الرئيسية > صحة وجمال > قمر 14 > خطوة بخطوة.. اعرفي إزاي تخفي عيوب بشرتك بالماكياج

خطوة بخطوة.. اعرفي إزاي تخفي عيوب بشرتك بالماكياج

ماكياج مناسب للبشرة الفاتحة.. مع إيمان أيوب

أهلاً بيكم في حلقة جديدة، وأنا سعيدة جداً إني هاكون معاكم النهارده، ومعايا ومعاكم النهارده خبيرة الماكياج “سحر شلبي” اللي هنتعرّف معاها على خطوات وضع الماكياج المناسب للبشرة الفاتحة اللي بتعاني من وجود بعض المشكلات اللي بتقابل البنات؛ زي مثلاً مشكلة وجود الحبوب الخفيفة على بعض المناطق على البشرة إلى جانب مشكلات ثانية كتير هنحاول إننا نحلّها بالميك أب..

يلّا بينا نتفرّج ونشوف إزاي…

إزاي تشتري كريم أساس مناسب؟!

هنبدأ نوزّع كريم الأساس على البشرة، ولازم نختار درجة مناسبة للون بشرتنا، ودي هنعرفها بإننا وإحنا بنشتري نعمل اختبار للون على منطقة الخدود، ونراعي إن لون الفاونديشن يكون أفتح درجة أو اتنين بس من لون بشرتنا، ويا ريت يكون معانا لون تاني غامق لمعالجة المشاكل اللي ممكن إنها تكون موجودة في بشرتنا..

الغامق والفاتح لإخفاء العيوب!!

هنستخدم اللون الفاتح تحت العين؛ لعلاج الإرهاق اللي ممكن يظهر نتيجة السهر أو التعب أو الإجهاد، بعد كده بنجيب اللون الغامق علشان نحدد بيه عضمة الفكين…

ولازم يا جماعة ندرج البشرة زي ما وشنا بيقول، ففي الموديل اللي معانا النهارده بنلاقي إن منطقة الخدود عالية، علشان كده هنحاول إننا نحدد عضمتين الخدود باللون الغامق، ونمشي عليهم بالظبط كأننا بنعمل تفحيم للخدود بطريقة دائرية لغاية ما نوصل للودن.

طريقة توزيع كريم الأساس

بنبتدي نوزّع اللون بطريقة التربيت “زي ما هنشوف في الفيديو”، علشان يكون موجود على البشرة كلها.. وعلى فكرة يا جماعة الماكياج الناجح بيعتمد على التدريج أو المزج التدريجي في الألوان بين الفاتح والغامق، وبلاش نعتمد على اللون الفاتح فقط؛ لأنه بيعمل أخطاء وفي بعض الأحيان بيعمل تشوّهات للبشرة، وبيبيّن البشرة تعبانة مرهقة جداً زي ما قولنا قبل كده.

أدواتنا الشخصية مش لحد تاني

في معلومة مهمة جداً يا ريت ناخد بالنا منها، وهي إن ما حدش يستعمل أدواتنا خالص؛ لأن ده ممكن ينقل ميكروبات وفطريات، وبكده ممكن نقعد فترة طويلة جداً نتعالج عند دكتور أمراض جلدية، علشان نتخلّص من الحاجات اللي بتطلع في بشرتنا نتيجة العدوى اللي ممكن تتنقل من استخدام الغير لأدواتنا.

البودرة السايبة لتثبيت الميك أب

دخلنا دلوقتي على مرحلة اللوس باودر.. وهنا بنستخدم لوس باودر مائل للبيج؛ لأنه مناسب جداً للون بشرة الموديل اللي معانا، وعلى فكرة اللون ده طبيعي وحلو أوي على البشرة، وبيخلي البشرة تبان طبيعية جداً؛ لأن زي ما إحنا عارفين إن الميك أب كل ما كان طبيعي كل ما كان أحلى.

كمان عايزة أقول لكم على حاجة مهمة أوي، وهي إن وظيفة اللوس باودر أو البودرة السايبة هي تثبيت الفاونديشن، وفي ناس كتير بتحط الكومباكت باودر “البودرة المضغوطة” بعد الفاونديشن وده غلط كبير جدا، يا جماعة لازم يكون في لوس باودر لتثبيت الفاودنيشن، لكن “البودرة المضغوطة” دي وظيفتها امتصاص الدهون الزيادة الموجودة في البشرة وتصليح الميك أب.

ولازم نستخدم بودر لونها مناسب للون بشرتنا، ونبعد عن البودرة الفاتحة؛ لأنها مش مناسبة نهائي، لازم دايماً نستخدم الألوان اللي تكون قريّبة من درجات البيج ونختار منها المناسب للون بشرتنا.


خطوات عمل ماكياج بسيط للعين

1- علشان نعمل ماكياج عين بسيط بنختار الألوان على حسب لون بشرتنا ولون عينينا ولون اللبس؛ فمثلاً الموديل اللي معانا لابسة أزرق زهري على جينز، علشان كده “سحر” هتسخدم لها اللون السيمون..

