الرئيسية > صحة وجمال > قمر 14 > حمام كليوباترا لترطيب الجسم ودهن الآس لتطويل الشعر

حمام كليوباترا لترطيب الجسم ودهن الآس لتطويل الشعر

مكمّلين معاكم الحلقات الخاصة بتجهيز العروسة

أهلا بكل بنات “قمر 14” في حلقة جديدة من حلقات الشهر الكريم..

والنهارده لسه مكمّلين معاكم الحلقات الخاصة بتجهيز العروسة..


والنهارده معانا ماسكات لتكثيف وتنبيت الشعر..


ولسه معانا ماسكات للجسم والوجه..


وحاجات كتير لتعطير الجسم؛ تابعونا.

طرق تعطير جسم العروسة
فيه طرق كتير ممكن كل عروسة تعملها علشان تعطَّر جسمها بجانب البرفانات والمعطّرات المعروفة، ودي بتكون عبارة عن أحجار أو مكعبات عطور مصنوعة من زيوت عطرية طبيعية جدا، وريحتها بتكون حلوة جدا، وبيكون فيه منها أنواع وروائح مختلفة، يعني فيه برائحة البرتقال أو العود أو الفانيليا.

والمكعبات دي بنلاقيها عند محلات العطارة الكبيرة، وبتكون سعرها مش غالي، وتأثيرها قوي جدا وبيدوم لفترات طويلة.

فيه مكعبات صغيرة في علب بتكون مصنوعة في الهند أو باكستان أو إيران، والمكعبات دي بيكون فيه منها روايح كتيرة، ودي بنستخدمها لتعطير وتبخير المنزل أو لتبخير الشعر، وبتكون أسعارها مش غالية يعني في حدود من 10 : 20 جنيها.

ممكن العروسة تجيب من المكعبات دي وتحطّها على الفحم في المباخر الفخار، وتعطّر بيها الملابس في يوم الحنة وكمان شعرها، ودي من الطقوس الحلوة أوي للعروسة في ليلة الحنة.

فيه كمان منها أحجار زيتية عبارة عن عطور زيتية طبيعية بروايح مختلفة، ودي بنستخدمها لتعطير الجسم، وبرضه سعرها مش غالي يعني بتتراوح من 5 : 10 جنيهات.

وطريقة استخدامها إننا أثناء ما بناخد الشاور نحط المكعبات دي في مكان فيه تدفئة، وده علشان الزيوت اللي فيها تبدأ تسيح، وتبقى سهلة الاستخدام على الجسم، وبعد ما نخلص الشاور ومن غير ما ننشف جسمنا هنمرّر المكعب ده على الجسم كله، وهو مندي من أسفل لأعلى بس بحركات سريعة، وبجد هتلاقوا ريحته حلوة جدا، وهيدِّي للجسم ريحة حلوة تدوم لفترات طويلة، وكمان هتدِّي ملمس حلو لأنها زيتية.

 

حمام كليوباترا لترطيب الوجه والجسم
المقادير:

  • ملعقة لوز مطحون
  • ملعقة شوفان مطحون
  • ملعقتين لبن بودرة
  • ملعقة زيت ورد أو ماء ورد مركز أو عادي
  • مقدار مية مناسبة للعجن

الطريقة:
هنخلط المكوّنات دي مع بعض؛ وهي بتكون مقادير متساوية، بس نسبة اللبن هتكون الضعف، وممكن نحط إضافات تانية؛ زي مثلا ملعقة من حبوب اللقاح المطحونة، أو ملعقة من جنين القمح مطحون، وأنا بافضل إننا نكتفي بالمكونات دي بس، وهتكون هايلة إن شاء الله، والخلطة دي نقدر نحتفظ بيها في برطمان زجاج في الثلاجة، ونسيبه ممكن لمدة 6 شهور.

هنعجن المكوّنات دي مع زيت الورد والمية، ويفضّل إنها تكون سخنة، وهنقلّبهم لحد ما يبقوا عجينة لينة ماتكونش يابسة أوي ولا سايلة أوي، ولو حسيتي إنها بقت سايلة ممكن تزوّدي من المكونات الجافة تاني والعكس صحيح.

