الرئيسية > صحة وجمال > قمر 14 > مع رانيا.. إجابة الأسئلة اللي بتحيرك عن بشرتك وشعرك

مع رانيا.. إجابة الأسئلة اللي بتحيرك عن بشرتك وشعرك

جمالك من الطبيعة مع رانيا

أعده للنشر: رحاب سليمان

أهلا بكل أصدقائي وأصدقاء “قمر 14″ في حلقة جديدة من حلقات “جمالك من الطبيعة مع رانيا”

وعدتكم الحلقة اللي فاتت إني هكمّل الرد على بعض الأسئلة اللي بتوصلني منكم..

تابعوني في الحلقة دي علشان تعرفوا الإجابة على كتير من الأسئلة اللي بتدور في بالكم..


  • أنا عندى المنطقة حول الفم غامقة.. أعالجها إزاي؟

زي ما قلنا إن معجون الأسنان بيحتوي على مادة الفلورايد اللي بتغمّق البشرة، وعلشان كده لازم نغسل المنطقة دي بالصابون بعد ما نخلص غسيل الأسنان، بالإضافة لماسكات التفتيح اللي قلنا عليهم قبل كده في حلقاتنا.

  • أنا زوجي عنده حبوب صغيرة في منطقة الجبين، مفيش وسيلة لإزالتها؟

علشان نشيل الحبوب دي هنعمل كمادات بمغلي الميه والملح، وبعدين نشطف البشرة بميه ساقعة، وبعد كده نحط كمادات خيار علشان ترطب وتهدّي البشرة، وممكن نعمل ماسك العسل وزيت كبد الحوت وده قلت عليه قبل كده بس لحالات معينة، لما تكون الحبوب قريبة من الدمامل، وممكن يجرب الماسك ده مرة واحدة لو جاب نتيجة يبقى ممكن يستمر عليه، ولو ماجابش يبقى يواظب على كمادات الميه والملح يوميًّا، بس يكون بالليل، علشان مهم جدا مايتعرضش للشمس.

والملحوظة دي لازم نتّبعها مع الملح أو الليمون أو النشادر أو مية الأوكسجين؛ وهي إننا مانتعرضش للشمس أو أي ضوء مباشر أو حتى ضوء الكمبيوتر.

  • إزاي استخدم بذر القطون؟

زي ما قلنا بنحط ملعقة واحدة من بذر القطون في فنجان ميه سخنة، ونسيبه من بالليل للصبح في الثلاجة، وبعد كده هناخد الميه دي وندهن بها منطقة حول العين من جوه لبره، ودي أصحّ طريقة لاستخدام أي كريم للعين.

وبذر القطون بيُستخدم لإخفاء الخطوط الرفيعة تحت العين، وتفتيح الهالات السوداء. والبذر ده ممكن نستعمله زي ما هو وممكن نطحنه والاتنين كويسين أوي وبيعملوا نتيجة هايلة.

  • إيه استخدامات زيت الخروع؟

زيت الخروع من الحاجات المفيدة جدًّا لفروة الرأس، يعني ممكن تغسلي شعرك مرتين عادي وتدهني جذور الشعر بزيت الخروع وتسيبيه 3 أو 4 ساعات أو يوم كامل وبعدين تغسليه، وكمان زيت الخروع مفيد جدًّا للأظافر، لأنه بيفيدها ويقوّيها ويغذّيها ويطوّلها.
 

  • هل فيه ضرر إني استخدم بنج موضعي مع السويت؟

مفيش مشكلة إنك تستخدمى البنج، وكمان فيه حاجة تانية أسهل لإزالة الشعر دون ألم وهي الشمع، وكل ما الشعر يكون قصير، هتكون إزالته بالشمع بسرعة ومن غير ألم.

 

  • هل ممكن نعمل ماء الورد في البيت؟

طبعا ممكن نعمله في البيت! وقريب أوي هقول لكم إزاي نعمل شامبو في البيت، وكمان شاور جل وكتير من أسرار التجميل إن شاء الله.

  • هل لازم نسخن الزيت قبل ما نعمل حمام زيت لشعرنا ولّا لأ؟

فيه زيوت تستلزم إننا نسخنها قبل الاستعمال، وزيوت تانية مابتحتاجش تسخين وأنا بانبّه على الزيوت اللى بتحتاج لتسخين مع الوصفة وبقول ساعتها، ولو ماقلتش يبقى مش هتحتاج.

