي إنتم محتاجين لها..
استنوني في حلقات أكتر ومعلومات ونصايح جديدة..
وفي انتظار تعليقاتكم وأسئلتكم..
سلام،،،

*********************
للرجوع للحلقات السابقة
اضغط هنا “جمالك من الطبيعة مع رانيا”
*********************