ألوان استايل لحوائط بيتك

انا بجد محتارة جدا انا عندى الشقة بتاعتى 148 متر وكان نفسى اعملها كويسة وتطلع جميلة انا اخترت غرفة الاطفال ازرق فى تركواز فاتح واعمله على شكل موجة كده وكنت عايزة اعمل صالة لونها اورانج مش فاقع اوى غامق فى لؤلوى ومش عرفة اعمل ايه وغرفة النوم بتاعتى ممكن اعملها روز غامق فى روز فاتح وممكن اعمله زهرى معرفش انا محتارة فى الوان سيراميك وصالة ياريت تفيدينى انتى لذيذة اوى وردك جميل يا رب يسعدك وانتى فعلا درجة الالوان اللى بتقوليها تحفة بس خوف ماتطلعش زى ما انا عايزة ومطبخ وحمام معرفش اعملهم ايه ارجوكى ردى عليا لانى بعمل الايام دى وشكرا يا جميل على موضوعك الشيق ده.

============

رد بص وطل:
بالنسبة لألوان غرفة الاطفال فهي كويسة ومبهجة، أما بالنسبة لألوان غرفة المعيشة فيفضل إنك تحدديها بعد ما تختاري الفرش اللي هتحطيه فيها ويفضل إن لون الغرفة يكون بافتح درجة من درجات الفرش الموجود، أما بالنسبة للون غرفة النوم فإنتي ممكن تعمليها روز فاتح في زهري، أما بقى بالنسبة لألوان المطبخ فزي ما قولنا يفضل إنك تختاري ألوانه غامقة لإن الألوان الفاتحة بيبان فيها البقع بسرعة، أما بقى بالنسبة لألوان الحمامات ففيه دلوقتي ألوان ودرجات كتير وده بيرجع لذوقك وياريت تتابعينا لإن قريب جداً هيكون عندنا عدد عن ألوان السيراميك فياريت تتابعينا.

شكرا علي الموضوع الرائع فعلا استفدت منه وعايزة اسال عن حاجة انا هاعمل الريسبشن كافيه مع نبيتي والشكل العام هايبقى حيطة في وش الباب فيها لاريهات بين النبيتي والكافيه وحيطه في وشها نبيتي وباقي الحوائط كافيه مع عمودين نبيتي وقلم من فوق نبيتي هل كده كويس ولا اعكس واخلي اغلب الحوائط هي النبيتي مش الكافيه والكافيه لون لحيطة واحدة ولون للعمودين كمان اوضة النوم عملتها سيمون واتعملت البطانة فعلا فكان بيقترحوا ان يتعمل لون نبيتي في حيطة في اوضة النوم علي اساس خلفية وعليها بفرشه ذهبي حاجات خفيفة علي الحيطة النبيتي بس انا حاسة ان النبيتي مايمشيش اطلاقا مع السيموني وشايفه ان البستاج او البني الغامق افضل فلو يليق علي حاجة فيهم فاي درجات السيمون فاتح او غامق وايه اللون اللي معاهم علما بان اوضة النوم البني الغامق.

===========

رد بص وطل:
ميرسي ليكي صديقتنا العزيزة ونتمنى إننا نقدر نقدم لكم دايماً موضوعات تفيدكم، وبالنسبة لسؤالك فاختياراتك في ألوان الريسبشن كويسة، ومش محتاجة تعكسي الألوان، أما بالنسبة لغرفة النوم فالأفضل إنك تدخلي مثلا سيمون فاتح مع سيمون غامق او مع بني غامق.

غرفة المعيشة لونها موف فاتح والموكيت لونه كحلى اعمل الستائر بلون ايه وكذلك لون الكنب اعمله ايه.

============

رد بص وطل:
الأفضل إنك تختاري المفروشات بألوان فاتحة يعني زي البيج أو الاوف وايت.

كل اللى قولتيه جميل بس بالنسبة للانتريهات ايه الموضة ياريت اعرف.

