الرئيسية > صحة وجمال > قمر 14 > جمالك من الطبيعة مع رانيا.. الروتين اليومي لتفتيح البشرة

جمالك من الطبيعة مع رانيا.. الروتين اليومي لتفتيح البشرة

جمالك من الطبيعة مع رانيا

أهلاً وسهلاً بكل أصدقائي وأصدقاء “قمر 14″…

وكل سنة وإنتم بخير ويارب عيد أضحى سعيد على كل الوطن العربي…

وطبعاً في العيد كلنا بنحب نظهر بمظهر متألّق، ويكون لنا استايل جديد فيه طلّة حلوة، وخصوصاً إن في العيد بيكون عندنا مناسبات كتيرة نحضرها زي حفلات الخطوبة والأفراح، وخروجاتنا مع العيلة وأصحابنا…

علشان كده النهارده هنعمل مع بعض ماسكات كتيرة بمكوّنات طبيعية جداً ومعانا كالعادة وليمة من الأعشاب والزيوت الطبيعية وكمان الفاكهة اللي هتفيد البشرة والشعر والجسم إن شاء الله…


حبة البركة والأرز المطحون لتفتيح الوجه والجسم
أول حاجة هنبدأ بيها حلقتنا مع بعض، هي ماسك هايل جداً لتفتيح ونعومة بشرة الوجه والجسم، يعني ممكن نستخدمه لتفتيح أي منطقة في الجسم لأنه آمن جداً جداً ومع المواظبة عليه بيدي للبشرة لون حلو أوي…

ومكوّنات الماسك ده عبارة عن:

  • 2 ملعقة كبيرة أرز مصري مطحون
  • ملعقة كبيرة حبة البركة مطحونة
  • كوب ماء

طريقة التحضير:
كل اللي عليكي إنك تسخنّي المية على النار وتسيبيها لغاية ما تغلي، وبعد كده بتضيفي الأرز المطحون وتفضلي تقلّبي لغاية ما يبقى الخليط شبه المهلبية، وبعد كده بتضيفي حبة البركة، وتقلبيهم كلهم مع بعض لغاية ما تلاقي الخليط بقى لونه رمادي، وراعي إن الخليط ما يبقاش معجّن ومش جامد أوي.

وبنعمل الماسك ده على بشرة نظيفة جداً، ومغسولة بمية سخنة علشان تفتّح المسام، والبشرة تقدر تتشرب مكونات الماسك، وبعد كده بنبدأ نوزع الماسك على بشرتنا من تحت لفوق في اتجاه فتح المسام، وبنسيب الماسك على البشرة لمدة ساعة، وبعد كده نغسل وشنا كويس وننشفه بطريقة التربيت.

 

الماسك ده من الماسكات اللي لازم نعملها يوم بيوم لأنه لازم يتحط على البشرة وهو سخن ويتحطّ على بشرة نظيفة تماماً، وتكون متعرّضة لكمية كبيرة من البخار.

وبنكرر الماسك ده يومياً لمدة 3 شهور، وفي النهاية هنحصل على بشرة فاتحة وناعمة وفيها نضارة وكمان الزيوت اللي في حبة البركة بتساعد على علاج التجاعيد الصغيرة اللي بتظهر حول منطقة العيون، وكمان بيستخدم لتفتيح المناطق الحسّاسة في الجسم.

وطبعاً ناس كتير هتقول لي إحنا معندناش وقت نعمل الماسك ده كل يوم، بس بجد لما تجربوه بنفسكم وتلاقوا نتيجة كويسة هتتشجعي إنك تعمليه يومياً، وعلشان تسهلي على نفسك ممكن تخلّي عندك كمية كبيرة من الأرز المطحون وتحطّيها في علبة، وكمية من حبة البركة المطحونة في علبة تانية، علشان تسهلي على نفسك أثناء تحضير الماسك.

وميزة الماسك ده كمان إنك ممكن تعمليه في أي وقت من اليوم يعني بالليل أو الصبح براحتك، يعني إنتي بتختاري الوقت اللي يناسبك وتكوني فاضية فيه وتعمليه.

 

برنامج يومي لتفتيح بشرة الوجه والجسم خلال شهر
فيه برنامج حلو أوي ممكن نمشي عليه علشان نفتّح بشرتنا بشكل ملحوظ خلال شهر بالكتير…

والبرنامج هيكون عبارة عن:
- الصبح.. بتعملي ماسك مكوّن من ملعقة كبيرة زبادي وتضيفي عليها نصف ملعقة ليمون وملعقة كبيرة عسل نحل، وبتخلطيهم مع بعض، وتوزعيه على بشرتك بعد ما تنظّفيها، وبتسيبي الماسك على بشرتك لمدة ساعة وبعد كده بتشطفي وشك كويس.

- بالليل.. بتعملي ماسك حبة البركة والأرز اللي قلنا عليه في أول الحلقة.

طبعاً الكلام دي هينطبق على الناس اللي مش بتخرج الصبح ومش بتتعرض للشمس؛ لأن زي ما قلنا ما ينفعش نعمل ماسك فيه زبادي وليمون ونخرج في الشمس.