  • ماسك الحلبة والزبادى استمر عليه قد إيه؟ وأنا شعري بيتساقط وفيه قشرة أعالجه إزاي؟

زي ما قلنا إن أي علاج للشعر لازم نواظب عليه مدة طويلة، علشان يجيب نتيجة كويسة، وبالنسبة للماسك ده فهو بيغذى وينعم الشعر. لكن علشان مشكلة التساقط ممكن تعملي الماسك الثلاثي، اللي هو عبارة عن زيت جرجير مع زيت جوز الهند وزيت الثوم، وكمان ماسكات تانية من اللي قلنا عليها. ولسه هاقدم لكم ماسكات تانية لتساقط الشعر في الفترة الجاية إن شاء الله.

وبالنسبة لمشكلة قشرة الشعر، فمن الحاجات المهمة اللي بتعالجها هي خليط الخل مع الخميرة والعسل، والماسك ده بيفوّر القشرة وبيقوي جذور الشعر.

  • عايزة حاجة لكثافة الشعر؟

هتلاقي ماسكات كتيرة في الحلقات اللي فاتت لتكثيف الشعر، ومن الماسكات السريعة اللي بتكثّف الشعر ماسك العسل وزيت الزيتون وده بيجيب نتيجة سريعة.

  • أنا شعري أسود غامق.. هل الحنة ممكن تعمل لون؟

بالنسبة للشعر الأسود الحالك هو مش هيتأثر بالحنة أوي، ولكن هتعمل له زي ضي كده يظهر في الشمس، وعلشان يبان فيه اللون هيحتاج لمرات كتيرة من الحنة أو تعملي صبغة، ودي أنا مش بفضلها أوي؛ لأنها بتدمر الشعر، ولكن ممكن تصبغي شعرك مرة واحدة بس أهم حاجة ماتكونيش عاملة حنة لأن اللون ممكن يقلب برتقالي، والأفضل إنك تستعملي الحنة وتستمري عليها لمدة 3 شهور لو بتكرريها مرة أو مرتين في الأسبوع وده هيجيب نتيجة إن شاء الله.

  • عايزة برنامج للعناية اليومية؟

تابعونا الفترة اللي جاية هقول لكم على برامج للعناية اليومية، وكمان مع دخول الصيف هنعمل برامج يومية وأسبوعية، وإن شاء الله تستفيدوا منها.

  • عايزة أعرف ماسك لتفتيح البشرة؟

قدمنا ماسكات كتيرة لتفتيح البشرة في الحلقات اللي فاتت، ومن الماسكات الهايلة للتفتيح هو ماسك الأرز وحبة البركة.. جرّبيه وإن شاء الله هتلاقي نتيجة هايلة.

  • أنا عندي مشكلة في الشعيرات الدموية في الرِجل؟

بالنسبة للمشكلة دي أحسن حل ليها هو الليزر، وبتحتاج لدكتور ليزر كويس، ومش بيوتي سنتر؛ لأنها لو ما اتعملتش بشكل مضبوط ممكن تعمل مشكلات أكتر، وممكن تدلكي رِجلك بخل التفاح ولكنها مش هتعمل النتيجة المطلوبة زي الليزر، فالأفضل إنك تعالجيها بالليزر.

  • عايزة أعرف أستخدم الفتلة كل أد إيه؟ وهل هي بتعمل تجاعيد للبشرة ولّا لأ؟ وهل ممكن أزيل الماكياج بمية الورد؟

الفتلة ممكن نعملها كل شهر وهي مش بتعمل تجاعيد للبشرة نهائي، ودي معلومة غير صحيحة، ولكن اللي ممكن يسبب التجاعيد هي السويت، ولو البشرة حساسة بتعملي ماسك بعد الفتلة بيوم ولو البشرة عادية ممكن تحطي مية ورد على بشرتك بعد الفتلة مباشرة.

 وبالنسبة لمية الورد مش بنشيل بيها الماكياج بس ممكن نحطها بعد ما نزيل الماكياج بمزيلات الماكياج العادية أو بالمية والصابون، ولكنها مابتشيلش الماكياج بس بترطب البشرة بعده.

  • إزاي أعالج الخطوط الرفيعة تحت العين؟

المداومة على ماسك بذر القطون وكمادات الخيار بيروّقوا المنطقة دي جدًّا، وأهم حاجة مانرهقش نفسنا كتير ونحافظ على النوم بدري وبفترات جيدة ونقلل من شُرب الشاي والقهوة ونهتم بتغذية وترطيب البشرة.

 

وبكده تكون خلصت حلقتنا النهارده

أتمنى إنكم تكونوا استفدتم منها

واستنونا في حلقات تانية هنقدم لكم ماسكات جديدة ونرد على كل أسئلتكم

سلام،،،

 

*********************
للرجوع للحلقات السابقة
اضغط هنا
“جمالك من الطبيعة مع رانيا”
********************* 


كبسولة لصحتك

رجيم الماء