================

رد بص وطل:
ميرسي ليكي يا جميل على ذوقك ويا ريت تتابعينا وإن شاء الله تلاقي عدد قريب جداً عن أحدث موضة للانتريهات.

بجد نصائحك كتير حلوة بس أنا عايزة اعرف أنا عندي غرفه النوم موف فاتح والسيراميك بيج وغرفه الاطفال روز فاتح فى غامق والريسبشن لونه كريمى ومحتاره فى غرفه المعيشه اعمل لونها ايه هى والبلكونات ياريت تفيدينى وتعطينى رأيك فى تنسيق الألوان.

==============

رد بص وطل:
بالنسبة لغرفة المعيشة يا مها فإنتي تقدري تعمليها بلون أفتح درجة من درجات الفرش اللي موجود فيها.

السلام عليكم واضح ان ذوقك عالى جدا وانا محتاجة لمشورتك لإنى محتاسة انا بدهن شقتى وشفت لون سيمون محمر للحيطة والسقف مع لون كريمى لكورنيشة السقف وبدأ النقاش فعلا بوضع البطانة حسب اللون السيمون وبعدين اتلغبط عشان لون الستاير على مشمشى محمر هادى وكنت عايزة اعمل بلتكانات درابية غامق فى فاتح وحسيت انى عكيت افيدونى ارجوكم قبل وضع الوش الثانى لانى لسه ممكن اغير، لون ارضية الريسبشن كافيه في بيج والحجرات على برتقالي وكنت بفكر تكون حجرة الأولاد عارضتين برتقالي والعارضتين التانيين على اصفر او كريمي ايه رأيك اديني تصورك للون الحوائط والبلتكانات الحقونى بسرعة ارجوكم.

================

رد بص وطل:
صديقتنا العزيزة، حاولي يبقى فيه تناسق شوية بين الألوان، وحاولي تدمجي الفاتح مع الغامق يعني بلاش تخلي الدنيا كلها لن واحد يعني لون الحيطان نفس لون الستائر نفس لون السقف، يعني ممكن تخلي لون الحيطان على بيج بنفس درجة الأرضية، وتعملي الستائر باللون اللي إنتي عايزاه، أما بالنسبة لغرفة الأطفال فحاولي تختاري لها لون زاهي ويفضل إنك تعملي الغرفة كلها بلون واحد وممكن تستخدمي رسومات على الحوائط علشان تدي للغرفة طابع مرح.

بجد ما شاء الله على الموقع ده (بص وطل) شامل جميع المجالات انا بس عاوزة اعرف لو الشقة بتاعتى ضيقة فى الوان ممكن احطها تحسسنى بالوسع شوية وفى الوان احطها احس ان الشقة ضيقة جدا؟؟؟

===============

رد بص وطل:
ميرسي ليكي يا ميرا جداً على ذوقك، وبالنسبة لسؤالك فمن المعروف طبعاً إن الألوان الفاتحة بتدي وسع للشقة، وكمان فيه ديكورات بتتعمل علشان تدي غيحاء إن الشقة واسعة.

شكرا وربنا معاكى انا اشتريت شقة بس من عام 85 يعنى قديمة وسيراميك قديم عايزة اجدد وطبعا بمساعدتك عايزة الوان تعطينى احساس ان الشقة من 2010 بليز هى غرفة اطفال وغرفة نوم وريسبشن هيبقى فى انترية والسفرة والمطبخ اعمله مفتوح على الريسبشن ولا ايه بليز ساعدينى.

================

رد بص وطل:
صديقتنا العزيزة تقدري تقري العدد وهتلاقي فيه كل المعلومات اللي إنتي عايزاها وكمان الألوان الموضة السنة دي.

شكرا على المعلومات دى يا جميل انا عندى شوية استفسارات انا هعمل غرفة الاطفال موف غامق فى موف فاتح والنوم فزدقى مع تعتيق والصالة نبيتى والسيراميك لونه عسلى بلمعة ايه رايك بس عايزة اعرف لون لغرفة الصالون وشكرا ليكى.