ناس كتير هتقول ما إحنا ممكن نعكس الماسكات بحيث إننا نعمل ماسك حبة البركة قبل ما ننزل الصبح، ونعمل ماسك الليمون بالليل، لكن الحل ده مش هينفع؛ لأن لازم نعمل ماسك الزبادي قبل ماسك حبة البركة، علشان ماسك الزبادي بيعمل زي “كاسح” بيشيل الدهون والحبوب الصغيرة من على البشرة، فعلشان كده بابقى محتاجة إن ده يتعمل قبل ماسك حبة البركة.

وكمان ما ينفعش نعمل الماسكين ورا بعض على طول لأنهم هيبقوا جامدين أوي على البشرة.

يعني من الآخر كده لو كان عندك وقت إنك تعملي الماسكين واحد الصبح والتاني بالليل بنفس الترتيب اللي قلنا عليه يبقى تمشي على البرنامج ده لمدة شهر، أما بقى لو كنتي بتشتغلي أو بتنزلي المدرسة أو الجامعة وما عندكيش وقت تعملي الماسك الصبح يبقى ممكن تكتفي بماسك حبة البركة وتداومي عليه لمدة 3 شهور.

وفي النهاية هتحصلي على تفتيح ملحوظ لبشرتك، وهتحسي إنها بقت نضرة وناعمة جداً وليها رونق جميل، لأن بجد حبة البركة لها فوايد حلوة جداً سواء كنا بناكلها أو بنعملها في ماسك.

وفي الحلقات الجاية هنقول ممكن نحطّها على إيه في الأكل بحيث إنها ما تضايقناش لأن فيه ناس بتقول إنها ممررة شوية، بس على فكرة المرارة اللي فيها دي لها فوائد جامدة جداً.

 

الليمون والجلسرين.. لبشرة نضرة وفاتحة
واحدة من أصدقائنا بعتت تسألنا إن عندها ليمون وجلسرين ومش عارفة تعمل بيهم إيه؟!

وطبعاً الليمون والجلسرين من الحاجات اللي لما بيتخلطوا مع بعض بيدّوا نتيجة حلوة أوي وبنخلطهم بحيث إن نسبة عصير الليمون تكون أكثر بحوالي الربع، لأن الجلسرين من الحاجات اللي لو استخدمناها لوحدها هتسمّر البشرة.

والجلسرين النقي بيكون سميك جداً ولونه شفاف، وبيكون عامل زي الصمغ.

والخليط ده لتفتيح البشرة وبيدي نضارة حلوة جداً، لكن أنا مش بانصح باستخدامه على بشرة الوش.

لكن ممكن نستخدمه لليدين والقدمين وللجسم كله وننام به، ونغسله تاني يوم الصبح، لكن لازم نتجنب تماماً إننا ندهن الخليط ده على بشرتنا ونتعرض به للشمس.

ومع المواظبة على استخدام الخليط ده بشكل يومي هتحسي بنتيجة تحفة، من أول أسبوع، وخصوصاً مع الإيدين والقدمين.

 

البرتقال والعسل.. حيوية للبشرة والشعر
ده ماسك سهل أوي ومكوناته بسيطة جداً، وميزة الماسك ده إننا ممكن نستخدمه لبشرتنا وشعرنا…

ومكونات الماسك عبارة عن:

  • ملعقة كبيرة عسل
  • 3 – 4  ملاعق كبير عصير برتقال

وطريقة التحضير:
بتسخّني العسل على نار هادية وبعد تقريباً نصف دقيقة، تبدئي تضيفي عليه عصير البرتقال، وتقلّبيهم مع بعض كويس، وبعد كده ترفعيه من على النار.

والماسك ده ممكن نستخدمه بعد الشاور على طول وإنتي في الحمام ولازم الماسك يكون دافيء، وبتبدئي تفرّقي شعرك بفرشة الصبغة، وتاخدي من الخليط وتحطيه على فروة شعرك، وبعد ما تخلّصي تحطي منه على بشرتك، وتسيبيه لغاية ما ينشف شوية وبعد كده تحطي منه طبقة تانية على بشرتك علشان تحسّي إن وشك اتشرّب كله بالخليط ده.

وفيه طريقة تانية ممكن تعمليها وهي إنك تحطّي الخليط ده في زجاجة عطر قديمة عندك، وترشّي منها على بشرتك ورقبتك وأي منطقة في الجسم.

والماسك ده بيساعد على إخفاء التجاعيد بسبب العسل اللي موجود فيه، وكمان بيدي نضارة ونعومة للبشرة والشعر، وميزة الماسك ده إنه مناسب لكل أنواع البشرة، لكن لو بشرتك جافة أوي يبقى ممكن تضيفي عليه 3 نقاط من زيت اللوز الحلو.

 

 

وبكده تكون خلصت حلقتنا…
وأتمنى إنها تكون عجبتكم وتكونوا استفدتم منها…
ومستنية رأيكم وأسئلتكم…
وكل سنة وكلكم بصحة وخير،،،


< >