الرئيسية > صحة وجمال > قمر 14 > خلّي بيتك لوحة فنية بالاستيكرز

خلّي بيتك لوحة فنية بالاستيكرز

صور العروسين على شكل شخصيات كاريكاتير

عايزة تجددي شقتك باستمرار وترسمي أي شكل للديكور من خيالك ويتحقق في الواقع بأي مساحة, وبأقل تكلفة ومن غير مجهود.. يبقى لازم تتعرفي على استايلات الاستيكرز الحديثة اللي هتقدّمها مهندسة الديكور: مي عصمت.. يلّا نشوف مع بعض…

في البداية عايزين ناخد فكرة عن الاستيكرز الحديث، وكيف تقومين بتصميمه؟

الاستيكرز هو عبارة عن مادة من “الشيت الملون” بداخله لزق منه فيه مصنوع من خامة البلاستيك، وباحصل على الشيت من دول خارج مصر،  وأول حاجة باعملها باقوم بتصميم شكل معين من خيالي أو من أشكال الديكورات المختلفة، وممكن كمان أطلب من العميل إنه يرسم أي شكل على ورق وبعد كده أبتدي أدخّلها على الكمبيوتر عن طريق برامج متخصصة، وبعدها أقوم بإرساله إلى شركة ديكور تقوم بتفريغه بالليزر على حسب الديزاين اللي أنا راسماه.

ودراستي في  مجال التصميم والألوان في كلية الفنون الجميلة أتاحت لي ابتكار تصميمات وتركيب الألوان مع بعضها، علشان كده لما اتخرجت وجدت إن فكرة الاستيكرز منتشرة جداً في الخارج وحبيت إني أنشر الفكرة في مصر بشكل جميل وبتكلفة قليلة.

وإيه البرامج اللي بتساعدك في تصميم أشكال مختلفة وجديدة من الاستيكرز؟

أنا دائماً باستخدم كل برامج الجرافيك في تصميم الشكل الخاص بالاستيكرز مثل: (الفوتوشوب، الفري هاند, الفلاش, الالستريتور)،  وباحاول استخدم البرنامج اللي بيوظف الشكل اللي أنا عايزاه يعني مثلاً “الالستريتور” باستخدمه في التصميم الخاص بالأشكال الانسيابية الناعمة، و”الفوتوشوب” في التصميمات الخاصة بالأشكال الهندسية يعني كل برنامج بيساعد على تصميم أي شكل أنا عايزاه.

إيه اللي بيميز الاستيكرز عن ورق الحائط والرسم على الحوائط بالدهانات؟

الاستيكرز بيتميز إن أشكاله ليس لها حدود ومساحة الإبداع به أكثر، وممكن تجددي بيه بيتك في أي وقت, وكمان ممكن تنزعيه من على الحائط بدون ما يعمل آثار, بالإضافة إلى أن تكلفته أقل من تكلفة الدهان على الحوائط ولكن ورق الحائط محدود في أشكاله ولازم تعملي كل حوائط الشقة ورق حائط، بالمقارنة بالاستيكرز بتعملي الأماكن اللي أنتِ عايزاها في داخل شقتك.. والأهم من كده مش مرتبط بتجهيزات خاصة علشان كده معظم العرايس اللي بيسكنوا في شقق إيجار جديد بيحبوا الاستيكرز.

لكن معروف عن الاستيكرز إن خامته سميكة وده بيأثر على الشكل العام بالمقارنة بالدهان على الحوائط؟

الاستيكرز المعالج سمكه أقل من الميللي وتشعري بأنه مسطح على الحائط بالإضافة إلى إنه مفرغ، وده بيساعد أنه يكون طبيعي وأسعاره بسيطة جداً وأهم ميزة فيه كمان إن العميل ممكن يلزق الاستيكرز بنفسه بدون الحاجة إلى عمال ديكور.

وهل فيه أحجام ومقاسات محددة للاستيكرز؟

الاستيكرز لا يرتبط بمساحات محددة وده بيكون على حسب شكل الغرفة ومساحة الحائط بتاعها وشكل الديكور كمان.. يعني لو الفرش سادة يتيح لنا إننا نعمل استيكرز على أكثر من جانب في حائط الغرفة, ولما الفرش يكون فيه رسومات وألوان كتير وزحمة يبقى لازم أعمل العكس ويكون الاستيكرز هادي وبسيط, ممكن كمان أعمل جزء من الاستيكرز في منتصف الحائط فقط أو على الجوانب.  