2- هنبدأ نوزّعه بالفرشاة المخصصة لمنطقة الجفن المتحرّك، وأكيد مع اللون ده هتستخدم اللون الأزرق الكحلي، وعلى فكرة من عوامل نجاح الماكياج -خاصة ماكياج العين- هي الفُرش؛ لأن كل فرشاة لها وظيفة محددة؛ ففرشاة توزيع اللون فوق الجفن المتحرّك بتختلف عن فرشاة توزيع اللون على جانب العين وبتختلف عن فرشاة توزيع اللون تحت العين وبتختلف عن فرشاة الآي لاينر.

3- بنبتدي نسيّح اللون على الجفن المتحرّك وفوق الجفن المتحرّك، علشان هنعمل رسمة بسيطة مش هنمزج فيها ألوان كتيرة علشان الماكياج يكون بسيط وطبيعي.

4- بنفتّح المنطقة اللي تحت الحاجب بلون فاتح زي اللؤلؤ؛ لتنوير المنطقة اللي تحت الحاجب، وبنمزجه مع درجة اللون اللي موجود على الجفن المتحرّك.

5- جينا دلوقتي لمرحلة مهمة جداً، وهي مرحلة تحديد جذور الرموش باللون الأسود، بنمشي على الحدود بالظبط، ولازم نكون حريصين جداً في المرحلة دي، بعد كده بنستخدم الفرشاة الخاصة بزاوية العين لتحديد زاوية العين بشكل بسيط بحيث إنها ما تقفلش العين.

على فكرة الرسمة دي بسيطة جداً، وبتناسب أغلب العيون وخصوصاً العيون المتهدلة، كمان مناسبة لو كنا خارجين الصبح أو بعد الظهر، أو لو كنا عايزين نظهر بمظهر طبيعي وبسيط.

هندخل بعد كده على مرحلة الآي لاينر، وطبعاً مش لازم نشد الجفن وإحنا بنرسم خط الآي لاينر، وعلى فكرة الآي لاينر بيعمل نظرة فيها عمق للعين، وبيحدد العين وينورها.


الطريقة الصحيحة لوضع الماسكرا

علشان الماسكرا تتعمل معانا صح بنجيب الماسكرا ونمشط بيها الرموش من اليمين إلى الشمال، وفي حاجة حلوة ممكن إننا نعملها لو الماسكرا اللي عندنا في البيت نشفت، ممكن نجيب إناء ونغلي فيه مية ونحط فيه الماسكرا شوية صغيرين لغاية ما تبدأ تشتغل تاني وتطلع السائل اللي فيها، أو نحط نقطة أو اتنين فقط مش أكتر من كده من قطرة الـ”البروزولين” اللي عندنا في البيت ونحرّك الفرشاة داخل الماسكرا وهنلاقي إن الماسكرا اشتغلت.

كمان أحب أقول إن الماسكرا اللي بتطوّل وتكثف بتدي شكل أحلى للعين من الماسكرا اللي بتطول بس أو بتكثف بس.

ولو عايزين مظهر طبيعي يبقى هنجيب الماسكرا اللي بتطوّل بس، وعلى فكرة إحنا هنا بنعمل مظهر طبيعي من غير ما نحتاج لرموش صناعية.

تحديد العين بالكحل

هنجيب بعد كده قلم الكحل ويكون طري، ولو مش طري بنسخنه بالولاعة شوية ونستنى لما يبرد، وبعد كده نحطه جوه العين، وعلى فكرة لون قلم الكحل بيتحدد بلون اللبس.. وعلى فكرة لو كنا عايزين ماكياج العين يثبت لمدة طويلة، يبقى يا ريت نبلل الفرش بشوية مية قبل ما نستخدمها في رسم الآي شادو.

طريقة وضع ماكياج الشفايف

هنبتدي نحط قلم التحديد ويكون لونه أغمق درجة من لون الروج اللي هنستعمله، وبنحدد الشفايف بشكل يتناسب مع شكلها، وعلى فكرة دلوقتي فيه مستحضرات تجميل عبارة عن جلوس “ملمع” فيه مادة “الكولاجين” بيساعد على تكبير الشفايف شوية، ولو كان غالي ممكن إننا نستخدم أي ملمع أو زبدة كاكاو تكون فيها مادة النعناع ونستعملها قبل ما نحط الروج.

مهم أوي إننا نستخدم الفرشاة في وضع الروج؛ لأنها بتسهل وضعه بطريقة سريعة وجميلة وبتخليه يملى الشفايف كلها، كمان الجلوس مهم جداً لأنه بيدي ضي حلو أوي للشفايف.. ونصيحة مهمة جدا بعد ما نستعمل قلم الروج لازم نجيب قطنة مبللة ببعض من الماء ونمسح مكان ما استخدمنا الروج، وعلى فكرة إحنا هنا حطينا روج هادي وما تقلناش علشان تقلنا ماكياج العين والعكس طبعاً لو كنا خففنا ماكياج العين يبقى هنتقل الروج.

ودلوقتي بندخل على المرحلة الأخيرة، وهي البلاشر “أحمر الخدود” وبنختار لون هادي وبناخده بزواية على عضمة الودن وما بنحطهوش على الوش كله.


                                                    كنا سعداء معاكم النهارده..
                                    وإن شاء الله نقدّم لكم كل جديد في الحلقات القادمة..
                                                وفي انتظار أسئلتكم ومقترحاتكم
                                                     ميرسي ليكم “إيمان أيوب”…

< >