==============

رد بص وطل:
حلوة جداً الألوان وبالنسبة لغرفة الصالون فإنتي ممكن تعمليها بلون افتح درجة من درجات الفرش اللي هتحطيه فيها.

شكرا كتير لردك
انا عندى بلاط الشقة لونه بيج هل ممكن يليق بلون الحائط الموف
وارجو ان تقترحى على الالوان اللى تليق بيه.

===============

رد بص وطل:
ايوة طبعا الموف يليق مع البيج جداً.

بجد شكرا على الموضوع عندى سؤال انا عايزة اعمل لون غرفة النوم اللون الموف فى الحائط مع ستائر روز والمفارش وطبعا الاثاث بنى اما الريسبشن لون البيستاج.. ارجو منك الرد.

================

رد بص وطل:
الالوان دي جميلة ومتناسقة.

السلام عليكم الموضوع شيق جدا وانا كنت عاوزة عنوان وتليفون مكتب مي علشان عاوزة أخليها تعمل لي الشقة عندي.

===============

رد بص وطل:
ميرسي ليكي صديقتنا العزيزة وده رقم تليفون مهندسة الديكور مي عصمت 0115741124

جميل جدا ورائع وميرسى كتيير عل المجهود اللى بتعملوه وعلى مشاركه النجمه الجميله ايمان ده شىء يسعدنا حقيقى بس انا كنت عايزة اسال هى نانيس مش هتشارك معانا تانى ولا ايه؟

==============

رد بص وطل:
ميرسي ليكي يا هوبة، وبالنسبة لنانيس سليم فهي في حالياً مشغولة مع البيبي الجديد وإن شاء الله تبقى معانا تاني في أقرب وقت، ونتمنى إننا نكون بنقدم لك دايماً كل اللي يفيدك ويهمك.

بجد ميرسى على الموقع الجميل ودايما تكونوا الافضل انا عندى سؤال انا شقتى 90 م وعملت سيراميك الارضيات بيج زى الرخام بس انا محتارة اعمل الوان الحيطان ايه لو عملت غرفة النوم روز والخشب بنى وغرفة الاطفال دهان موف والخشب ابيض فى روز هتبقى حلوة والريسبشن محتارة فى لونه ممكن تساعدينى انا اسفة انى طولت عليكم ياريت تردى عليّ لإن هنبتدي في الدهان ياريت تقولي لي رأيك.

=================

رد بص وطل:
ألوان الحيطان دي حاجة بترجع لذوقك وكمان لألوان الفرش اللي هتحطيه في كل غرفة وبالنسبة للريسبشن فالأفضل إنك تختاري لون هادي مريح للعين ويكون أفتح من نفس درجات الفرش أو لون يليق معاه.

موضوع جامد جدا و مفيد أوي بس ِأنا بكرر طلب ساسو بانكو تطعموه بالصور المره الي جيه و شكرا اوي

انا شقتى صغنونة 70م هعمل الغرف كلها بيج بس عايزة اعرف لون السيراميك لونه اية بتاع الحمام والمطبخ وارضيات الشقة والخشب هجيبه مودرن لون الخشب بنى غامق وهعمل المطبخ الومنيوم عايزة اعرف لون الالومنتال اعمله ايه حددي لى اللون عشان همشى عليه معلش على الطلبات دي

================

رد بص وطل:
يفضل إنك تعملي لون الألومنتال غامق شوية علشان يتحمل البقع والأتربة.

ده موضوع جميل جدا وانا كنت محتاجاه و عندى سؤال دلوقتى انا صالتى مربعة وهاحط ان شاء الله فيها الانتريه ولونه اسود مع فضى ومع الانتريه السفرة اللى لونها دهبى والسجادة لونها زيتى مع بيج يا ترى اقدر الون حيطان الصالة بلون ايه مع العلم انها مربعة ياريت تفيدونى ضرورى.