بعد ما ناخد الشاور ويكون الجسم نظيف تماما هنحط الماسك على الوجه والجسم، ونسيبه على الوجه لمدة نصف ساعة فقط وعلى الجسم ممكن نسيبه لحد ساعة كاملة، ونراعي إننا في خلال نصف المدة يعني بعد ربع ساعة بالنسبة للوجه ونصف ساعة للجسم هنفرك بيه البشرة، وبعدين نحط منه طبقة تانية ونسيبها لحد ما تنشف، وبعد كده نشطف جسمنا بالمية فقط، وبجد هنلاقي نتيجة هايلة جدا من نعومة فائقة وريحة عطرة وترويق وتطرية وتغذية للبشرة.

والماسك ده ممكن نستعمله بعد ما نغسل جسمنا بصابون الطمي والعسل اللي قدّمناه في الحلقة اللي فاتت؛ لأن زي ما قلنا إن أي ماسكات لتفتيح وترويق البشرة يفضّل إننا نستخدمها بعد ما نستخدم صابون الطمي.

 

دهن الآس لتنبيت الشعر
الزيت ده هنلاقيه عند العطار، وهو مش متوفّر أوي لكن موجود عند العطّارين، وهو سعره  تقريبا 24 أو 25 جنيها للخمسين أو الثلاثين مل، وهو لونه أخضر وله رائحة نفّاذة شوية ولكنه مفيد جدا للشعر لأنه بينبت ويطول الشعر، وإحنا ممكن نعمله حمام زيت لشعرنا زي أي زيت، يعني هنغسل شعرنا كويس، وبعدين نحط منه كمية وفيرة على الشعر، ونسيبه من ساعة لساعة ونصف وبعدين نغسله، وإن شاء الله هيجيب نتيجة هايلة، وممكن نعمله مرتين في الأسبوع، وأنا بافضل تبقى مرة واحدة فقط؛ لأن الزيت ده من الحاجات القوية جدا.

ممكن الزيت ده نضيف له إضافات تانية علشان يدّي نتيجة قوية للشعر؛ يعني مثلا ممكن نحط زيت الحشيش وهو بيكون لونه أخضر، أو ممكن كمان زيت الحية (التعبان) وده بيكون لونه أصفر، ولازم نخلّي بالنا إن الزيوت دي من نوعية الزيوت اللي لازم نحتفظ بيها في التلاجة، والزيوت دي لها رائحة صعبة شوية ولكنها مفيدة جدا للشعر، بس طبعا مش بانصح أي عروسة إنها تستخدم الزيوت دي.

وأنا بافضل إن لو البنت لسه فاضل على فرحها وقت إننا نستخدم الخليط ده، ونعمل حمام زيت مرتين في الأسبوع لمدة 3 شهور؛ وده علشان ينشط ويحفز بصيلات الشعر والشعرة تاخد وقتها في التنبيت وينمي الشعر أكتر ويقوّيها، وبعد ثلاث شهور هنعمله مرة واحدة فقط في الأسبوع.

وبالنسبة للعروسة بعد الجواز ممكن تعمله مرة في الأسبوع، بس طبعا لازم تراعي إنها تشطف شعرها بالأعشاب العطرية زي اللافندر أو الكاموميل، وتسيب شعرها يتهوّى علشان تتخلّص من الرائحة الصعبة، وممكن كمان إنها تبخر شعرها زي ما قلنا في أول الحلقة.

حمام زيت الآس والحية والحشيش
المقادير:

  • 25 جم دهن الآس
  • 25 جم دهن الحية (التعبان)
  • 25 جم زيت الحشيش

الطريقة:
هنخلط مقادير متساوية من الزيوت، ونعمل حمام الزيت بعد ما نغسل شعرنا ونسيبه لمدة من ساعة إلى ساعة ونصف وبعدين نغسله.

 

 

خلصت حلقتنا النهارده..

وكل سنة وكلكم طيبين..

وعيد سعيد عليكم،،،

*********************
للرجوع للحلقات السابقة
اضغط هنا
جمالك من الطبيعة مع رانيا

*********************

 

كبسولة لصحتك

رجيم الزبادى