الحل لكل مشاكل بشرتك بطرق طبيعية مع "رانيا موسى"

الحل لكل مشاكلك هتلاقيه على قمر 14 بماسكات طبيعية جداً قدمتها رانيا موسى خبيرة التجميل بالأعشاب والمواد الطبيعية في الندوة اللي أقامتها ساقية الصاوي واللي جاوبت فيها على كل ما يتعلق بمشاكل البشرة والشعر..

الحبوب
الحبوب مشكلة بتحير وبتضايق ناس كتير، وفي الندوة نصحت رانيا كل الناس اللي بتعاني من مشكلة حبوب البشرة إنهم يستخدموا ماسك حبة البركة…

المكونات:
2 معلقة كبيرة حبة البركة مطحونة
كوب من مغلي زهرة البابونج  “الشيح”
عصير ليمون
بشر ليمون
زيت ليمون

الطريقة:
1- بنشطف البشرة الأول بكمية كبيرة من مغلي البابونج واللي سبق وقلنا طريقة تحضيره، وبنفرد على البشرة -وهي مبلولة بمغلي البابونج- طبقة من حبة البركة المطحونة، وبندلّك بها البشرة في حركات دائرية، لمدة 5 أو 10 دقائق.

2- بعد كده بنخلط كمية من حبة البركة المطحونة مع عصير الليمون وبشر الليمون وزيت الليمون، وبنعمل منهم عجينة متماسكة، وبناخد منها قطع صغيرة ونحطها على الأماكن اللي فيها الحبوب، ونسيبها على بشرتنا لمدة ساعة، وبعد كده نفرك بشرتنا برفق ونشطفها بالماء الفاتر.

لوشن “سحري” لتفتيح الجسم
وصفت رانيا اللوشن ده بإنه اللوشن السحري لتأثيره على تفتيح الجسم وإعطاؤه ريحة عطرة وفواحة بطريقة طبيعية، واللوشن مكوناته بسيطة جداً وهي عبارة عن كولونيا ليمون (555) وبنخلطها مع زيت ورد طبيعي بنسبة ثلاثة لواحد يعني بنحط 3/4 كوب من الكولونيا وربع كوب من زيت الورد، وبنحطهم في زجاجة ونحفظها في الثلاجة، وبندهن منه على الجسم بالكامل والوش لكن مع مراعاة إننا مانتعرضش به للضوء.

انتفاخ العينين
انتفاخ المنطقة حول العينين ممكن نتغلب عليه بإننا نعمل كمادات من اللبن البارد على المنطقة دي، وكمان ممكن نحط شرائح خيار، لكن يفضل إننا نكتفي بكمادات اللبن البارد بالنسبة للبنات الصغيرين؛ لأن الخيار بيستخدم على بشرة أكثر نضجاً.

أعطي لجسمك وغرفتك رائحة عطرة
لو عايزة تهدي أعصابك وتصفي ذهنك، فدي الطريقة اللي وصفتها رانيا وهي إنك تخلطي معلقة من زيت اللافندر مع معلقة من زيت الريحان مع معلقة من زيت الليمون مع مية، وتحطي الخليط ده على الفواحة وتحطيها في غرفتك الخاصة، مع الاسترخاء التام، هتلاقي نفسك هادية ومنتعشة جداً وكمان حالتك النفسية هتبقى كويسة، وممكن تحطي من نفس الخليط ده على ليفة الاستحمام الخاصة اللي بتغسلي بها جسمك، وهتلاقي جسمك بقى له رائحة مميزة وجميلة وهتستمر معاكي لفترة طويلة.

ولغاية هنا خلص عددنا النهارده…
ونتمنى إنكم تستفيدوا منه…
وتبعتوا لنا تعليقاتكم ومشاركاتكم…
واستنوا العدد القادم علشان نكمل مع بعض…
وصفات “رانيا موسى” لعلاج مشاكل الشعر..
والروتين اليومي اللازم اتباعه للحفاظ على تألق ونعومة البشرة والشعر…
إلى اللقاء،،،