============

رد بص وطل:
بصي يا نونو ممكن تعملي الحيطان بلون فاتح يمشي مع لون العفش وبالتالي ممكن تعملي اللون الأوف وايت.

انا كنت عوزة اشوف اشكال لاوض النوم والاطفال والانتريهات ياريت تعملوا فى حلقة جاية عشان اللى عاوز يجهز بس نفسه فى اشكال جديدة اتمنى تعملوه.

===============

رد بص وطل:
طيب تابعينا يا ساسو وإنتي تلاقي كل اللي إنتي عايزاه قريب جداً.

ميرسى اوى ليكم بس عندى سؤال انا محتاره فى الوان حوائط الشقه وبالصدفه انى باعملها الايام دى عاوزه اعرف لو العفش بنى او اللون الكمونى والسيراميك كافيه فى بيج ده بالنسبه لحجره النوم اعمل اللون ايه؟ وكان نفسى اعمل حجره المعيشه اورانج غامق فى بيج بس انتى بتقولى مش موضه طب ايه البديل وياريت حجره الصالون او الانتريه اعملهم ايه؟

=============================

رد بص وطل:

تقدري تعملي لون حجرة النوم درجة البيج اللي في السيراميك، وتقدري تعملي حجرة المعيشة زي مانتي عايزة بس لو كنتي عايزة تعمليه لونين يفضل إن الفرش يكون سادة أو ممكن تختاري لون فاتح من ألوان الفرش وتدهني بيه الحيطة وبرضه هتعملي كده في غرفة الصالون أو الانتريه، عن طريق إنك تختاري درجة فاتحة من ألوان الفرش وتدهني بيها الحيطان.

انا مطبخى مفتوح على الصالة ولونه ابيض ايه اللون اللى استخدمه فى دهان الصالة؟

=======================

رد بص وطل:

تقدري تدهني الصالة أي لون تحبيه بس يفضل إنه يكون لون فاتح علشان يكون متناسق مع لون المطبخ.

بجد ماشاء الله على الموقع دا (بص وطل ) شامل جميع المجالات انا بس عاوزة اعرف لو الشقة بتاعتى ضيقة فى الوان ممكن احطها تحسسنى بالوسع شوية وفى الوان احطها احس ان الشقة ضيقة جدا ؟؟؟
ميرسى جدا.

===========================

رد بص وطل:

ميرسي لمتابعتك لينا يا صديقتي العزيزة، وأرجو منك إنك تقرأي الموضوع كويس علشان هتلاقي إجابة سؤالك فيه، وأهلاً بكل أسئلتك واستفساراتك.

ميرسى اوووى على المعلومات الجميلة دى وبجد انا كنت محتجاها اوووى شكرا

هاى باحلى بص وطل انتى دلوقتى بتقولى ان احنا نعمل اللون حسب الفرش بس الشعب المصرى بيدهن الاول بعدين يجيب الفرش نعمل ايه.

=============

رد بص وطل:
يبقى ممكن تدهني بألوان محايدة تتناسب مع كل الألوان زي البيج والأوف وايت وهما على فكرة موضة أوي.

بجد موضوع جميل اووووي ومرسي ليص وطل

بجد شكرا أوى على الموضوع جامد جدا ودي مش حاجه جديده على بص وطل بس معلش انا عندى سؤال.. لو انا عايزه اعمل البيت كله لون واحد هيبقى حلو له ايه؟ وايه الالوان اللى ممكن استخدمها فى الحاله دي.

===============

رد بص وطل:
ميرسي ليكي على ذوقك ولو إنتي عايزة تعملي البيت كله لون واحد يبقى حاولي تختاري لون يمشي مع ألوان المفروشات والموبيليات اللي عندك ويكون محايد يعني ممكن بيج أو اوف وايت.