الرئيسية > استشارات > فضفض لنا > 10 طرق تعبّري بيهم عن مشاعرك مع حبيبك!!
اضف إستشارتك

10 طرق تعبّري بيهم عن مشاعرك مع حبيبك!!

عايزة أقول لخطيبي: بحبك ومش عارفة!!

أنا كنت اتكلّمت من قبل عن مشكلتي أنا وخطيبي، ورديتم عليّ، وأشكركم جداً جداً على النصائح الغالية دي، أنا بس عندي مشكلة ومش عارفة ممكن تفيدوني ولا لأ، بس أتمنّى ولو حل صغير يريّحني ويريّح خطيبي.
 
أنا باتكسف جداً أو بمعنى أصح مش لبقة ولا باتكلّم كتير، وخطيبي ما بيحبش كده؛ يعني أنا بحب خطيبي جداً، بس باتكسف أقول له: حبيبي أو بحبك أو وحشتني، كل لما بييجي يكلّمني في التليفون أفضل ساكتة ما بتكلّمش، ولو اتكلّمت أبقى بارد على كلامه هو اللي دايما بيتكلّم، وأنا بارد عليه ما بلاقيش كلام أتكلّمه أنا ما باحسسهوش إني بحبه، وهو قال لي كتير إني مش باحس إنك بتحبيني، ويقول لي: أنتِ ليه مش زي البنات؟!! ويقول لي: قولي لي كده إنتِ كام مرة قلتِ لي يا حبيبي.

أنا مشكلتي إني ما باعرفش أفتح مواضيع حتى لو بايخة، ممكن تفيدوني إزاي أفتح مواضيع؟!! عايزة أقول له بحبك ومش عارفة؟!! ولو كلّمني في التليفون أقول له إيه؟!! قولي لي أي موضوع أتكلّم فيه أنا قبل كده قولت له لو اتجوّزنا هانخلف كام ولد وكام بنت؛ لأني مش لاقية حاجة أتكلّم فيها، هو لف ودار كتير، وعرف قبل ما يخطبني بنات كتير، وأكيد سمع كلام حلو كتير، يقوم لما ييجي يخطبني ما يسمعش مني أي حاجة، نفسي لما يكون زعلان أراضيه، ولما يكون مخنوق أهوّن عنه، نِفسي أسعده أوي.

يا ريت تردوا عليّ بسرعة؛ لأني حاسة إنه هايضيع مني أتمنّى تكونوا فهمتوني أنا عايزة أوصل لكم إيه؟!!

rema

بالصدفة البحتة مع مشكلتك، وصلتني مشكلة تانية تبدو وكأن اللي كتبها خطيبك، المشكلة بيحكيها شاب رومانسي، لكن خطيبته ساكتة ومنطوية على نفسها، وده بيخليه خايف من بكره، وخايف السكوت ده يبقى طبع، ودي حاجة قاتلة من وجهة نظره ومعاه حق، لدرجة أنه بيفكّر يسيبها أو يسألها إذا كانت عاوزة تكمّل معاه أو لأ؟ لما قريت المشكلة اندهشت، وقلقت على علاقتك بخطيبك، وحسيت إنك محتاجة تتغيّري من جواكِ، وتكوني على حريتك، وتعبّري عن نفسك بشكل أفضل معاه، بس ده يا صديقتي هياخد وقت؛ لأن ما فيش حد بيتغيّر بين يوم وليلة، ففكّرت إني أقول لك على حاجات بسيطة ممكن تعمليها تهوّن عليه، وتخلّيه سعيد، وتقرّبكم من بعض:

1- ابعتِ رسالة على الموبايل من وقت للتاني تتضمّن كلمة واحدة مكتوب فيها: “وحشتني، بحبك، أو ربنا يخليك ليّ”.

2- لو بيستخدم الإنترنت ابعتِ له رابط أغنية حلوة، واكتبي على الإميل الأغنية دي مني لك.

3- هدايا بسيطة بدون مناسبة معينة؛ يعني لو بيزورك في البيت جرّبي تحضّري له مفاجأة بسيطة، اشتري له حاجة يلبسها أو يحطّها جنب سريره، حاجة تفكّره بيكِ، وتحسّسه إنك مهتمة بيه.

4- اعملي له سي دي عليه أكتر الأغاني اللي بتحبيها.

5- افتحي معاه مواضيع عن فيلم جديد في السينما، أو حاجة قرأتِها على الإنترنت.

6- اسأليه دايماً عن شغله، أو عن أصحابه، عن هواياته، أو أكتر الأماكن اللي بيحبها.

7- اطلبي منه يساعدك في اللي بتعمليه، سواء مذاكرة أو شغل أو بحث على الإنترنت، اشركيه في اهتماماتك.

8- استني لما ييجي، واعملي له حاجة حلوة زي رز بلبن أو بسبوسة، لو ما تعرفيش اتعلّمي تعمليها، وإنتِ بتقدّميها له قولي له: إنك اتعلّمتيها أو عملتيها مخصوص عشان خاطره.

9- لما يكون زعلان.. ما تقعديش ساكتة وفي الوقت نفسه ما تسأليش “إنت زعلان؟؟؟” طالما هي واضحة زي الشمس.. اطلبي منه يحكي لك اللي مزعله وحسسيه إنك مهتمة تعرفي فعلا، لو رفض جربي تشغلي شيء كوميدي يكون بيحبه، أو مزيكا هادية، وتعملي له ليمون، وتتكلّمي معاه عن أخبارك أو مواقف مضحكة أخواتك عملوها معاكِ.

10- ودي بقى أصعب طريقة، وهي إنك في مرة من المرات تقولي له: “أنا بحبك أوي، بس بلاقي صعوبة في التعبير عن مشاعري ومحتاجة تساعدني”، والعبوا مع بعض لعبة صغيرة، خليه يعمل ورقات صغيرة مكتوب فيهم: “بحبك أوي” أو “وحشتني”، أو أي كلام حلو نفسه يسمعه منك، وكل ما يحس إنك ساكتة ومش قادرة تعبّري عن مشاعرك يديكِ واحدة منهم، ويطلب منك تقريه قدامه، وإنتِ حاولي تطبعي عليه إحساسك الجميل ده اللي كان واضح جدا في رسالتك.

الحاجات دي مش هتعمليها كلها مرة واحدة، لكن من وقت للتاني، مع محاولات حقيقية إنك تشيلي الحواجز اللي ما بينكم، وتعبّري عن مشاعرك، لكن في حدود الخطوبة طبعاً، وإن شاء الله كله هيبقى تمام.

 

لو عايز تفضفض لنا دوس هنا

 

 

كبسولة لصحتك

كيك شيكولاتة لايت