الرئيسية > صحة وجمال > قمر 14 > مع رانيا.. كريمات بالزبدة ولبن جوز الهند لبشرة ناعمة وصافية

مع رانيا.. كريمات بالزبدة ولبن جوز الهند لبشرة ناعمة وصافية

جمالك من الطبيعة مع رانيا

أهلا وسهلا بكل أصدقائي وأصدقاء “قمر 14″..

بس اسمحوا لي في بداية الحلقة إننا نتكلِّم شوية عن بعض الأفكار البسيطة اللي ممكن نعملها مع بعض كمصريين؛ علشان نستغل بها الروح الإيجابية لثورة 25 يناير العظيمة..

طبعا كلنا عندنا أفكار وأحلام جميلة لمصر علشان نوصل بها لأحسن مستقبل إن شاء الله، وأنا رأيي إن أهم حاجة في الفترة دي إننا ننمي مع بعض روح التعاون والترابط والحبّ والمودة اللي كانت طول عمرها صفة أساسية عند كل المصريين..

ومِن ضمن الأفكار البسيطة اللي أتمنّى إنكم تشاركوني فيها؛ هي إننا ممكن نعمل يوم واحد كل شهر في الشارع بتاعنا نتبادل فيه الحاجات اللي ممكن نستغنى عنها؛ يعني مثلا لو عندك تابلوه ومش عايزاه ممكن تدّيه لحد تاني محتاجه، والعكس صحيح إنتي ممكن تلاقي حاجة عجباكي من اللي جيرانك عارضينها، والهدف مِن كده إننا ننمي فكرة العطاء والترابط بين سكان الشارع الواحد، واللي بالطبع هتنتقل لكل شارع في مصر..

أتمنّى إن الفكرة دي تكون عجبتكم، ونبدأ ننفّذها فعلا، ويا ريت لو عندكم أفكار تانية تبعتوا لنا وتشاركونا بها..

ودلوقتي بقى تعالوا نبدأ حلقتنا النهارده، واللي هنعمل فيها كريمات لترطيب بشرة الجسم بعد الحمام، والحلقة دي أنا عملتها بناء على طلباتكم اللي بعتوها لنا الفترة اللي فاتت، واللي بجد أنا مبسوطة منها جدا؛ لأن الاهتمام ببشرة الجسم مهم جدا زي الاهتمام بالوجه والشعر..

 

كريم الزبدة لتنعيم وسنفرة الجسم
المكونات:

  • 2 ملعقة كبيرة زبدة صفراء من غير ملح
  • ملعقة صغيرة زيت مشمش
  • ملعقة صغيرة زيت ليمون
  • 1/ 2 ملعقة زيت ورد


الطريقة:
بتسيّحي الزبدة في حلة ستانلس ستيل على النار، وبعد كده بتبدئي تضيفي زيت الليمون، وزيت المشمش، وزيت الورد، وتقلّبيهم مع بعض على النار لمدة دقيقة، وبعد كده صبّي الكريم في برطمان زجاجي، وحطّيه في الثلاجة علشان يتجمّد، بس خلّي بالك إنك تغطي البرطمان كويس؛ علشان ما يتأثرش بالروائح اللي موجودة في الثلاجة.

وبتستخدمي الكريم ده كل يوم بعد ما تاخدي الشاور بتاعك، وبتسيبيه على جسمك طول الليل، والصبح بتاخدي الشاور العادي بتاعك؛ ولكن خدي بالك إن الكريم ده لبشرة الجسم، يعني ما ينفعش تستخدميه لبشرة الوجه، والكريم ده له فوايد كتيرة جدا؛ لأنه بيحتوي على زيت الليمون اللي بينعّم وبيروّق الجلد، وكمان زيت المشمش بيساعد على ترطيب الجلد وتنعيمه، وكمان زيت الورد اللي بيفتح البشرة ويدّيها نضارة، وكمان نسبة اللبن اللي موجودة في الزبدة مفيدة جدا للبشرة.

 


كريم الزبدة والسكر البودرة.. لتنعيم وسنفرة الجسم
لسه مكمّلين مع بعض ماسكاتنا اللي بنعملها بالزبدة الصفراء، ودلوقتي هنعمل ماسك تاني بالزبدة والسكر البودرة..

المكوّنات:

  • 2 ملعقة كبيرة زبدة صفراء
  • 2 ملعقة صغيرة سكر بودرة
  • ملعقة صغيرة زيت ورد
  • عصير ليمونة ونصف

الطريقة:
سيّحي الزبدة على نار هادية، وبعد كده ضيفي عصير الليمون، وارفعي الحلة مِن على النار، وقلّبي الزبدة كويس أوي مع عصير الليمون، وبعد كده ضيفي زيت الورد، وفي الآخر حطّي السكر البودرة، وقلّبي المكوّنات كويس أوي لغاية ما السكر يذوب تماما مع الزبدة.

وأنا بانصح إننا نستخدم الكريم ده مرتين في الشهر؛ يعني مرة كل 15 يوم بعد الشاور، وبتعملي به زي مساج على الجسم في حركات دائرية في الاتجاه مِن تحت لفوق، وبتسيبيه على جسمك لمدة ساعة، وبعد كده تشطفيه، وبجد هتحصلي على نتيجة هايلة جدا، وهتحسّي بنعومة وروقان في بشرة جسمك.

 

لبن جوز الهند.. نعومة وترطيب للبشرة والشعر
لبن جوز الهند مِن الحاجات المفيدة جدا للبشرة والشعر، ولكن بما إننا في حلقتنا النهارده بنتكلّم على بشرة الجسم، هنعمل دلوقتي ماسك أو لوشن للجسم بلبن جوز الهند..

المكونات:

  • فنجان لبن جوز الهند
  • ملعقة كبيرة عسل نحل

الطريقة:
كل اللي عليكي إنك تخلطي المكوّنات دي مع بعضها، وتقلّبيهم كويس أوي، وبتوزّعيه على جسمك كله، واللوشن ده ممكن تستخدميه الصبح أو بالليل؛ لأنه مش بيحتوي على أي زيوت، يعني ممكن تستخدميه الصبح قبل ما تنزلي الشغل أو الجامعة، وبتسيبيه على البشرة من ربع ساعة لساعة كاملة.

 


وبكده تكون خلصت حلقتنا النهارده..
أتمنّى إنها تكون عجبتكم وتستفيدوا منها..
في انتظار تعليقاتكم وأسئلتكم،،،
وما تنسوش تبعتوا لنا أفكاركم الجميلة اللي ممكن نعملها علشان بلدنا مصر

*********************
للرجوع للحلقات السابقة
اضغط هنا
“جمالك من الطبيعة مع رانيا”
********************* 


< >