إيه خامات الحوائط اللي بيتناسب معها الاستيكرز؟

من الأفضل أن الاستيكرز يكون على لاكيه أو بلاستيك أو أي سطح أملس ناعم لأن السطح الخشن بيجرح الاستيكرز، ويساعد على دخول المياه، وده بيقلل من عمره، لكن مهما كان لون الحوائط وشكلها ممكن نلزق الأستيكرز.

 

[nggallery id=235]

ويا ترى إيه الفرق بين الاستيكرز المودرن والكلاسيك؟

المودرن بيتميز بالبساطة وأشكاله بتكون زي المثلثات والدوائر والمربعات والفراشات وأشكال الطبيعة، أما الكلاسيك بيكون على شكل زخارف وفيه تفاصيل كثيرة.. أما بالنسبة للألوان، فالمودرن ألوانه صارخة زي الفوشيا والموف والأزرق، أما الكلاسيك بيكون أقرب إلى الألوان الترابية زي الذهبي والبيج والألوان الهادئة عموماً ومعظم الشباب دلوقتي بيميلوا إلى المودرن.

شاهدي مجموعة من الاستيكرز المودرن والكلاسيك


[nggallery id=233]

 

وإيه الألوان الموضة في الاستيكرز؟

اللون الذهبي والفضي والفوشيا والموف والرمادي المائل إلى الموف واللون الفيروزي  والنبيتي.

لو عايزة أغير شكل الاستيكرز إزاي أشيله من على الحائط؟

مافيش أي مشكلة في إزالته، وممكن إزالته عن طريق السيشوار, يعني أوجّه السيشوار على الاستيكرز لحد ما (يطرى) وينزع بسهولة.

وإزاي أنظّفه؟

بأي سائل تنظيف وبفوطة ناعمة أو إسفنجة معصورة كويس.

ويا ترى أشكال الاستيكرز اللي بتكون على أبواب الغرف عاملة إزاي؟

بالنسبة للباب الرئيسي للشقة يتناسب معاه الاستيكرز الكلمة أو الجملة الكبيرة اللي تاخد مساحة الباب كله زي كلمة (Welcome) مثلاً،  أما بالنسبة للغرف بيكون شكل ميكي ماوس -أشهر الأشكال-  أو أعمل الشكل المتناسق مع روح وفرش الغرفة واستيكرز الحائط.

لكن فيه أشكال معينة من الاستيكرز  بتناسب الحمامات؟

الاستيكرز اللي بيكون على شكل زخارف أو موج البحر يتناسب جداً مع الحمامات، وممكن نلزقه في منتصف السيراميك أو نعمل شكل استيكرز يكون زي شكل وحدة سيراميك حلوة داخل الحمام.

وداخل المطابخ بيكون شكله إيه؟

فيه أفكار حلوة جداً للزق الاستيكرز داخل المطبخ يعني مثلاً ممكن نعمل شكل (مطبقية) ونضعها عليها مسامير حرف(L) نعلق عليها المصفى والبراد والكبشة وكل أدوات المطبخ وفي الآخر بيعطي إحساس شكل المطبقية من غير ما نستغل مساحة.

شاهدي مجموعة من الصور لاستيكرز الحمامات والمطابخ


[nggallery id=234]

 

وإيه الأماكن الثانية اللي ممكن نلزق عليها استيكرز داخل الشقة؟

الاستيكرز ممكن يكون بديل عن سرر النجف، وعلى كورنيش السقف وعلى الدولاب السادة، وعلى زجاج الشبابيك، وعلى المرايات، وعلى الثلاجات والغسالات والديب فريزر أو ممكن في الريسبشن نعمل شكل استيكرز على شكل السيراميك أو السجاجيد أو الستاير بالإضافة كمان إننا ممكن نعمل ديزاين تابلوه على شكل استيكرز.

وأخيراً إيه الأشكال الجديدة والروشة في الاستيكرز؟

بارسم صور العروسين على شكل شخصيات كاريكاتير بدل من الصور التقليدية الموجودة في البراويز وأضعها داخل شريط سينما, وممكن كمان أعمل استيكرز عبارة عن جملة رومانسية زي “بحبك” أو “وحشتني”، ويكون في غرفة النوم، وتعطي إحساسا بالرومانسية، أما بالنسبة لغرف الأطفال باصمم أشكال كارتونية وأشكال حيوانات وعربيات بالإضافة إني باصمم أشكال على أكباس النور من خلال فريم حول الكُبس، يعني في النهاية ممكن نعمل البيت كله لوحة فنية بالاستيكرز.

 

شاهدي صورة متنوعة تساعدك على اختيار الأشكال الحديثة للاستيكرز

 

 

                               ولغاية هنا وخلص كلامنا النهارده، وإلى اللقاء في العدد القادم