الرئيسية > صحة وجمال > قمر 14 > الحمص المطحون.. سنفرة طبيعية لكل أنواع البشرة

الحمص المطحون.. سنفرة طبيعية لكل أنواع البشرة

ماسك الطمي بيغذّي البشرة جدا وبيشيل الحبوب الصغيرة

أعدّه للنشر: مها مصطفى

أهلا بكل بنات “قمر 14″ في حلقة جديدة من حلقات “جمالك من الطبيعة مع رانيا”، وحلقتنا النهارده هنتكلّم فيها عن الروتين الأسبوعي للعنابة ببشرة الوش والجسم.

وفي البداية عايزة أؤكد إن معظم الماسكات اللي بنعملها لبشرة الوجه بتنفع كمان لبشرة الجسم، لكن مش العكس.

ودلوقتي تعالوا نشوف إيه الماسكات الطبيعية اللي ممكن نعملها لبشرتنا، في الروتين الأسبوعي للعناية بها.

الحمص المطحون لسنفرة البشرة
المقادير:

  • ملعقة كبيرة حمص شام مطحون
  • نص ملعقة زيت ورد
  • مية سخنة

الطريقة:
هنخلط الحمص المطحون مع زيت الورد، وبعد كده نضيف مقدار مناسب من الميه السخنة؛ بحيث إننا لما نقلّب الخليط مع بعضه يدّينا عجينة ليّنة ومتماسكة في نفس الوقت

نبدأ نفرد الماسك ده على الجسم كله، وفي الأول بنحط طبقة من الماسك، ونسيبها لمدة 5 دقايق لحد ما تنشف، وبعدين نحط طبقة تانية، وأسيب كمية من العجين عليها، ونسيب الماسك على جسمنا من نص ساعة إلى ساعة، وبعدين نشطف جسمنا بالميه كويس.

الماسك ده ممكن نستخدمه على بشرة الوجه والجسم بعد ما نغسلهم كويس جدا، وهو بيستخدم كسنفرة لكل أنواع البشرة، وكمان مفيد جدا في إزالة تجاعيد البشرة، وبنعمله مرة واحدة أسبوعيا، ومع المواظبة هتحصلي على بشرة ناعمة ومعطرة جدا.

ماسك الطمي مغربي
المقادير:

  • طمي مغربي
  • ميه سخنة

الطريقة:
هنحط الطمي المغربي -وطبعا أفضل طمي اللي بيكون لونه غامق- وبنضيف عليه مقدار من الميه السخنة علشان الطمي يذوب.

الماسك ده بينعّم البشرة ويفتّحها جدا، وكمان بيغذّيها وبيشيل الحبوب الصغيرة اللي بتبقى موجودة تحت الجلد.
 

 

نصائح للتغلّب على اسمرار المناطق الحساسة
من المهم جدا إن الماسكات اللي بنستخدمها للوجه نحطها على المناطق الحساسة؛ لأن ناس كتير بتشتكي من السمار في المناطق دي، وعايزة أوضح إن اللي بيعمل سمار في المناطق دي عدة عوامل؛ منها:

1- عدم العناية الشخصية؛ يعني ناس كتير بتستخدم مزيل للعرق قبل ما تنام، ومابتهتمش تاخد شاور يومي قبل النوم.

2- المناطق دي مش بيوصل لها تهوية كافية، زي باقي أجزاء الجسم.

3- عدم الاهتمام بالمناطق دي بعمل ماسكات سنفرة أو مرطبة؛ زي اللي بنعملها للوش والجسم.

علشان كده بأؤكد مرة تانية إن أي ماسكات بنعملها لبشرة الوش، ممكن نستخدمها للعناية بالمناطق دي.

 

 

وبكده خلصت حلقتنا النهارده..
استنونا الحلقة الجاية علشان نتكلّم عن تنظيم الماسكات..
وماتنسوش تبعتوا لنا رأيكم في الحلقة..
وكمان كل الأسئلة اللي عايزين تعرفوا إجابتها..
سلام،،،