الرئيسية > صحة وجمال > قمر 14 > مع رانيا.. ماسكات طبيعية للعناية بالإيدين

مع رانيا.. ماسكات طبيعية للعناية بالإيدين

جمالك من الطبيعة مع رانيا

أهلاً وسهلاً بكل أصدقاء “قمر 14″ في حلقة جديدة من حلقات “جمالك من الطبيعة مع رانيا”..

والنهارده حلقتنا هنعمل فيها مجموعة من الماسكات الطبيعية للعناية بالإيدين؛ لأنها من أهم الحاجات اللي بتظهِر نظافتك وأنوثتك..

وكمان هنخصّص جزء من الحلقة علشان نردّ فيه على بعض المشاركات اللي بتوصل لنا منكم..

شمع عسل النحل.. لترطيب وتفتيح الإيدين
الماسك ده مفيد جداً لترطيب الإيدين المرهقة اللي بتتعرض لعوامل خارجية كتير بتأثر عليها وعلى نضارتها، من غسيل الأطباق وتحضير الأكل وكمان الجفاف اللي بيسببه فصل الشتاء للبشرة..

ودلوقتي هنعمل مع بعض ماسك هايل جداً للعناية بالإيدين..

 

 ومكوناته عبارة عن:

  • قطعة متوسطة من شمع العسل
  • ملعقة زيت لوز حلو
  • ملعقة زيت ورد

الطريقة:
حطّي شمع العسل في حلة سخنة على النار، وسيبيه على النار لمدة كام ثانية مع التقليب، وبعد كده ارفعي الحلة من على النار، واستمرّي في التقليب لغاية ما تحسي إن شمع العسل ذاب تماماً وبقى غليظ شوية، وبعد كده ضيفي زيت اللوز الحلو وزيت الورد، واستمري في التقليب علشان تتأكدي إن كل المكونات تجانست تماماً مع بعضها، وبعدين صبّي الخليط في برطمان زجاجي، واحتفظي به في الثلاجة.

والماسك ده أساساً للإيدين؛ لكن ممكن تستخدميه كمان لبشرة الجسم كله، بس تستخدميه بعد الحمام على طول؛ بحيث إن البشرة تكون مبلولة، وممكن تستخدميه كمان على الكوع والركَب وكعب القدمين، وبتسيبيه على بشرتك لمدة ساعة أو اثنين، وبعد كده تغسلي بشرتك بميه عادية، وبجد هتلاقي نتيجة حلوة جداً، وهتحسي إن بشرتك لونها بقى أفتح وكمان فيها نضارة.

 

الجلسرين وماء الورد.. لإيدين ناعمة
دلوقتي هنعمل ماسك تاني للإيدين، ومكوناته بسيطة ومتوفرة عند أي عطار..

المكونات:

  • 8 ملاعق ماء ورد
  • 3 ملاعق جلسرين
  • 3 ملاعق كحول “من أي صيدلية”
  • ملعقة كبيرة عصير برتقال
  • عصير نصف ليمونة
  • ملعقة كبيرة خل تفاح

الطريقة:
اخلطي كل المكونات دي مع بعضها، وصبّيها في برطمان زجاجي أو أي زجاجة برفان قديمة عندك، وسيبيه على إيدك لمدة ساعة أو لغاية ما ينشف، وبعد كده اشطفيها بالميه العادية.

ودلوقتي هاحاول أجاوب على بعض الأسئلة اللي بتوصلني منكم في المشاركات..

حمام الزيت الثلاثي.. لعلاج تساقط الشعر
أول سؤال عندي عن العناية بالشعر، وزي ما بنقول دايماً إن علشان نحصل على شعر صحي ولامع وطويل وكثيف ومن غير قشرة، لازم نختار شامبو مناسب مع نوع شعرنا، ولو عندنا قشرة لازم نستخدم شامبو ضد القشرة زي فركتوز أو دوف.

وممكن نعمل ماسك الصبار للشعر؛ وده بيعمل على إضافة لمعة ونعومة للشعر، وكمان بيساعد في تطويل الشعر.

وكمان ممكن نعمل حمام الزيت الثلاثي اللي قلنا عليه في حلقة قبل كده؛ واللي بيحتوي على زيت الثوم، وزيت الجرجير، وزيت جوز الهند، وده هايل جداً لعلاج تساقط الشعر، وبنعملهم مرتين في الأسبوع، وممكن نستمر عليهم لمدة 3 أو 4 شهور.

زيت القرفة.. لتطويل الشعر
أما بقى لتطويل الشعر فممكن نعمل حمام زيت عبارة عن ملعقة زيت جوز هند على نصف ملعقة زيت قرفة؛ بس ناخد بالنا إننا ما نزوّدش كمية زيت القرفة لأنها ممكن تسبب تساقط الشعر لو كميتها زادت.

وممكن كمان نعمل خليط عبارة عن ملعقة كبيرة من عسل النحل وملعقة صغيرة من زيت الزيتون.

لكن أهم حاجة عايزة أقولها إننا علشان نحسّ بنتيجة من الماسكات دي لازم نواظب عليها لفترات طويلة.

فيه صديقة تانية بتسأل عن إمكانية استخدام ماكينات إزالة الشعر في إزالة شعر الوجه، وطبعاً أنا ضد ده تماماً، وبالنسبة للشعر الكثيف اللي بيكون في الذقن؛ فده ممكن تزيليه بالليزر.

أما بالنسبة لصديقتي اللي بتسأل عن طرق تعطير المناطق الحساسة؛ فدي ممكن نستخدم لها الكرة الفوارة اللي عملناها في حلقة سابقة، أو نستخدم خليط زيت اللوز وزيت الورد.

 

 

وفي النهاية أحب أنصح كل بنت إنها لازم تهتم بنفسها جداً..
ومش لازم تكوني عروسة علشان تبدئي تهتمي بنفسك..
تابعوني في الحلقات اللي جاية..
علشان نتعرف مع بعض على كل ما هو جديد في التجميل من الطبيعة،،،

 

*********************
للرجوع للحلقات السابقة
اضغط هنا
“جمالك من الطبيعة مع رانيا”
********************* 


كبسولة لصحتك

رجيم شوربة الكرفس